කණියාගේ සටහන | Kaniya's Note

ඉන්ෂුවරන්ස් එක..

2011-08-26T18:43:00.000+05:30

ගොඩ කාලෙකට පස්සේ බ්ලොග් එක පැත්තට ගොඩ උනේ.. මමත් ඉතිං සිංහල බ්ලොග් කරුවෙක්නේ..
ලියන්න ටෙක්නිකල් දේවල් ගොඩක් තිබුනත් ලියන්න වෙලාවක් නැ..

කතාව මෙහෙමයි.. සිද්දිය උනේ මම වැඩ කරන workshop එකේ.. සාමාන්‍යයෙන් තේ වෙලාවට කට්ටිය තේ බීලා කතා බහ කර කර ඉන්නවා.. වැඩ කරන අය මාත් එක්ක ටිකක් එකතුයි.. මුලිං trainee කෙනෙක් විදිහට උං එක්ක එකට‍ වැඩ කරපු නිසා හැමෝම බොහොම විවෘත්තව කතා කරනවා..

අද කට්ටියගේ පඩි දවස.. එක්කෙනෙක් තමන්ගේ ඉන්ෂුවරන්ස් එකේ වාරිකය ගෙවලා ඇවිත්.. දැං ඉතිං කට්ටියම ඒ ගැන කතාව.. ඒවයි වාසි, අවාසි අරවා මේවා.. බරටම සාකච්ඡාව යනවා..

මෙහෙම කතාව යද්දි අර අයියා කියනවා..

"දැං බලන්න ඉන්ෂුවරන්ස් එකෙන් අපි ඉස්පිරිතාලෙක නැවතුනත් ගෙවනවා.. හදිස්සියෙන් මට මොනවා හරි උනා.. ඉන්ෂුවරන්ස් එකක් නොතිබ්බා නම් ගෑනියි ළමයිනුයි මට බනි.. මූ කිසි දෙයක් ඉතුරු කරලවත් ගියෙ නැ කියලා.. ඒකටත් එක්ක මම මැරුනොත් මගේ ඉන්ෂුවරන්ස් එකෙන් ලක්ෂ 20ක් දෙනවා.. අඩුම තරමේ මගේ ගෑනිට වෙන කසාදයක් කරං සං‍තෝසෙං ජීවත් වෙන්න හරි පුලුවං.."

අපේ එවුංටත් ක‍ට පියං ඉන්න බෑ.. එකෙක්ට ඇහිලා තියෙන්නේ අර ඉන්ෂුවරන්ස් එක දාලා තියෙද්දි මැරුනොත් ගෑනිට වෙන කසාදයක් කරන් සංතෝසෙන් ඉන්න පුලුවන් කියන එක..

ඉතිං මූ පැනපු ගමන් කියපි,

අඩේ.. එහෙනං මාත් ඉක්මනට මගේ ගෑනිට ඉන්ෂුවරන්ස් එකක් දාලා දෙන්න ඕන :D :D

කණියාගේ සටහන අනූනමයෙන් සීයට

2011-06-21T20:47:00.000+05:30

කණියාගේ සටහනේ සියවෙනි ලිපියත් ලියවුනා. ලිපි තුන් හාරසීය ලියන අයත් එක්ක සීයක් ලියපු එකත් කජ්ජක්ද.. ඒත් මම අද ඇත්තටම සතුටු වෙනවා මගේ බ්ලොග් එක කියවපු කෙනෙක් ඒකෙන් මොකක් හරි දැනුමක් හෝ අත්දැකීමක් තමන්‍‍ගේ ජීවිතයට ගන්න ඇති කියලා. මොකද මම කවදාවත් ලියපු දෙයකින් ‍තවත් කෙනෙක්ට වැරදි මාර්ගයක යන්න අනුබල දීමක් සිදු කලේ නැ.

මේ දවස් වල සිංහල බ්ලොග්කරණය ගැන ලියන්න හිතුනා, කියවලා තමන‍්ගේ අදහස් ඉදිරිපත් කරන්න කියලා ආරාධනා කරනවා.

බ්ලොග් කරණය සදාචාරාත්මකව සිදුකල යුතුයි කියන මතයේ මම එදා ඉඳන්ම හිටියා. නමුත් අද සමහරෙක් මේ සදාචාරාත්මක භාවය පිලිබඳ කිසි සැලකිල්ලක් නැ. උදාහරණයක් විදිහට ගන්නවා නම් සමහරු බ්ලොග් එකේ තමන්ගේ වීරත්වය පෙන්වන්නේ තමන් බේබද්දෙක් කියන එක මුලු රටටම කියාපාමින් (බොන හැම එකා‍ම මෙහෙම නැ). නැත්නම් තමන් කරපු බලු වැඩක් මහා වීරකමක් විදිහට බ්ලොග් එකේ දාන එකත් දැං එක්තරා ෆැෂන් එකක් වෙලා. අනිත් කාරණය තමයි බ්ලොග් එක මගින් අනිත් අයගේ අනුකම්පාව දිනාගැනීම. බ්ලොග් එකක් තියෙන්නේ තමන්ගේ දුර්වලකම්, අඩුපාඩු වැනි දේවල ප්‍රදර්ශනය කරන්න නෙමෙයි.

අනික තමයි තමන්ගේ බ්ලොග් එකෙන් මොකක් හරි දෙයක් හෝ අදහසක් තමන්ගේ පාඨකයන්ට ඉදිරිපත් කලා නම් ඒවාට ලැබෙන සදාචාරාත්මක ප්‍රතිචාර වලට උත්තර දෙන්න අපි බැදී සිටිනවා. කමෙන්ට් වලට බයේ පැනලා යන එක නෙමෙයි කරන්න ඕනා. ඒත් ‍කවුරු හරි කුනුහරුප කමෙන්‍ට් එකක් දාලා ගිය පලියට ඒක පබ්ලිෂ් කරලා ඒකට උත්තර බඳින එක මගේ මතයට අනුව නම් වැරදියි.

මේ මම කිවුවේ මම දකින වැරදි.. ගොඩක් අය එහෙම නැ කියන එකත් ‍ගොඩක් සතුටින් කියන්න ඕනා. ඒත් කිරි හැලියට එක ගොම බිංදුවක් වැටුනා නම් හොදටම ඇති.

සියලු බ්ලොග්කරුවන්ට කාරියන්ට සුබ අනාගතයක්!! ඒ වගේම මේ ලියන අයට මීට වඩා වටිනාකමක්, පිලිගැනීමක් ලැබේවායි ප්‍රාර්ථනා කරනවා.

පන්සලට නැති ගෞරවය දේවාලයට..

2011-06-15T08:01:00.000+05:30

ඉස්සර ටෙක්නිකල් ලිපි වලට මූලිකත්වය දුන්නත් බ්ලොග් එකක් ඇත්තටම තමන්ගේ පුද්ගලික අත්දැකීම් වලිං සම්පූර්ණ වෙන්න ඕනා කියන කාරණය නම් මම තරයේම විශ්වාස කරනවා. අපි මගතොටදී කොයි තරම් සිදුවීම් වලට මුහුණපානවද.. මේත් ඒවගේම මම දැකපු දෙයක්..

මම මගේ සේවා ස්ථානයට යන්නේ බස් එකේ. පාර ඇවිල්ලා 224 (නිට්ටඹූව-ගිරිඋල්ල). මම වැඩිය බස් වල ගමන් කරන්න පුරුදු උන කෙනෙක් නෙමෙයි. කෝච්චියෙම තමයි ගමන. ඒත් ඉතිං මට ඕන හැම තැනටම කෝච්චි නැති නිසා බස් එකේ යනවා :D

මුලින් දවසක් දෙකක් බස් එකේ ගියා.. බස් එකේ මිනිස්සු ගැන එච්චර අයිඩියා එකක් නැ. මොකද පලවෙනි දවසෙම මට වැරදිලා හෝල්ට් එකක් පහු වෙලයි බැස්සේ. ඉතිං බහින තැන ගැන අවධානයෙන් ගියා මිසක් යන මිනිස්සු ගැන ගානක් නැ..

දවසක් දෙකක් යනකො‍‍ට පාර ටිකක් හුරුයි.. දැං ඉතිං යන අතරේ බස් එක නිරීක්ෂණය කරනවා.. දවසක් අහම්බෙන් වගේ මම දැක්කා බස් එකේ බොහෝ දෙනෙක් එකපාරටම ඉඳගෙන ඉන්න සීට් එකෙන් පොඩ්ඩක් ඉස්සෙනවා.. නිකං පස්ස පැත්තේ ‍මොනවා හරි ඇනෙනවා වගේ :D මම ෆුල් හොල්මන්.. දෙවනි දවසෙත් බැලුවා.. බැලින්නම් බස් එක දේවාලයක් පහු කරන් යනවා.. ඒ දේවාලෙ බලේට තමා කට්ටිය උඩ යන්නේ..

ඔය යන පාරෙම ලස්සන පන්සලක් තියේ.. මුං නැගිටිනවා තියා බලන්නෙවත් නැ... මේකට හේතුව විදිහට මම නම් දකින්නේ මිනිස්සුන්ගේ බය. දේවාල වල මම දන්න තරමින් නම් ඉන්නේ යක්කු. ‍මොක‍ද දෙවිවරු කවදාවත් ඔය වගේ කලුවර දුං වැදිච්ච තැන් වල ඉන්නෙ නෑ..

මේ පින්බර පොසොන් පෝය දිනයේ වත් මේ මිනිස්සුන්ගේ මිත්‍යාදෘෂ්ටික මති මතාන්තර නැති වේවායි පතනවා.

සැමට සම්මා සම්බුදු සරණයි !

ලක්ස් තියේද?

2011-06-14T18:27:00.000+05:30

මේකත් මම ඉන්න වර්ක්ෂොප් එකේ සිද්දියක්. අපේ ඉන්නවා ඉලෙක්ට්‍රිෂියන් කෙනෙක්. වැඩිය වයස නැ, තනිකඩ කොල්ලා. හැබැයි මනුස්සයාගේ පොඩි අවුලක් තියේ. සමහර වචන උච්චාරනය කරන්නේ වරද්දලා. මේක ඇවිල්ලා ඒ නිසා උනු ඇබැද්දියක්.

අපේ workshop එකේ තියෙන පොඩි store room එකේ නැති දෙයක් ගන්න Main store room එකට යන්න ඔනා. ඒකට අවශ්‍ය දේ Material request එකක් විදිහට ඉංජිනේරුවාගෙන් අරන් යන්න ඕනා.

ඉලෙක්ට්‍රිකල් වැඩ වලට අවශ්‍ය දෙයක් තමයි වයර් කනෙක්ට් කරන ලග් (electrical lug). මේවා වගයක් නැතුව අපේ ඉලෙක්ට්‍රිෂියන් ඉංජිනේරුතුමා ගාවට ගියා Material request එකක් ලියාගන්න.

ඉංජිනේරු මහතා: මොනවද දැං ඕන?
ඉලෙක්‍ට්‍රිෂියන් : මහත්තයා ලක්ස් ඕනා..

ඉංජිනේරු තුමාටත් ‍එවෙලෙ පොඩ්ඩක් මීටරේ අවුල් ගිහිං අරකේ Lux කියලා ලියලා.

දැං අපේ බුවා අර කොලෙත් අරං යනවා main store room එකට.. ගිහිං දුන්නා අරක. ඒකෙ ඉන්න කොල්ලා කියනවා.. අනේ අයියේ ලක්ස් නම් නැ සන්ලයිට් නම් තියේ.. හැබැයි වෙනදට සබන් ගෙනියන්න එන්නේ නම් උපුල්.. (උපුල් කිවුවේ අපේ tool keeper)

වැඩේ වැරදුනා කියලා මිනිහට තේරිලා තියෙන්නේ එතකොට තමා..

අවුරුදු නැති සිංහල කිතුණුවා

2011-04-14T19:57:00.000+05:30

සිංහල දමිල අලුත් අවුරුද්ද.. සමහරු සිංහල හින්දු අලුත් අවුරුද්ද කියනවා. නමුත් මගේ පෞද්ගලික මතයට අනුව නම් සිංහල ‍දමිල අලුත් අවුරුද්ද කියලා කියන එක වඩාත් සුදුසුයි. අද ඇත්තටම අපි කොයි තරම් ආසාවෙන් බලන් හිටපු දවසක්ද.. නමුත් අවුරුදු දව‍සේ උනත් කතා කල යුතු මාතෘකාවක් තමයි මම අද කතා කරන්න බලාපොරොත්තු වෙන්නේ.. මේකට මුල් උනේ මම වැඩ කරන තැන සේවය කරන පුද්ගලයෙක් එක්ක සිදු උන සාකච්ඡාවක්.. ඔහු සිංහල, නමුත් කතෝලික‍ ආගම අදහන්නෙක්.

හැමෝම අවුරුද්දට සූදානම් වෙන අතරේ මම ඇහුවා.. "අයියලා දැං අවුරුද්දට ගෙවල් එහෙම සුද්ද කරලාද තියෙන්නේ " කියලා.. මට ලැබුන උත්තරේ තමයි, "මල්ලි අපිට අවුරුදු නෑ.. අපි ආගමේනේ.."

මට ඇති උනු ප්‍රශ්නය ‍ඔයාලටත් ඇතිවෙන්න ඇති.. ඇයි මේ සිංහල දමිල අලුත් අවුරුදු උත්සවය ‍මේ සිංහල කතෝලිකයන් සමරන්නෙ නැත්තේ ? මගේ දැනුම අනුව අපේ‍ රටට කතෝලික ආගම ලැබු‍නේ විදේශීය ආක්‍රමණ එක්ක. ඊ‍ට කලින් සිංහල මිනිස්සු අවුරුද්ද සැමරු‍වේ නැද්ද? කෙනෙක් කියන්න පුලුවං ඕන කෙනෙක්ට කැමති උත්සවයක් සමරන්නත් ඒකෙන් වලකින්නත් නිදහස තියෙනවා කියලා.. ඒක හරි..

ඒත් අවුරුද්ද සමරනවා‍ට තහංචි පනවලා තියෙන්නේ ආගමෙන්ද? ඇයි එහෙනම් සිංහල දමිල අලුත් අවුරුද්ද වෙනුවට බෞද්ධ දමිල අවුරුදු උත්සවය කියලා කියන්නේ නැත්තේ??

සංවාදයට විවෘත්තයි..

ලැබූවා වු අලුත් අවුරුද්ද කිරියෙන් පැණියෙන් ඉතිරෙන සුබ අලුත් අවුරුද්දක් වේවා!!!

තවත් එක කතාවක්...

2011-04-06T22:09:00.000+05:30

ඔන්න එකෝමත් එක ගමක මිනිස්සු ටිකක් හිටියා.. ගමක් කිව්වම ඉතිං‍ කොල්ලෝ බල්ලෝ හැමෝම ඉන්නවනේ.. මේ අතරේ ගමට අලුතිං මිනිස්සු එනවා.. බල්ලෝ එනවා.. හැමෝම වෙනසකටත් එක්ක ග‍මේ පිට්ටනියට ගිහිං සෙල්ලං කරනවා.. බල්ලොත් ආසයි නෙව සෙල්ලං කරන්න.. මිනිස්සුත් උංව පන්නන්නේ නැ.. ඒත් කාලයක් යද්දී කට්ටියට ගමේ පිට්ටනිට මදි උනා.. ඉතිං ගංකාරයෝ පිටගංකාරයෝ කියලා නැ... කොල්ලො බල්ලො හැමෝම එකතු වෙලා මහන්සියෙං පිට්ටනියක් හැදුවා.. (හැබැයි ඉතිං බල්ලට ඇති වැඩකුත් නෑ හෙමිං ගමනකුත් නෑ කියනවනේ) පරන එකට වඩා ලස්සනයි. සෝයි නමකුත් දැම්මා.. කට්ටිය සෙල්ලං කලා විනෝද උනා..

ඒත් මේ අතර හිටපු එක කොල්ලෙක් අලුත් පිට්ටනියෙයි පරන පිට්ටනියෙයි ලොකු වෙනසක් දැක්කේ නැ.. හැමෝම කලේ තමන් කරපු සෙල්ලං ටික.. සෙල්ලං කරන්න ආසාවෙං උන්නු අයත් හිටියා.. නොකරපු අයත් හිටියා.. ඉතිං‍ හැමදේම ඉවර වෙනකල් ඉඳලා කොල්ලා කෑ ගැහුවා.. අලුත් පිට්ටනියෙයි පරන පිට්ටනියෙයි වෙනසක් නෑ නේ කියලා..

කොල්ලා කලේ වැරැද්දක්.. එහෙම කියන එක හරි නෑ.. එතන හිටපු මිනිස්සු ටික මේක ‍කොල්ලට ‍හොඳිං පැහැදිලි කලා.. මේ අතරේ හිටියා බුරන්න උපං හපන් බල්ලෙක්.. ඌ‍ට කොහොම හරි එදා බියර් මූඩි දෙක තුනක් පෑගිලා.. මිනිස්සු ටික කොල්ලට අවවාද කරනවා දැකපු බල්ලා ඒකෙං ලකුණු දාගන්න කොල්ලට බුරනවා බුරනවා ඉවරයක් නැ.. වටේ හිටපු මිනිස්සු උනත් බල්ලා බුරන එක නවත්තන්න මහන්සි උනේ නැ.. බල්ලනේ :D

කොල්ලා කල්පනා කලා.. බුරන බල්ලට සිංහලෙං පැහැදිලි කරාට තේරුමකුත් නැ..හොඳම දේ තමයි එතනින් අයින් වෙන එක.. මොකද කොල්ලට බුරන්න බැ..

බල්ලෙක් උනත් බුරන ‍සීමාවක් තියේ.. කොල්ලා ගියා කියලා නැ.. අනික බල්ලට පුලුවං බුරන එක විතරනේ.. තේරෙන්න හෝ නොතේරෙන්න ඒක කලා.. වටේ හිටපු මිනිස්සු බල්ලො හදන්න දන්නැති නිසා සද්ද නැතිව හිටියා..

ඒත් කොල්ලා නිකං හිටියේ නැ..

දවසක් දෙකක් ඉඳලා මෙන්න මෙහෙම පොඩි ගලක් අරං බල්ලට දමලා ගැහුවා.. :D

කවුද යකෝ ඔය බෝතලේ.....

2011-03-27T09:17:00.000+05:30

මේක ඇවිල්ලා මම දැනට Training ඉන්න තැන workshop එකේ වෙච්ච සිද්ධියක්.. අපේ මිකැනික්ලාගේ ෆෝමන් තමා සුසිල් අයියා.. අයියා කිව්වට මට වගේ දෙගුණයක් විතර වයස :D ඒ උනාට අංකල් කියලා තරහා කරගන්න බෑනෙ.. අයියා කියලා තමයි කතා කරන්නේ.. එක විදිහක මනුස්සයා.. වැඩිය සද්ද බද්ද නැ.. කරන්න තියෙන වැඩ කරගෙන ඉන්නවා..

ඒ අතරේ අපේ වැඩ කරන කට්ටිය මදි නිසා ගොඩක් වෙලාවට වැ‍ඩ කරන්න පි‍ටිං කන්ට්‍රැක් අරං එන කණ්ඩායම් කීපයක් ඉන්නවා.. මම‍ කො‍හොම හරි මෙන්න මේ ටීම් එකක් එක්ක අපි ගාව තිබ්බ පොඩ්ඩක් අප්සෙටි ගිය centrifugal blower එකක් බැලන්ස් කරන ගේමකට බැහැලා හි‍ටියේ.. ඉතා වේගෙන් මේවා කැරකෙන නිසා Balancing අත්‍යවශ්‍යයි.. නැත්තං බෙයාරිං ගෙවෙනවා.. කෑලි ඇද ‍වෙනවා.. ලෙඩ ගොඩයි..

කට්ටිය දැං Blower එක ගලවලා ඒකෙ blades එකින් එක ගලවලා සුද්ද කරනවා.. ඇද අරිනවා.. වැඩ ගොඩයි.. අපේ ටීම් එකේ කොල්ලෝ 3යි අංකල් කෙනෙකුයි මමයි හි‍ටියේ.. කොල්ලො ටික වැඩ අංකලුත් එහෙං මෙහෙං උදවු දෙනවා... ඒ අස්සේ සුසිල් අයියා ඊට ටිකක් එහා පැත්තෙ ගෑස් කටර් එකෙන් යකඩ disk වගයක් කපනවා.

ඒ අස්සේ ‍ factory එකේ කෙල්ලො ටිකක් workshop එක ගාව පාරෙ යනවා..

මෙන්න එකපාරටම එහාපැත්තෙ කවුදෝ කෑ ගහනවා.. බැලින්නම් සුසිල් අයියා..

කවුද යකෝ ඔය බෝතලේ කට වැහුවේ..!!!

කටිටියටම මීටර් නෑ මොකක්ද මේ කියලා.. බැලින්නම් අර මනුස්සයා‍ අරෙහෙ යකඩ කපන අතරේ අපි ගාව හිටපු අංකල් ඉන්න ගමං ඔක්සිජන් සිලින්ඩරේ වෑල් එක කරකවලා.. ඔක්සිජන් නැතුව සුසිල් අයියාගේ යකඩ කැපිල්ල මග ඇණහිලා.. :D

කටිටියටම බඩවල් අල්ලං හිනා.. හදිස්සියට අංකල්ට වෑල්ව් එක අරින පැත්තත් මතක නෑ.. :D

කොහොමිං කොහොම හරි කතාව workshop එක පුරා පැතිරෙන්න විනාඩියක් වත් ගියේ නම් නැ...
ඒ අස්සේ එකෙක් අහනවා..

"අංකල් ගෑනු ලමයි දැක්ක පාර වෑල්ව් එක නිකංම කැරකුනා නේද?? " :D

වසර දෙකක බ්ලොග්කරණය | 2nd Anniversary

2011-03-15T09:07:00.003+05:30

මම මේ ‍පෝස්ට් එක දාන්නේ ගොඩක් සතු‍ටින්.. අවුරුදු දෙකක් එක දිගට සිංහල බ්ලොග් එකක් ලියනවා කියන එක මට නම් පහසු උනේ නෑ.. බ්ලොග් එකේ පලවෙනි උපන්දිනේදි කිව්වා වගේම ආයෙත් කරුණු කීපයක් මතක් කරන්න කැමතියි.. මම සිංහල බ්ලොග්කරණයට පිවිසුනේ අපේ මල්ලි‍ගේ බ්ලොග් එක දැකලා.. ඒ ව‍‍ගේම සිංහල බ්ලොග්කරුවෙන් විදිහට ඉදිරියට එන්න අත දුන්නු සිංහල බ්ලොග්කරුවන්ගේ සංසදයටත් ස්තුතිවන්ත වෙන්න ඕනා..

මට මතකයි මම බ්ලොග් එක ලියන්න ගත්තු කාලේ සිංහල බ්ලොග් තිබුනේ තුන්සීයක් විතර. ඒවයිනුත් හරියට කෙරෙන ඒවා සීයක් තියෙන්න ඇති. බ්ලොග් එක මුලින් පටන් ගත්තු කාලෙ හිටපු යාලුවෝ ගැන කියනවා නම් හසියා, ඉන්දරේ, දසුන්, පහන්, චමිල, ලසිත, තමීර, ධනික, මාධව හබරකඩ, ශාකුන්තල, කාලිංග, මලින්ත විශේෂයි... නම නොකිවුන පැරැන්නෙක් ඉන්නවා නම් කමා කරත්වා..

මම මුල් කාලේ ලියපුවා දකිනකොට නම දැන් මටම හිනා යනවා.. ඇත්තටම මේ බ්ලොග් ලිවිල්ල මගේ ලිවීමේ වගේම අදහස් ප්‍රකාශ කිරීමේ හැකියාවෙත් ලොකු වෙනසක් කලා කියන්න පුලුවන්. පොඩ්ඩක් ම‍ගේ මුල් කාලෙ පෝස්ට්.. අවුරුද්දක් විතර ගියාට පස්සෙ පෝස්ට්.. ඒ වගේම මේ කාලෙ පෝස්ට් බැලුවා නම් ලොකු වෙනසක් දකින්න පුලුවන්..

මධ්‍යකාලීනව මාත් එක්ක වැඩ කරපු කට්ටියත් මතක් කරන්න ඕනා.. ඒ අතරින් ලාංකීය සිතුවිලි කණ්ඩායම විශේෂයි. නම් වශයෙන් කියනවා නං ඉතිං වැප්, චතුරංග, සහන්, සුමින්ද අයියා, තරිඳු සහ බුද්ධි තමයි. ඒවගේම හසී පවුල.. බස් එකේදි නිතරම උදව්වට ඉන්න මරණෙ, රවා, ඒ ‍වගේම මගේ බ්ලොග් ගෝලයෙක් වෙන Confiuzed ප්‍රෝග්‍රැමර්වත් මතක් කරන්න ඕනා.. ඒ වගේම අපේ කමෙන්ට් නැති ඒත් පිස්සු හැදෙන ලිපි ලියන ගෙහාන්.. කෝච්චි ඇංජිං කිව්වම තමා අදුරන්නේ :D ආ.. ඇයි අප්පේ කරදරකාර බනියා, අසල්වැසි බුල්ටෝ හෙවත් ශාමින්ද, දුකා, ඉෂාන් මල්ලි, තිලිණ බුවා, මුචලින්ද, ගයන්ත, පසන්, රොකියා, පණුවා, එකී මෙකී නොකී හැමෝම වගේම ජනනි අක්කාවත් ආදරෙන් මතක් කරනවා.. ඇයි බස් සෙට් එක.. (බස් සෙට් එක කිව්වම බස් දුවන හැමෝම අයිතියිනේ.. හැබැයි ඊට වඩා ලේසී සිංහල බ්ලොග් ලියන සෙට් එක කිව්වා නං :D )

ඒ වගේම බ්ලොග් ලිවිල්ලයි ලාංකිය සිතුවිලි සින්ඩිකේටරය නිසයි අඳුන ගත්තු බටුවන්ගල මහා විද්‍යාලයේ අරුණ සර් ඇතුළු මල්ලිලා නංගිලා ටිකත් මතක් කරන්න ඕනා.

බ්ලොග් ලිවිල්ල නිසා අඳුන ගත්තු අය නම් බොහෝයි.. ඔක්කොගෙම නම් දාන්න බෑ.. හැමෝම මේ වෙලාවෙ මතක් වෙන්නෙත් නෑ.. ඒත් ඉතිං මෙච්චර දුරක් ආපු එක ගැන සතුටුයි.. දිගටම ලියන්න බලාපොරොත්තු වෙනවා..

ඒ වගේම පුංචි විශේෂත්වයකුත් තියේ.. මම බ්ලොග් ලියපු 2009, 2010 අවුරුදු දෙකේම අවුරුද්දට පෝස්ට් 43යි.. ඒක දිගටම පවත්වාගෙන යන්නත් ඕනා :D

කොච්චර උනත් මේ ටිකත් කියලා යන්න ඕනා.. අපි හැමෝම වගේ මහන්සි වෙලා ලිව්වට.. මේ ලියන ඒවට හරි ඇගයීමක් ලැබෙන්නෑ කියන එකයි මගේ නම් හැඟීම.. අනාග‍තේදි වත් ඒ බාධක නැති වේවා කියලා ප්‍රාර්ථනා කරනවා.. අපි අපේ ගමන යමු..

ඔන්න කණියාගෙන් හැමෝටම සුබපැතුම්..

අන්තර්ජාලය තුල කොටුවීම හා මනුස්සකම අහිමිවීම

2011-03-08T20:31:00.000+05:30

මම ඇත්තටම මේ මාතෘකාව පිලිබඳ කතා කරන්න හිතුනේ මේක බොහෝ දෙනෙකුට බලපාන නිසා. අද ගොඩක් තරුණ තරුණියෝ තමන්ගේ කාලය ගත කරන්න පුරුදු වෙලා කියෙන්නේ අන්තර්ජාලයේ සත්‍යාසන්න මිතුරන් මිතුරියන් ඇසුරු කරමින්. ඇත්තටම ‍මේක වෙන්න හේතු කීපයක් තියෙනවා..

අන්තර්ජාලය තුල බොරු කරන්න හරිම පහසුයි. කොල්ලෙක් නම්, වීරයෙක්.. කෙල්ලෙක් නම්, මැක්සා කෑල්ලක් වෙන්න තියෙන අවස්ථා අනන්තයි (පැණියන්ගේ පිහිටෙන්). සමහරුන්ට යාලුවෝ දහස් ගනන්. Facebook එකේ උපන්දින මතක් කරලා දෙන නිසා උපන්දින සුබපැතුම් පිරිලා.. ඒත් කීයෙන් කීදෙනාද උපන්දිනයක් මතක ති‍යාගෙන සුබපතන්නේ..

මේ දේවල් නිසා අද අපේ කොල්ලෝ කෙල්ලෝ ගමෙන් ඈත් වෙලා.. ගමේ දුප්පත් මනුස්සයාගේ කොල්ලට, කෙල්ලට කොම්පියුටර් නෑ.. ඉන්‍ට‍නෙට් නෑ.. එතකොට උං ගොඩේ.. ඔන්න ඕවා තමයි අද බොහෝ දෙනෙක්ගේ ආකල්ප. ඒත් මම හිතන විදිහට නං උං අපිට වඩා පොලවේ පය ගහලා ජීවත් වෙනවා.. ගමේ ඕන මනුස්සයෙක් අඳුනනවා. මනුස්සකම අඳුනනවා..

බ්ලොග් වල, buzz වල බණ කියන කීයෙන් කී දෙනාද පන්සලේ හාමුදුරුවන්ව අදුරන්නේ.. කීයෙන් කී දෙනාද පෝයකට පන්සල් යන්නේ.

ම‍ට මතකයි කවුරු හරි කියලා තිබ්බා.. ගමේ මිනිස්සු ටික Facebook එකේ හිටියා නම් අදුරගන්න තිබ්බා වගේ කතාවක්.. ඔන්න ඕකයි අද තත්වේ..

තාක්ෂණය තමන්ගේ වහලෙක් කරගන්න. තාක්ෂණයට වහල් වෙන්න එපා.

කුඩා බලශක්ති ප්‍රභව යතාර්ථයක්ද?

2011-02-21T19:05:00.001+05:30

අද ලෝකයේ ඇති විශාලම ගැටලුව තමයි ශක්තිය.. බලශක්ති අර්බුදය සෑම රටකටම පාහේ දැනෙන්න පටන් අරන්.. පොසිල ඉන්ධන වල කාලය බොහොම ඉක්මනින් අවසන් ‍වීගෙන යනවා. මේ නිසා බොහෝමයක් රටවල් විකල්ප බලශක්ති ප්‍රභව පිලිබඳ අවධානය යොමු කරමිනුයි සිට්න්නේ. නමුත් මේ හැමෝටම තියෙන විශාලම ගැටලුව තමයි නිපදවන ශක්තියට සමානුපාතිකව ඒ ශක්ති ප්‍රභවයේ ප්‍රමාණය විශාල වීම.. සරළම උදාහරණයක් ගත්තොත් වෝල්ට් 1.5 බැටරියකට වඩා වෝල්ට් 12 බැටරියක් විශාලයි..

බලශක්තිය කියද්දී අපිට ප්‍රධාන වශයෙන් මතක් වෙන්නේ විදුලිය. විදුලි බලය තිබේ නම් කල නොහැක්කක් නොමැති තරම්.. තාපය නිපදවාගන්න, තාපය ඉවත් කරන්න, යාන්ත්‍රික ශක්තිය නිපදවන්න.. ආලෝකය.. මේ හැම දේම විදුලියෙන් කරන්න පුලුවන් කියන එක අපිට ඉතා පැහැදිලියි.. එහෙනම් අපිට අවශ්‍ය එක දෙයයි..කුඩා බලශක්ති ප්‍රභවයක්.. ඇයි මේක කුඩා වෙන්න ඕනා??

ටෝච් එකක බැටරියක් ලොරියක් විතර උනා නම්.. අපි මුහුණපාන ගැටලු ගැන කියන්න අවශ්‍ය නෑ.. ගැටලුව තියෙන්නේ අපේ සාම්ප්‍රදායික බලශක්ති ප්‍රභව එක්කෝ ඕනෑවට වඩා විශාලයි.. එහෙ මෙහෙ ගෙනියන්න අපහසුයි.. ගෙනයාමට පුලුවන් ඒවා එක්කෝ බලය මදි.. නැත්තං බලය එක දිගට ලබාදෙන්න පුලුවන් කාලය මදි..
‍
මේ වගේ ශක්ති ප්‍රභවයකට හොඳ උදාහරණයක් තමයි Iron Man ෆිල්ම් එකේ එන Arc Reactor එක.. ප්‍රමාණයෙන් කුඩා නමුත් විශාල ශක්තියක් ලබා දිය හැකි ශක්ති ප්‍රභවයක්.. (ලස්සන එලියකුත් එනවා :D ) මම දන්න තරමින් මෙහි ශක්තිය නිපදවෙන්නේ න්‍යෂ්ඨික ප්‍රතික්‍රියාවකින් ලැබෙන ශක්තිය විදුලිය බවට පරිවර්ථනය කි‍රීමෙන් .. මෙකෙදි පාවිච්චි කරලා තියෙන තාක්ෂණය නම් විවාදාත්මකයි. නමුත් මම විශ්වාස කරන්නේ නොහැකි දෙයක් නැ කියන එක.

ඒ වගේම තවත් Power source එකක් මායාබන්ධන කියන TV series එකේ පාවිච්චි වෙනවා. ඒක නම් සාමාන්‍ය ප්‍රමාණයේ විශේෂ හැඩැති බැටරියක්. එහි විශේෂත්වය පෙන්වන්නේ මල්ටිමීටරයකින් එය පරීක්ෂා කිරීමේදී මල්ටිමීටරය විනාශ වෙනවා පෙන්වීමෙන්. මෙහිදී නැවතත් ප්‍රමාණයෙන් කුඩා නමුත් විශාල බලයක් ලබාදෙන ශක්ති ප්‍රභවයක් ඉදිරිපත් කෙරෙනවා.

ඇත්තටම බලශක්ති ප්‍රභවය කුඩා වීමේ වාසිය මොකක්ද? එහෙම උනා නම් දැනටමත් අපි මුහුණපාන බොහෝමයක් ගැටලු විසඳී අවසන්. උදාහරණයක් විදිහට දැන් විදුලි බලයෙන් ගමන් කරන වාහන ගැන බොහෝ දෙනෙක් උනන්දු වෙනවා.. මේවායේ තියෙන ප්‍රධානම ගැටලුව තමයි එක්වරක් ආරෝපණය කර ගමන් කල හැකි දුර සීමාවීම. නමුත් ප්‍රමාණයෙන් කුඩා ප්‍රභල බලශක්ති ප්‍රභවයක් තිබුනා නම් අකාර්යක්ෂම දහන එන්ජින් කෞතුකාගාර වල පමණයි දකින්‍න වෙන්නේ..

ඒ වගේම තමයි ලැප්ටොප් එකකට.. ජංගම දුරකතනයකට බැටරියේ වටිනාකම කියලා නිම කරන්න බෑ.. කොහොමද ජීවිතකාලය පුරා අවසන් නොවන ජංගම බල සැපයුමක් තිබුනා නම්.. එහි ප්‍රමාණය දැනට තිබෙන බැටරියක තරම් උනත් කාටත් ගැටලු‍ව‍ක් ඇති වෙන එකක් නෑ.
ඇත්තටම මේ අවශ්‍යතාවය නිසා බොහොමයක් විද්‍යාත්මක සොයාගැනීම් එක්තරා සීමාවක තියෙන්නේ.. මෙවන් ශක්ති ප්‍රභවයක් සොයාගත් දිනක සිදුවන දේවල් ගැන නම් හිතා ගන්න බැරි වෙයි.. Iron Man වගේ යන්ත්‍ර නිප‍දවෙන දිනත් වැඩි දුරක නැති වෙයි...

අහසේ පාවීම සැබැවින්ම කල හැකිද?

2011-02-18T08:25:00.000+05:30

අහසේ පාවීම.. ගුවනින් ගමන් කිරීම.. මේවා අපි බොහෝ දෙනෙක් නොකීවත් හිතේ තියෙන හීන. ඉස්සර මට මතකයි පියා‌ඹන කුරුල්ලෝ දිහා බලන් ඉඳලා හිතනවා.. අනේ මටත් අර වගේ පියාඹන්න තිබුනා නම්.. ඊටත් වඩා ආසාව තිබුනේ මේ ඉන්න විදිහෙන් අහසේ ගමන් කරන්න තිබුනා නම් කියලා..

පියෑඹිම නම් විවිධ ක්‍රම මගින් සිදුකරන්න පුලුවන්.. ඒත් පාවීම.. ඒක හාත්පසින්ම වෙනස් සංසිද්ධියක්.. පොලොවේ ඇවිදිනවා වගේ අවකාෂයේ ඇවිදින්න අපිට තියෙන එකම බාධාව තමයි නිවුටන් හොයාගත්තු ගුරුත්වාකර්ෂණය.. අපේ ස්කන්ධය කොයි තරම් අඩු උනත් පෘථිවියේ ස්කන්ධය ඉතා විශාල නිසා අපිට ගුරුත්වාකර්ෂණයෙන් මිදෙන්න බෑ.. මොකද ගුරුත්ව බලය ස්කන්ධ දෙකේ ගුණිතයට අනුලෝමව සමානුපාතිකයි..

මේ ගැන හිතනකොට මට ආපු තවත් අදහසක් තමයි පෘථිවියේ චුම්භක ක්ෂේත්‍රය.. හැමෝටම මතක ඇති මායා බන්ධන කියලා TV series එකක්.. ඒකෙ ආෂ්කා අලුතින් හදන බල ඇඳුම පාවිච්චි කරලා පාවෙනවා.. එතනදි යොදාගන්න මූලධර්මය තමයි පෘථිවියේ චුම්භක බලයට ප්‍රතිවිරුද්ධ බලයක් ඇති කරලා අහසේ පාවීම..

නමුත් පෘථිවියේ චුම්භක ක්ෂේත්‍රය මයික්‍රො ටෙස්ලා 30ත් 60ත් අතර වෙනස් වෙනවා.. මේක ඉතා කුඩා අගයක්.. ගුරුත්වාකර්ෂණ බලයත් එක්ක ගත්තම නොසලකා හැරිය හැකි තරම්.. මොන ක්‍රමයෙන් හරි ඉතා විශාල ප්‍රතිවිරුද්ධ චුම්භක බලයක් නිෂ්පාදනය කල හැකි උනත් ඒ එක්කම ඒකේ ස්කන්ධය වැඩිවීම නිසා මේ ක්‍රමය ප්‍රායෝගික නෑ කියන එක පැහැදිලි ඇති..

ඒ කියන්නේ මායාබන්ධන තියරිය අහසේ පාවිමට තව දුරටත් වලංගු නෑ...

ඒත් අපිට ගුරුත්වාකර්ෂණ බලයට ප්‍රතිවිරුද්ධ බලයක් යොදන්න පුලුවන් නම්?? එහෙම උනා නම් අපේ ගමනාගමන ගැටලු බොහෝමයක් අඩු වෙන්න තිබුනා.. ඊටත් වඩා මේකෙ වාසිය තියෙන්නේ අභ්‍යවකාශ යානා වලට. අභ්‍යවකාශ යානයක ශක්තියෙන් විශාල ප්‍රමාණයක් භාවිතා වෙන්නේ පෘථිවියේ ගුරුත්වාකර්ෂණයෙන් මිදීමට.. ප්‍රතිගුරුත්ව බලයක් යොදන්න පුලුවන් නම් හෝ ඒ ස්ථානයේ ගුරුත්ව බලය පාලනය කල හැකිනම් අර ශක්තිය වෙන කටයුත්තකට භාවිතා කරන්න පුලුවන්...

කලින් සඳහන් කලා වගේ ගුරුත්වාකර්ෂණ බලය හැමවිටම ඒ වස්තු දෙකේ ස්කන්ධයට අනුලෝමව සමානුපාතික වෙනවා.. සමාන ආකාරයේ ස්කන්ධ දෙකක් නම් ඒ අතර බලය හැමවිටම ධන අගයක් ගන්නේ.. බලය දෛශිකයක් නිසා දිශාවත් ඕනා.. මේ දිශාව ප්‍රතිවිරුද්ධ කරන්න අවශ්‍ය වෙන්නේ මොකක්ද?? ව්‍යවහාරයේ තියෙන ස්කන්ධය පෘථිවියේ තියෙන දෙයක්.. ඒක වෙනස් කරන්න බෑ.. එහෙනම් වෙනස් කරන්න ඕනා අනිත් ස්කන්ධය.. න්‍යායාත්මකව ගත්තොත් ඒ ස්කන්ධය ‍ඍණ වෙන්න ඕනා.. ඒත් ඍණ ස්කන්ධයක් හොයාගන්නේ කොහොමද? අන්න ඒක නම් ගැටලුවක්..

මේක හොයාගත්තොත් අනිවාර්යයෙන් මානව ඉතිහාස‍යේ විශිෂ්ඨ සොයාගැනීමක් වෙයි.. මෙතෙක් කාලයක් හැම ‍දේම මිනිස්සු හොයාගත්තා වගේ මේකත් වැඩි කාලයක් හැංගිලා තියෙන එකක් නැති වෙයි කියන එකයි මගේ හැඟීම..

ගණිත ප්‍රශ්ණ පත්‍රය ඇන ගැනීම

2011-02-16T10:31:00.000+05:30

පහුගිය ටිකේම විබාග කටයුතු.. ඉතිං බොහෝම කාර්ය බහුල ජීවිතයක් තමයි ගත උනේ.. විබාගෙට කලින් දවසේ කොයි තරම් පාඩම් කරන්න තියේද.. ඒවයිනුත් අනිතිමට තිබ්බ පේපර් එක ඇනගත්තු හැටි තමයි අද ලියන්නේ..

කොහොමත් මේක නම් ෆේල් වෙන බව මුල ඉඳන්ම දැනං හිටපු කණියා විබාග ශාලාවට ඇතුල් උනා.. හපොයි.. පටං අරන් තියෙන්නෙම වැරදි විභාග ශාලාවෙන්.. :D වහාම කට්ටියත් එක්ක හරි ශාලාවට ගියා.. දැං ඉතිං පේපර් බෙදනවා.. පේපර් එකත් ලැබුනා.. මොනවා උනත් ප්‍රශ්න පත්‍රයක් ලැබුනම මුල ඉඳං කියවන්න එපැයි.. කියවනවා කියවනවා.. නිකං ග්‍රීක් වගේ.. බලං ගියපු ගනන් දෙකත් පිස්සු වට්ටන විදිහට දීලා තිබ්බේ..

‍පැය තුනේ පේපර් එක පැයෙං ලියලා ඉවරයි.. කරන්න දේකුත් නැ.. යන්නත් අවුල් වගේ.. ඉස්සරහ බුවා හෝ ගාලා ලියනවා.. දීලා තියෙන උත්තර ලියන පොතට අමතරව තව කොල 10ක් විතරක් ගත්තා.. ෂිහ්.. මූ උගන්නපු ඔක්කොම ලියනවද මන්දා...

කරන්නත් වැඩක් තියෙන්න එපැ.. මාත් පටන් ගත්තා ‍‍හෝල් එකේ තියෙන ටියුබ් ලයිට් ගාන ගනන් කරන්න.. පේලියකට ටියුබ් ලයිට් 9යි පේලි 4යි.. එකක ටියුබ් ලයිට් දෙක ගානෙ තියේ.. එතකොට ඔක්කොම කියද..

හික්.. දැං ‍‍පොඩි ගානක් හදන්නත් සයන්ටිෆික් කැල්කියුලේටර් නේ අපි පාවිච්චිය.. අමාරුවෙන් ගහලා උත්තරේ ගත්තා.. ටියුබ් ලයිට් 72යි.. එකක් වොට් 80ක් විතර නම් පැය ඔක්කොම වොට් 5769යි.. විබාගෙ පැය 3ක් තියේ.. ඒ කියන්නේ අන්තිමට පැය 3 යනකොට යුනිට් 17.28ක් ඉවරයි..

ආ තව කැරකෙන ෆෑන් ටික.. පේලියක ෆෑන් 8යි පේලි තුනයි.. ෆෑන් 24යි.. ඒවය යුනිට් 7.2යි.. (එකක් වොට් 100ක් විතර කියලා ගත්තොත්..) පැය 3ට ඔක්කොම යුනිට් 24.5ක් විතර.. ලේසී නෑ..

අනික මම මේ බැලුවේ Active power එකනේ.. එතකොට Reactive Power එක? බලන්න ජාතික සම්පත් විනාස වෙන හැ‍‍ටි :D

මම අහලා තියෙන විදිහට කැම්පස් එකේ මාසෙක ලයිට් බිල විතරක් කෝටි ගානක්ලු.. හරියටම ගාන මතක නෑ..

ෂික් තාමත් වෙලාව යන්නෑ.. ඔය ‍ඔක්කොම හිතන්න ගියේ විනාඩි 15ක් විතර.. පේපර් ‍එක ගන්නේ 4ට.. තව පැයයි විනාඩි 45ක් බලං ඉමුකෝ.. :D

ඒ අස්සේ විබාගෙ ඉවර වෙලා ඉස්සරහා බුවා මගේ ගාවට ඇවිත් කියනවා..

"ෂිහ් විබාගෙ අවුල් බං...."

"ඇයි ‍‍මොකද මචං? එකකටවත් ලියාගන්න බැරි උනාද? උබ මාර විදිහට ලිව්වනේ... ම‍ම නම් අනිවා පේල්.."

"නෑ බං..A එකක් එන එකක් නෑ බං.. B එකක් නම් එයි.. " :D :D

මිනිසාගේ පැවැත්මට ආහාර වෙනුවට සූර්ය ශක්තිය

2011-02-04T10:12:00.001+05:30

මුලින්ම කියන්න ඕනා මේ දවස් වල මම මගේ අවසන් විභාගයට පෙනීසිටිමිනුයි ඉන්නේ.. පාඩම් කරන අස්සේ කෑමට යන්නත් ඕනානේ. ඒ යන වෙලාව නම් අපි ව‍ගේ අන්තිම මොහොතේ පාඩම් කරන අයට ලොකුම ලොකු පාඩුවක්.. උදේ පාන්දර පාඩම් කර කර බිස්කට් එකක් කකා ඉන්‍නකොටයි මට මෙහෙම හිතුනේ..

ඇත්තටම මිනිසාගේ ශරීරයේ පැවැත්ම තීරණය වෙන්නේ ප්‍රධාන වශයෙන් ආහාර මත. නොකා නොබී දින ගණනක් හිටියම අවසානයේ අපි මැරෙනවා.. මට ඉතිං හිතුනා මිනිස්සුන්ටත් විකල්ප බලශක්තිය ලබා ගැනීමේ ක්‍රමයක් තිබ්බා නම් කොච්චර හොඳද කියලා.. හරියට සූර්ය ශක්තිය වගේ.. අපේ හම ක්‍රියා කරනවා සූර්ය කෝෂ විදිහට.. අඩුම තරමේ 90%ක වත් කාර්යක්ෂමතාවයකින්.. හැබැයි නිශ්පාදනය වෙන විදුලිය පාවිච්චි කරන්න පුලුවන් වෙන්න අපේ අනික් අවයව සකස් වෙන්න වෙනවා..

එහෙමත් නැත්තනම් අපේ හමත් ශාක පත්‍ර වගේ උනා නම්.. හරිතප්‍රද මගින් සූර්ය ශක්තියයි කාබන් ඩයොක්සයිඩ් වායුවයි පාවිච්චි කරලා ප්‍රභාසංස්ලේෂණය කරනවා නම්.. එ‍හෙනම් ශරීරයට අවශ්‍ය ආහාර ශරීරය තුලම නිපදවෙනවා.. අතිරේකව අවශ්‍ය වෙන්නේ ජලය හා ඛණිජ ලවණ විතරයි.

එ‍හෙම උනා නම් කෑම හොයන්න මහන්සි වෙන්න ඕනත් නෑ.. බඩගිනි උනාම යනවා අව්වට.. හැබැයි මේ ප්‍රභාසංස්ලේෂණ ක්‍රියාවලිය ශාකයකට වඩා 10 ගුණයකින් වත් කාර්යක්ෂම වෙන්න ඕනා.. නැත්තං ඉතිං දවසම අවුවේ තමයි හිටගෙන ඉන්න වෙන්නේ..

පොඩි ගැටලුවක් වෙන්නේ අව්ව නැති කාලෙට.. මේ තියරිය නම් අර Predator කියන film එකෙත් පාවිච්චි වෙනවා.. හැබැයි ඌ නම් මස් කනවා. ඒ අතර ශක්තිය තමන් විසින් නිපදවාගන්නවා.

මේ වගේ දෙයක් උනොත් දැං සුදු කලු හැමෝම‍ කොල පාට වෙයි.. ඒවාටත් ආයෙ ලස්සන කරන අරවා ‍මේවා එයි..

ඇයි රෑට නිදාගෙන උදේට නැගිටිනකොට කට්ටිය සුදුමැලි‍ වෙලා නැගිටියි.. AVATAR ‍ෆිල්ම් එකේ හිටපු නිල් මිනිස්සු වගේ ලෝකෙම කොල පාට මිනිස්සු ඉඳියි..

හැබැයි මිනිස්සු අර වගේ ප්‍රභාසංස්ලේෂණය කරන අතරේ ගස් වැල් අපි වගේ කන්න පටන් ගත්තොත්.. එතකොට අපි ගස්.. ගස් මිනිස්සු...

එකම දෙයයි ප්‍රාර්ථනා කරන්න ඕනා...

අනේ ගස් වල‍ට ඇවිදින්න නම් පුලුවන් වෙන්න එපා. !!!

මේ ඔයා පේස් බුක් ඉන්නවද???

2011-01-25T16:54:00.001+05:30

අද කියන්න යන්නේ අපේ සෙට් එකේ බුවෙක්ට වෙච්ච සිද්දියක්.. ‍සිද්දිය වෙලා ගොඩක් කල් උනාට අපි නම් තාමත් මතක් කර කර හිනා වෙනවා.. පුද්ගලයාගේ නම් ගම් කියන එක හොඳ නෑනෙ.. මේකයි කතාව..

අපේ සෙට් එකේ පවුල් කාරයෝ වගේම ඉතිං වයසට ගිහිං පවුල් පන්සල් වෙන්න බැරි උන අයත් හිටියා.. බැජ් එකේ කෙල්ලොත් ඉන්න නිසා මේ කියන පුද්ගලයා බැලුවේ එහෙමවත් ගොඩ යන්න.. මිනිහා ටිකක් ලැජ්ජ කාරයා ( මේ මම වගේ :D ). කෙල්ලෙක්‍ ගෙන් කෙලින් අහන්න තරම් හැකියාවකුත් නෑ.. ඒ වගේම ඉතිං මනුස්සයා Facebook එකේ ක්‍රියාකාරී සාමාජිකයෙක්...

ඔන්න ඉතිං අපේ බැජ් එකෙත් ඉන්නවා මිනිහා ලයින් දාන කෙල්ලෙක්.. අපි නම දාලා තිබ්බබේ කෞෂලී කියලා.. පෙනුම නිකං අර ඉතිං ඊ‍ට පස්සෙ කතාවෙ ඉන්න කෞෂලී කියන කෙල්ල වගේ..

දවසක් ඉතිං සෙට් එකම ලයිබ්‍රි ඇවිත් එහෙමෙහෙ වෙන අතරේ මේ කෙල්ලත් යාලුවො එක්ක ආවා.. අපේ බුවා ඇතුලට ආවෙ නෑ.. අපි ‍පොත් අරං එනකොට මෑන්ස් ඔලුවේ අත ගහගෙන ඉන්නවා...

අපි ඉතිං බැලුවා මොකදෑ මේ කියලා..

අපි නැති අතරේ මෑන්ස් කෙල්ලට කතා කරලා.. මෙන්න මෙහෙමයි සිද්දිය..

බුවා මනමාල හිනාවක් දාගෙන කෙල්ල ගාවට ගිහිං.. දැකලා පුරුදු නිසාත්, කෙල්ලො සෙට් එක අපේ උං දන්න නිසාත්, මේකිත් මූ එක්ක හිනා වෙලා..

බුවා : මේ... ඔයා පේස් බුක් ඉන්නවද???

කෙල්ල : ආ ඔවු අනේ.. මම පේස් බුක් ඉන්නවා.. හැබැයි ඉතිං මගේ අකවුන්ට් එක හැන්ඩ්ල් කරන්නේ නම් මගේ බෝයි ෆ්‍රෙන්ඩ් තමයි..!!!

බයික් වල හරහට යන කෙල්ලන්ට.

2011-01-24T08:21:00.001+05:30

මම ඊයේ අත්දැකපු පුංචි සිදුවීමක් ගැනයි කියන්න ලේස්ති වෙන්නේ. වෙනදා වගේම මමයි යාලුවෙකුයි දවල්ට කෑම ගේන්න බෝඩිමෙන් පිටත් උනා.. ගිහින් කෑමත් අරන් බෝඩිමට එනකොට මහ පාරෙන් අතුරු පාරකට හරවන්න ඕනා. කොහොම හරි අපිට කලින් ඉස්සරහින් ගියපු කාර් එකක් අතුරු පාරට දැම්මා.. අපි දැන් කාර් එක පිටිපස්සේ..

ඉස්සරහින් සාමාන්‍ය ප්‍රමාණයේ වංගුවක් තියෙනවා.. පාර කොන්ක්‍රීට් කරපු එකක්. දෙපැත්තෙම බැමි බැඳලා නිසා වංගුවේ එහාපැත්ත පේන්නෙ නෑ.. එකපාරටම ඉස්සරහින් තව බයික් එකක් එනවා දැක්කා. කොහොම හරි කාර් එක දැකපු බයික් කාරයා කලබල වෙලා බයික් එක එකපාරම ගස්සලා හැරෙව්වා. ඒ එක්කම තමයි කවුරු හරි වැටෙනවා දැක්කේ.. මම නම් දැක්කේ බයික් එකේ පෙට්‍රල් ටැංකිය උඩ ගියපු පොඩි ළමයෙක් වැටෙනව වගේ.. යාලුවා දැකලා තියෙන්නේ බයික් එක උඩ ඉන්දන් ගියපු බල්ලෙක් වැටෙනවා වගේ..

කාර් එක නැවතුනා.. බැලින්නම් බයික් එකේ ඉඳන් ආපු කෙල්ලෙක්.. හෙල්මට් දාලත් නෑ.. දණහිස අල්ලගෙන කෑ ගගහ අඬනවා.. වැටුන පාර කෙලින්ම දණහිස තමයි කොන්ක්‍රීට් පාරේ වැදිලා තියෙන්නේ.. දැං ඉතිං මොනවා කරන්නද.. යාලුවා ගියා ත්‍රීවීල් එකක් ගේන්න. කොහොම හරි කෙල්ල ඇඳන් ඇවිත් තිබ්බෙත් අර තෙල් ගාලා වගේ බස්සන කලිසමක්.. දැං ඉතිං ඹහොම්මම යමුකො ඉස්පිරිතාලෙ..

මට කියන්න තියෙන්නේ මෙච්චරයි.. කෙල්ලොන්ට තමයි මේක වලංගු වෙන්නේ.. ඇඩ් එකට කවදාවත් බයික් එකක හරහට යන්න එපා.. අඩුම තරමෙ පාපැදියක වත්. මොකද එහෙම යනකොට බයික් එක පදින මනුස්සයටත් බැලන්ස් නෑ.. ඉස්සරහට වැටුන එකෙන් ඔහොම බේරුනා.. අනිත්පැත්තට වැටුනා නම් කෙලින්ම ඔලුව වදින්නේ..

පරිස්සම් වෙනවා නම් තමයි හොඳ.... හරි විදිහට ගියා නම් ගැටලුවක් නෑනෙ..

නව වසරට ඔවදනක්....

2010-12-31T22:34:00.001+05:30

මේ ලිපිය ලියන්නේ ඉවසීමේ සීමාව පැනලා තවදුරටත් පැන පැන යනවා දකිමින්. අපේ ගොඩක් අය කරන වැරැද්දක් ගැන පුංචි පහදාදීමක් කරන්නයි මම මේ හදන්නේ.

අපි සාමාන්‍යයෙන් අපිට එන ලස්සන කියන ඊමේල් ෆෝවඩ් කරනවා. සමහර වටිනා කියන දේවල් මටත් මේ විදිහට ලැබිලා තියේ. ඒවා ගැටලුවක් නෑ. ඒත් එක එක අයගේ බොරු වලට අහු වෙලා ඊමේල් ෆෝවඩ් කරන්න ඕන නෑ‍ නේද??

මේ ඊමේල් වල ලක්ෂණ කීපයක් තියේ..

බහුලවම යොදාගන්න එක තමයි මේ ඊමේල් එක මෙච්චර වෙලාවක් ඇතුලත යම්කිසි පුද්ගලයින් ගණනකට යැව්වොත් ඔබට හතර මහා නිධානය පහල වෙනවා කියන එක.

Don't open if u can't FWD... (IT'S REALLY EFFECTIVE) Mahalaxmi worth a try

Please send 10 copies and see what happens in 4 days.

You will definitely receive some good news in 48 hours!!!!

"Send this to at least 15 people ,and then press F6 ; the name of the person you love will appear..."

තවත් එකක් තමයි කාට හරි කරදරයක්, මුදල් ඕන කියලා ඉල්ලලා.. මුදල් එපා.. මේ ඊමේල් එක ෆෝවඩ් කරන්න. එකක‍ට අපි‍ට මෙච්චර ගානක් හම්බෙනවා කියන එක. (මේකෙ සත්‍ය අසත්‍යතාවය නම් මම දන්නෙ නෑ. දන්න කෙනෙක් ඉන්නවා නම් පැහැදිලි කරන්න)

" Bla bla bla.. Therefore we are asking for your help. For each forwarded email her parents will get 3 cents. Please help them and forward that email to as many people as you can! "

අනිත් ජාතිය තමයි පට්ටපල් බොරු දෙසාබාන ඊමේල්..

Norton Anti-Virus are gearing up for this virus!

Get this E-mail message sent around to your contacts ASAP.

PLEASE FORWARD THIS WARNING AMONG FRIENDS, FAMILY AND CONTACTS!

You should be alert during the next few days. Do not open any message with an attachment entitled 'POSTCARD FROM HALLMARK,' regardless of who sent it to you. It is a virus which opens A POSTCARD IMAGE, which 'burns' the whole hard disc C of your computer.

This virus will be received from someone who has your e-mail address in his/her contact list. This is the reason why you need to send this e-mail to all your contacts It is better to receive

this message 25 times than to receive the virus and open it.

If you receive a mail called' POSTCARD,' even though sent to you by a friend, do not open it! Shut down your computer immediately.

පුදුම ආදරයක් නේද තියෙන්නේ..

This is the worst virus announced by CNN.. It has been classified by Microsoft as the most destructive virus ever. This virus was discovered by McAfee yesterday, and there is no repair yet for this kind of virus. This virus simply destroys the Zero Sector of the Hard Disc, where the vital information is kept.

පේනවනේ ඇත්ත කියලා ඒත්තු ගන්වන්න කියල තියෙන දේවල්..

ඉතිං මේවා බලන අපේ හාවො (බනියා නෙමේ) හාවියො කරන්නේ මෙලෝ හෙවිල්ලක් බැලිල්ලක් නැතුව ඕක ෆෝවඩ් කරන එක. මුලින්ම පොඩ්ඩක් ඕවා ෆෝවඩ් කරන්න කලින් හොයලා බලන්න. අනිත් කාරණය තමයි ෆෝවඩ් කෙරිල්ල අත්‍යවශ්‍යමයි කියලා හිතෙනව නම් ඒකත් එක්ක ආපු ඊමේල් ඇඩ්‍රස් ටික මකන්න..

ඒ කියන්නේ මෙන්න මේ වගේ ඒවා.

ස්පෑම් කාරයෙක්ට මේ වගේ ඊමේල් ඇඩ්‍රස් ලිස්ට් එකක් මාර විදිහට ව‍ටිනවා. මට ආපු ‍මේ ඊමේල් එකේම ඊමේල් ඇඩ්‍රස් 500කට වඩා තිබුනා. ඇයි අපි ඊමේල් ෆෝවඩ් කරන ගමන් අපේ මිතුරු මිතුරියන් අමාරුවෙ දාන්නනේ..

අනිත් කාරණය තමයි සමහර ඊමේල් වල තියෙන්නේ තර්ජන.. මේක පැයක් ඇතුලත 10 දෙනෙක්ට නොයැව්වොත් උබ මැරෙනවා වගේ කතා තමයි කියන්නේ.. මම නං ජීවිතේකට ඕවා යවලා නෑ. මට මොකුත් වෙලත් නෑ..

අවසානයේ කියන්න තියෙන්නේ ඊමේල් ෆෝවඩ් කලාට කමක් නෑ. ඇඩ්‍රස් එකක් විතරක් To: කියන තැනට දාලා අනික්වා BCC විදිහට දාන්න. එතකොට කාටවත් ගැටලුවක් නෑ.

ආ ඒ අස්සේ තව පොඩ්ඩෙන් අමතක වෙනවා..

හැමෝටම සුබ නව වසරක් වේවා :)

බ්ලොග් ව්‍යාපාරික මල්ලිලා වෙත ලියමි..

2010-12-25T09:44:00.000+05:30

සිංහල බ්ලොග් කලාවේ නවතම නැම්ම බ්ලොග් ව්‍යාපාරික කලාවයි. පශ්චාත්භාගය ඉදිරියට යොමා නැමෙන්නේ කුපාඩිකමට බව අපි දන්නෙමු. නමුත් මෙහිදී නැම්ම යනු එකිනෙකා ඉදිරියේ නැමීම නොවන බව සිහිපත් කල යුතුය. පරිගණකය හෝ අන්තර්ජාලය යනු අපගේ පොකැට් එකට විදින එකක් මිස පොකැට් එක සරු කරන එකක් බව නම් ඒවා සොයාගත් එකෙකු වත් නොසිතන්නට ඇත. නමුත් ඒ මත පට්ටාපල් බොරු වෙමින් පවතී. සමහරවිට ආසියාවේ ආශ්චර්යය නිසා වෙනවා වන්නටද හැකිය.

තාක්ෂණයට අනුව අප්ඩේට් නොවන ඉස්කෝලේ උගන්වන හැටියට ලංකාවේ ප්‍රධාන අපනයන‍ බෝග ‍තේ, පොල් සහ රබර්ය. නමුත් ඒවාද ප්‍රධාන ආනයන බෝග වන්නට යන බැවින් ඕනෑවට වඩා විස්වාස නොකල යුතුය. මේ වෙලාවේ අපේ මෙන්ම රටේ වාසනාවට පිහිටට එන්නේ අපේ මේ බ්ලොග් ව්‍යාපාරික මල්ලිලා ටිකය. අනේ (අ)වාසනාවන්..

අතීතයේ අපි සල්ලි හොයන්නට මැද පෙරදිග ගියෙමු. නමුත් දැන් මැදපෙරදිග යන්නේ එක්කෝ හද්දා ඩොටේ එකෙකි.. නැතිනම් අමු මෝඩයෙකි. මෙතරම් පහසුවෙන් බ්ලොග් ව්‍යාපාර කල හැකිව තියෙද්දී අතින් පයින් වියදම් කර එක එකා‍ගේ කුණු අපුල්ලන්නට යන්නේ පශ්චාත්භාගයේ අමාරුවටදැයි සැක සිතේ. හැකිනම් බ්ලොග් ව්‍යාපාරික මල්ලියෙක් ලවා එසේ යන එකෙකුට අමාරුව හොඳ වන තෙක් මඩු වලිගයකින් තැලිය යුතුය. තලා මදිය. පලා ලුණු දැමිය යුතුය. ලුණු ගනන් නම් මූදු වතුරද අවුලක් නැත.

මේ යන ආකාරයට බ්ලොග් ව්‍යාපාර මගින් අප රට අංක එකට පැමිණෙනවා නොඅනුමානය. මේ අතර බක්ස් සයිට් ප්‍රධාන තැනක් ගනී. බක්ස් සයිට් කරන්නේ පිට රටවල් වල සල්ලි අච්චුගහන බුවාලා බව මා දැන ගත්තේ මේ මෑතකදීය. උන් අච්චු ගසනා සල්ලි වලට කරන්නට දෙයක් නොමැති බැවින් මේ බක්ස් සයිට් හදයි. හදා අප වැනි සංවර්ධිත රටවල බ්ලොග් ව්‍යාපාරික මල්ලිලාට ඒවායින් මුදල් ඉපයීමට අවස්ථාව ලබා දෙයි. ආන්ඩුවට ව‍ඩා අපේ විරැකියාව ගැන උන් වද වෙයි.. සිරාවට මේවා අසන්නට දකින්නට ඉපදිමද වාසනාවකි.

නමුත් ලංකාවේ බ්ලොග් ව්‍යාපාරික මල්ලිලාගේ එකම හතුරා වෙනකෙක් නොව ගූගල්ය. ඌට සල්ලි නැතිවාට ඉරිසියාවට අපේ කොල්ලන්ට ඇඩ් නොදෙයි. අනේ උගෙ බම්බුවෙ ඇඩ්. අපට අපේ බක්ස් සයිට් ‍හොඳය..

දැන් මෙය කියවන විට අර මොකක්ද තෘප්තියට බ්ලොග් ලියනා උංගේ ඇගේ මාළු නටනවා විය යුතුය. ආසාවේ නලියනවා විය යුතුය.. උබලාද පරක්කු නැත. අපේ වාසනාවට, බලා ඉගෙන ගන්නට අ‍පගේ බ්ලොග් ව්‍යාපාරික මල්ලිලා ඇත. මේ වන විටත් උන් හම්බ කරන්නේ තුට්ටු දෙකේ රුපියල් නොව ඩොලර් ය. එයද දහස් ගණනින්ය. ඒ නිසා තොපිද උන් ගුරු කොට උගත යුතුය. නැත‍හොත් තොපි මේ ආස්චර්යමත් රටේ දේශද්‍රෝහීන් වනවා නොඅනුමානය.

බ්ලොග් ව්‍යාපාරික මල්ලිලා අතර ගැවසී මාද ඉගෙන ගත් කරුණු කීපයක් ගුරු මුෂ්ඨි රහිතව ලබාදෙන්නට සිතුවෙමි. පින් තකා නොව මෙයින් මට ලැබෙන රිෆරල් ප්‍රමාණය නිසාය. ඒ මොනවාදැයි කියා මෝඩ ප්‍රශ්න අසන්නට සිතේ නම් කට පියාගත යුතුය. දෙන තරමට ලැබෙන බව මා උගෙන තිබීමද තොපේ වාසනාවක්ය. දහස් ගණන් වියදම් කර ඉගෙන ගත යුතු ඒවා තොපිට පිනට දෙන්නේ රට ගැන සිතාය. ඉගෙන ගැනීම ‍උබලාගේ වැඩක්ය.

බ්ලොගයක් තනා ඇඩ් පිරවිය යුතුය. ඒ අතරින් කොහෙන් හෝ කොපි කරන ලද ලිපියක් දෙකක් දැමිය යුතුය. එසේ කරන්නේ බ්ලොග් ව්‍යාපාර නාමයේ ගෞරවය තකාය.
බක්ස් මාමා කෙනෙක් කා‍ට හෝ සල්ලි දුන් විගස එහි ස්ක්‍රීන් සොට් එකක් ගත යුතු අතර පොටෝ සොප් දන්නා එකෙකු ලවා එහි ඇති අගයට බිංදු කීපයක් එකතු කල යුතුය. ව්‍යාපාරයට එන ජුන්නන්ගේ මොරාල් හදන්නේ එසේයග
බ්ලොගය ලෝඩ් වෙන්න හැට පැයක් ගත වුවද ගනන් නොගත යුතුය. මන්ද යත් ලෝඩ් වෙන වෙලාව අඩු ඌ පලියට අපට මුදල් නොලැබෙන බැවිනි.
ඒ අතර කොහෙවත් නැති අමාරුවට සින්ඩි කරන උන්ට බ්ලොග් ප්‍රචාරණය බාර දිය යුතුය. පිට රට ඇඩ්වටයිසිං කොම්පැනි වලට නිස්කාරනේ මුදල් නොගෙවිය යුතුය.
අලුතින් සොයා ගන්නා බක්ස් සයිට් හැමෝම අතර හඳුන්වා දිය යුතුය. (බක්ස් කාරයෝ ස්වභාවයෙන් ලැජ්ජාශීලි බැවින් උංගේ ලැජ්ජා නැති කරන චක්‍රලේඛයක් ගෙන ඒම ගැන ආන්ඩුව සලකා බැලිය යුතුය)

බ්ලොග් ව්‍යාපාරික මල්ලිලා‍ගේ වෙළඳ දැන්වීම් සලකන විට මීට අමතරව ජාතික වශයෙන් සිදුවිය යුත්තක්ද ඇත. වහාම බලපවත්වන පරිදි කාන්තා ඇඳුම් හා යට ඇදුම් පිළිබඳ අමාත්‍ය වරයාට බ්ලොග් ව්‍යාපාරික අමාත්‍ය තනතුරද ලබාදිය යුතුය. මේ දෙක බොහෝවිට බ්ලොග් ව්‍යාපාරික කරණයේ යන්නේ එකටය. මේවා නැත්නම් කරන එකා හොම්බෙන් යා හැකිය.

අවසානයේ මේ ටිකද කිව යුතුමය.

ඇත්තමයි මල්ලියේ උබලා ජාතික සම්පත්ය. තව අවුරුදු දහයකින් අපේ රට ලෝකයේ ධනවත්ම රට වීම නම් ගූගල් කාරයාට වත් නැවැත්විය නොහැකි බව අනිවාර්යය. රටේ මල්ලිලා මේ වගේ පෝසත් වන විට සතුටු වන්නේ අප වැනි දුප්පත් බ්ලොග් ලියන අයියලාය. යකුනේ අපි ගැනත් බලපල්ලා.. හික්..

කණියාගේ GPS හා SBU සුහද හමුවට පසුවදනක්

2010-12-20T10:58:00.000+05:30

හැමෝම සිංහල බ්ලොග් කරුවන්ගේ සංසදේ සුහද හමුව ගැන ලියද්දි කණියාටත් තමන්ගේ අදහස් ප්‍රකාශ කරානම් හොඳයි කියලා හිතුනා.

මුලිංම ඉතිං කතාව කියන්න එපැයි. සුහද හමුවට දවස් ගානක් තියං කණියා කට්ටිට සෙට් කරගෙන හිටියේ. අන්තිමට හැමෝටම එක එක වැඩ. කොහොම හරි කණියගේ මල්ලියි, තව cousin කෙනෙකුයි සෙට් වෙලා මීරිගමින් ආවේ. මගින් Confiuzd ප්‍රෝග්‍රැමර් ජෝඩුවත් සෙට්කරගත්තා. කොටුවෙන් නොහිතපු වෙලාවක හසී පවුලේ සෙට් එකම සැට් උනා. අන්න මරු සෙට් එක :D. ඉස්ටේසන් එක ගාවත් ටික වෙලාවක් වාත වෙලා කොහොම හරි කට්ටිටම බස් එකකට නැග්ගා.

මේ ඇවිල්ලා කට්ටිය කොටුවේ බස් හෝල්ට් එකේ.

එතන හිටපු කවුරුවත් පලවෙනි හමුවට ඇවිත් තිබ්බේ නැ.. ඉතිං කණියා තමයි දැං නඩේ ගුරා :D

නඩේ ගුරා වගේ නෙමෙයි දැං බස් එකට ටිකට් ගන්නත් එපැයි.. වැරැද්දක් කියන්න බැ ඉතිං හැමෝගෙංම සම්මාදං එකතු උනා. අන්තිමට කණියට ලාබයි.. :D

දැං කට්ටියම බස් එකේ යනවා. කවුරුවත් බිල්ඩිම තියෙන තැන දන්නේ නෑ. කෝකටත් කියලා කණියත් ජීවිතේකට වැඩක් නොගන්න GPS එක ඔන් කරගත්තා. ෂා.. ලස්සනට පාර පෙන්නනවා. ඔන්න නවලෝකෙ කියලා බස් එකත් නැවැත්තුවා.. කට්ටිය බහින්නත් ලේස්තිය. ඒත් හැබැයි GPS එකේ හැටියට නං නවම් මාවත තව ඉස්සරහා. කෝකටත් කියලා ඊලඟ හෝල්ට් එකෙංම බහින්න හිතුවා.

දැං ඉතිං බස් එක යනවා යනවා ඉවරයක් නෑ.. නවම් මාව‍තේ කෑලිත් නෑ .. කවුද අප්පා දන්නෙ බස් කාරයා GPS එකට ඕන තැන නවත්තන්නැ කියලා.. කොහොම හරි කට්ටිට බැස්සේ හෙන දුරක් ගිහිං..
පස්සේ තමා කණියට තේරුනේ මේකත් GPS එකේ තියෙන විසේස අංගයක් කියලා.. ඒක තමා "හෙවන සහිත හොඳම මාර්ගය සෙවීම"

කොහොමිං කොහොමිං හරි මීටර් 300 පාගමන කි‍ලෝමීටරේකට විතර දික් උනා.

කතාව තව තවත් දික් වෙනවා. හමුව ගැන අදහස් ප්‍රකාශ කරන්නත් එපැයි.
ඇත්තම කියනවා නම් Auditorium එකේ තව ටිකක් වෙලා හිටියා නං කණියා සීතලේ ගල් ‍ගැහෙනවා. කාලිංග අයියා ප්‍රශ්න තියේ නං අහන්න කියපු වෙලේ AC එක අඩු කරන්න බැයිද කියලා අහන්න හිතුනු වාර ගනන නම් අනන්තයි.

හමුවේ Agenda එක කලින් අපිට නොකියපු එක නම් ලොකුම අවුලක් වෙලා තිබ්බේ. මොකද අපි දන්නෙ නැ ‍මොනවා කතා කරනවද කියලා. කලින් කියලා තිබ්බා නම් ප්‍රශ්න ටිකක් හිතාගෙන වත් එන්න තිබුනා.

ගියපාර හමුව වගේම තමයි මේ පාරත් කීපදෙනෙක් කතා කලා මිසක් බොහෝ දෙනෙක් හැංගිලා වගේ හිටියේ. මීට වඩා කට්ටිය interactive උනා නං කියලා හිතුනා. අනික හැමදාම දේශන අහන අපිට ‍නිදාගන්න හොඳම කොයි වෙලාවෙද කියලත් කට්‍ටිය දන්නවනේ :D

කෑම ටික නං අගේ කරන්න ඕනා. ඒකට නම් Thumbsup.

කෑමට විසුරුවා හැරීමත් එක්ක කට්ටිය අයාලේ ගියා වගේ මට නම් දැනුනේ. ගියපාර හමුවේ ව‍ගේම ලොකු ලොකු අය එකට සෙට් උනා. පොඩි පොඩි උං අතරමං උනා. මමත් පුලුවං තරමින් හැමතැනම ඇවිදලා කට්ටියට කතා කලා. ඒත් සංසදේ ඇඩිමින්ලා නම් කට්ටියගෙන් ගොඩක් දුරස් වෙලා වගේ හිටියේ.

ඕවා තමා ඉතිං මගේ අදහස්. කට්ටියගේ පැමිණීම නම් ඉතා හොඳයි. 100කට ආසන්න ගානක් ඇවිත් හිටියා.

මම කටිටිය දිහා බලලා ආපු පුංචි නිගමන කීපයකුත් තියේ. ඒවත් කියලම දාලා යන්නං :D

මුලින්ම බනියා තමා අල්ල ගන්න්න ඕනා. සිරාවට මම හිතුවේ නෑ මේක මෙච්චර සයිස් එකෙක් කියලා. ඌ‍ Foss නිසා කෑමට සල්ලි හෙනට ඉතුරු වෙනවා ඇති.
හසි පවුල නං සිරා. මරුම සෙට් එකක් තමයි හිටියේ.
රචින්තයාගේ කට තමයි කට ..
වන්නි අයියාගේ ගියපාර තොප්පිය, මේ පාර ගෑනු ලමයි කොන්ඩෙට දාන බෑන්ඩ් එකක් වෙලා.. ඊලඟ පාර මොනවා වෙයිද මන්දා ..
කාලිංග අයියත් නෝනගෙ ක්‍රීම් ගාලද මන්දා ගියපාරට වඩා ටිකක් සුදුයි වගේ :D
වත්සලා අක්කා තමුන්ගේ කවර් එකට එයාගෙ නංගි ගෙනාපු එක තමා දවසේ සිද්ධිය.. Group පොටෝ එක බැලුවා නං කට්ටියට තේරෙයි..
තිස්ස දොඩං අයියාටත් හිතන තරං වයසක් පෙනුන්නෑ..
ගයන්ත නං ඇස්වහක් කටවහක් නැ හිටපු ගානමයි..

මම ගැන ඉතිං කමෙන්ට් වලිං කියන එකයි ඇත්තේ..

බුදු හාමුදුරුවොද හොඳ ජේසුස්වහන්සේද?

2010-12-10T11:12:00.001+05:30

මුලින්ම කියන්න ඕනා කිසිම ආගමකට නිගරුකිරීමේ අදහසකින් නෙමෙයි මම මේ ලිපිය ලියන්නේ. මේක මම අත්දැකපු පුද්ගලික සිදුවීමක්.

වෙනදා ව‍ගේම තමයි මම බ්‍රහස්පතින්දා හවස ගෙදර එන්න මොරටුවෙන් බස් එකට නැග්ගා. කොහොමත් මොරටුව පිටකොටුව බස් වල සෙනගත් අඩුයි. මෙහෙම යනකොට ගොලුමඩම හන්දියෙන් විශේෂ කට්ටියක් බස් එකට නැග්ගා. මුලින්ම නැග්ගේ අන්ධ ළමයෙකුයි එයාගේ තාත්තයි. ඒත් එක්කම පෙනුමින් වයස 18ක විතර ‍බිහිරි ගෑනු ළමයෙක් එයාගෙ තාත්තා එක්ක නැග්ගා. නැගලා වාඩි උනේ මට ඉස්සරහා සීට් එකේ. මේ දෙන්නාම රත්මලාන අන්ධ විද්‍යාලයේ ළමයි.

ඇත්තටම මේ අන්ධ විද්‍යාලයේ මේ වගේ ළමයි විශාල ප්‍රමාණයක් ඉන්නවා. අපිත් දවසක් මේ අය එක්ක ගත කලා. ඒ අපේ පලමු වසර් ශ්‍රමදානයකදී. ඉතින් ආපු වෙ‍ලාවේ ඉඳන් ඒ ළමයා බොහොම ආසාවන් වටපිට බලනවා. තාත්තාට එක එක ඒවා තමන් දන්න විදිහට කියන්න උත්සාහ කරනවා. තාත්තත් එයාගේ අල්ලේ අකුරු ලිය ලිය පුලුවන් විදිහට ළමයාට උත්තර දෙනවා. මේ විදිහට යනකොට බස් එක ලොකු පල්ලියක් පාස් කලා. ඒත් එක්කම ළමයා තාත්තා දිහාට හැරිලා තමන්ගේ සිරුරේ කුරුසය ස‍ටහන් කරලා අත මිට මොලවලා මහපට ඇඟිල්ල උස්සලා (Thumbsup) තාත්තාට කියනවා ‍ජේසුස්වහන්සේ හොඳයි කියලා.

තාත්තා එකපාරටම ඔලුව දෙපැත්තට වනලා නෑ කියලා කියනවා. මට ඒකෙන් වැටහුනා තාත්තා බෞද්ධයෙක් වෙන්න ඕනා කියලා. ඊට පස්සේ තාත්තා අත්දෙක එකතු කරලා වඳින විදිහ පෙන්නලා ඒත් එක්කම විතර්ක මුද්‍රාව පෙන්නලා කියනවා නෑ බුදුන්වහන්සේ හොඳයි කියලා. සමහර විට අපි ගොඩක් බුදුපිලිම වල විතර්ක මුද්‍රාව දකින නිසා වෙන්න ඇති ඒ තාත්තා එහෙම පෙන්වන්න ඇත්තේ.

ඒත් ළමයා පිලිගන්නෙ නෑ. ආයෙත් කුරුසය සටහන් කරලා අතමිට මොලවලා මහපට ඇගිල්ල උස්සලා එයා හරි කියලා පෙන්වනවා. මේ වෙලාවේ තාත්තා වැරදි නමුත් උපහාසාත්මක වැඩක් කලේ. තාත්තත් කුරුසය සටහන් කරනවා වගේ පෙන්නලා අන්තිමට ඔලුවට ඇගිල්ල තියලා අතින් පෙන්වනවා ඔලුවේ මොකුත් නෑ කියලා. ‍බෞද්ධ පියෙක් විදිහට තමන්ගේ ආබාධිත දරුවාට එයා වැරදියි කියන්න උත්සාහ කරපු හැටි නම් අගය කරන්න ඕනා. ඒත් අනිත් ආගමකට අපහාස කිරීමේ අදහසින් කරා නම් ඒක වැරදියි. ‌මේ වගේ ළමයින්ට හරි මොකක්ද වැරදි මොකක්ද කියන එක ගැන හරි වැටහීමක් නෑ. තාත්තා උත්සාහ කලේ ළමයාට හරි ‍දේ වටහාදෙන්න.

ඉතින් මම මග එන ගමන් කල්පනා කලේ උපතින් බෞද්ධ දරුවෙක් මේ ‍වගේ වෙනස් වෙන්න හේතු මොනවද කියලා. ගොඩක් දුරට මගේ හිතට ආපු කාරණය තමයි මේ ළමයින්ව හැමෝම අතරඇරලා දාලා තියෙන එක. සමහර විට හාමුදුරු කෙනෙක් නොදකිනවා වෙන්න ඇති. අනික හාමුදුරුවරු තෑගි අරන් එන්නෙ නෑ. ඇත්තටම මේ ළමයින්ගේ නොහැකියාවන් නිසා එයාලට ධර්මය ඉගෙන ගැනීමේ හැකියාවක් නෑ. මොකද ඊට කලින් ලියන්න, ලියපු දෙයක් තේරුම්ගන්න ඉගෙන ගෙන ඉන්න ඕනානේ. ඒත් පල්ලියකින් ලැබෙන තෑග්ගක් නිසා මේ වගේ ළමයින්ට උපතින් ලැබුනු දායාදය අමතක වෙන්න පුලුවන්. ඇත්තටම මේක කණගාටුවට කරුණක්. ළමයාගේ පැත්තෙන් වැරැද්දක් නෑ. මම නම් හිතන්නේ බෞද්ධයන් කියලා කියන අපේ අතේ තමයි මේ වගකීම තියෙන්නෙ කියලා.

බ්ලොග් අවකාශයේ පොරක් වීමට කැමතිද? වහාම කියවන්න.

2010-12-06T08:42:00.001+05:30

කැපි පෙනීමේ අවශ්‍යතාවය මිනිසාගේ පමණක් නොව ඈත අතීතයේ සිට පැවතෙන සතා සිවුපා‍වාට පවා වලංගු දෙයක්. ඇයි අපි මේ බ්ලොග් ලියන්නේ.. මගේ අදහසට අනුව සරළව කියනවා නම් අපි බ්ලොග් ලියන්නේ සයිබර් අවකාශයේ අපිත් එක්ක ඉන්න කට්ටිය අතරේ පොරක් වෙන්න. හොඳ පොරක් අර්ථදක්වන්නේ කොහොමද? සාමාන්‍යයෙන් බජාර් එකේ ඉන්න හොඳ පොරක් ඕනම කෙනෙක් අඳුරනවා. කොතන බැස්සත් වටේට කට්ටිය ඉන්නවා. වැඩ වල මූලිකත්වය ගන්නවා. ගෙදරට කට්ටිය එනවා.. සැප දුක බලනවා.. ඕවා තමා. බලන්න බ්ලොග්කරණයේ පොරකටත් මේවා අදාලයි නේද??

කවුරුහරි කියනවා නම් අනේ මට නං පොරක් වෙන්න කිසිම අවශ්‍යතාවයක් නෑ.. මම මේ මගේ ආත්ම තෘප්තියට බ්ලොග් ලියන්නේ.. බ්ලා බ්ලා.. ඒ ඔක්කොම හරි. පොරක් වෙනවා කියන්නේ පට්ටම ආත්ම තෘප්තියක් ලැබෙන දෙයක්. වැඩේ කියන්නේ අපි ඒකට පාවිච්චි කරන වචනේ වෙනස්.. මම ඔයාට තණ්හාවයි කියලා කෙල්ලෙක්ට කිව්වොත් කෙල්ල මොනවා කියයිද?? ඒත් මම ඕයාට ආදරෙයි කිව්වොත් ඒ තරං අවුලක් නෑ නේද? ඒ වගේ තමා.

ටැබූ අමුතු ඒවා ලියන්නෙත්, කතන්දර අයියා හැමදාම කතන්දර ලියන්නෙත්, වැප් ‍ලෝකෙ නැති බොරු කියන්නෙත්, බුද්ධි කෙහෙල් කොටුවේ චූටි මහත්තයා උනෙත්, චමිල මට නොතේරෙන බහුබූත ලියන්නෙත්, පහන් ලෝකෙ තියෙන හැම බ්‍රවුසරේටම Extension හදන්නෙත්, ධනික ebay ගැන ලියන්නෙත්, මම කොම්පියුටර් හාඩ්වෙයා ගැන ලිව්වෙත් ඔන්න ඔය උඩ කියපු දේ නිසා තමා. (තරහා අවසර. මම ආසම බ්ලොග් ටිකක් තමා උදාහරණ වලට ගත්තේ )

ඔය ඇවිල්ලා අමාරුවෙන් පොරක් වීමේ ක්‍රම.. ඇයි අප්පා ලේසි ක්‍රම තියන් අමාරු පාරවල් වල යන්නේ. එකක් තමයි මොකක් හරි නමක් හදාගෙන බ්ලොග් වලට ගිහින් කුනුහරුප කමෙන්ට් දාන එක.අනික තමයි බ්ලොග් කොපි කිරිල්ල. මේ වගේ අයට පින් දෙන්න ඕනා. මොකද අපිට කෙලින්ම පොරක් වීමේ මාර්ගය මෙයාලා විවෘත්ත කරලා දෙන නිසා. බ්ලොග් කොපි කරන ‍එකෙක් නම් ඌ‍ට විරුද්ධව බ්ලොග් පෝස්ට් එකක් මුලින් දාන්න ඕනා. ඒක ටික දවසක් මාකට් කරන ගමන් ඌට මොකද උනේ කියන එකත් බලන්න. මිනිහාගේ වෙනසක් තියේ නම් වහාම නැවත පෝස්ට් එකක් දාන්න ඕනා. ඊට පස්සේ මිනිහා එක්ක බැනගත්තුවා අපිට ආපු නිර්ණාමික කමෙන්ට් වගේ ඒවා ප්‍රසිද්ධ කරන්න ඕනා. ඒ එක්කම මේ හැම පෝස්ට් එකකටම වැප් කියනවා වගේ ආකර්ෂණීය මාතෘකා දාන්නත් ඕනා. :D

හැමෝටම ඉතිං ඔහොම චාන්ස් අහු වෙන්නෙ නෑනෙ. ඉතිං ඒකට මගේ යෝජනා කීපයක් තියේ. මේවා අනුගමනය කලොත් අනිවාර්යයෙන් ඔබත් සයිබර් අවකාශයේ පොරක් වීම කාටවත් වලක්වන්න බැ.

හැකිතරම් වලි/ බාල්දි/ බකට් ගැන ලියන්න. ලියන්නම නැතිනම් අල්ලපු ගෙදරට ගලක් ගසා හෝ වලියක් ඇදගන්න.
ලියන එකට කමෙන්ට් නැතිනම් වහාම කමෙන්ට් මැවීමේ පියවරට යන්න. ලිපියේ ජනප්‍රියතාව එකවර ඉහල යනු ඇත.
හැකිනම් නාහෙට නාහන බ්ලොග්කරුවන් කීපයක් වලියට ඈඳාගන්න. ඔබගේ පොරත්වය තවත් ඉහල යනු ඇත.

මේ වගේ දේවල් කරන අතරේ අලුත් බ්ලොග් හදන මල්ලිලාට නංගිලාට එහෙමත් පුංචි ඇඩ්වයිස් එකක් දෙන්න කැමතියි. ඔයාලගේ බ්ලොග් පටන් ගත්තු ගමන් සෙනග එන්නේ නෑනෙ. එකට කරන්න තියෙන්නේ මෙච්චරයි. Facebook, Buzz, Twitter යන්න. ගිහින් දාන්න මෙන්න මේක.

ලංකාවේ ජනප්‍රියම [බ්ලොග් එකේ නම] බ්ලොග් අඩවියේ නොමිලේ දැන්වීම් දැමිමට ඔබටත් අවස්ථා...
දැන්වීම් සීමා සහිතයි.

ලාබෙට කුලියට ඉන්න ක්‍රමය.. [සියලු බෝඩිං කාරයන් වෙතයි..]

2010-12-05T09:13:00.000+05:30

මේක මම කෝච්චියේ එනකොට සිදුඋන සිද්ධියක්.. ගොඩක් අය දන්නව ඇති කොටුවෙන් 5.10ට යන කුරුණෑගල සීඝ්‍රගාමී දුම්රිය ගැන. මේකත් රනිල් මහත්තයා හම්බුන දවසෙම උන සිද්දියක්.

මම ඉතිං සාමාන්‍යයෙන් ගමන් යන්නනේ තනියම තමා. ඉතිං එහෙම යනකොට කරන්න වැඩකුත් එපැයි. ඉතිං වටපිටාව නිරීක්ෂණය කරන ගමන් මම එනවා. මට එහාපැත්තේ හිටියේ උසස් අධ්‍යාපන කටයුතු ඉවර කරලා රැකියා පුහුණුවීම් වලට වගේ යන කට්ටියක්. මේ ඉතිං එයාලගෙ කතාවක් තමා.

පුද්ගලයා 1 : බෝඩිං වෙලා ඉන්න එක එපා වෙනවා බං.. මාසෙට තිස්දාහක් ගෙවනවා අපි හය දෙනෙක්..

පුද්ගලයා 2 : අපෝ උඹලා කුලියටද ඉන්නේ?? ෂෙහ් කවුද බං එහෙම ඉන්නේ.. අපි නං මාසෙට ගෙවන්නේ‍ හයදෙනාටම පහලොස්දාහයි..

පුද්ගලයා 1 : අඩේ ඒ කොහොමද බං එච්‍චර අඩුවට ඉන්නේ..

පුද්ගලයා 2 : කොහෙද.. උබලා ඉන්නෙ කුලියටනේ.. අපි නම් ඉන්නේ බද්දට. ඒක ලාබයි.

පුද්ගලයා 1 : හා කියහං බලන්න කොහොමද ලාබ වෙන්නෙ කියලා??

පුද්ගලයා 2 : බලපං උබලා තිස්දාහ ගානෙ අවුරුද්දකට තුන්ලක්ෂ හැටදාහක් ගෙවනවා. අපි නං මුලිං එක්ලක්ෂ අසූදාහක් ගෙව්වා. එතකොට‍ මාසෙට ගෙවන ගාන අඩු වෙනවා. ඒක තමා බද්දට ගන්නවා කියන්නේ.

ඉන්න සෙට් එකම : ඉතිං බං උබලත් තුන්ලක්ෂ හැටදාහම ගෙවනවනෙ බං :D

පුද්ගලයා 2 : ඒ උනා‍ට මාසෙට ගෙවන ගාන අඩු වෙනවනෙ බං.. එක ලාබයි.. උබලට තේරෙන්නෑ..

පුද්ගලයා 1 : කොහෙද බං ලාබ.. උබලා බාගයක්ම කලිනුත් දීලනෙ.. උබලට පාඩුයි බං..

පුද්ගලයා 2: ඇ.. ඒකත් එහෙමද...

එයා කියපු දේ හරියට කියඋනේ නැද්ද මන්දා.. මට නං ඇහුනෙ ඔහොම තමා. කොහොම හරි වටේම මිනිස්සු හිනාවෙන්න නම් ගත්තා.

එහෙනම් පසුව හමුවෙමු..

කණියාගේ රනිල් වික්‍රමසිංහයන් බැහැ දැක්ම

2010-12-04T17:53:00.000+05:30

මුලින්ම කියන්න ඕනා මේක තවත් එක තාක්ෂණික ලිපියක් නම් නෙමෙයි. එක්තරා සිද්ධියකින් පස්සේ මමත් මගේ බ්ලොග් එක තාක්ෂණික දේවල් වලට පමණක් සීමා කිරීම නවත්වන්න තිරණය කලා. මටම තේරෙනවා ඒක ඒකාකාරියි කියලා.

සතියෙම මහන්සි වෙලා පාඩම් වැඩ කරලා කණියත් සිකුරාදා හවස ගෙවල් පැත්තෙ එන්න පිටත් උනා. කොටුවේ ස්ටේසමට එනකොට හුරුපුරුදු මූණු ටිකක් පේන්න තිබුනා. තිස්ස අත්තනායක මහත්තයා කට්ටියක් එක්ක පත්‍රිකා බෙදනවා. කණියත් ඉතිං එදා ඉඳංම අලියා නිසා එතනිංම ගිහිං අර කොලේකුත් ඉල්ලං ස්ටේසම අස්සට රිංගුවා. ඒ අස්සේ අහලිං ගියපු මනුස්සයෙක් කණියට හෙන බැරෑරුම් මූණක් පෙන්නලා "තිස්ස අත්තනායක" කියලා කියනවා. මාත් ඉත්ං "හම් හම්" කියං හිනාවකුත් දාගෙන ඉස්ටේසමට සේන්දු උනා.

ඉස්ටේසමේ එකම කාලගෝට්ටියක්. අයවැයට විරුද්ධව කෙරෙන පුංචි උද්ගෝෂණයක්. කණියා ඔය වගේ ඒවට ‍කොහොමත් නැති නිසාත්, තඩ් බඩගින්නක් තිබ්බ නිසාත් ආපු ගමන් කැන්ටිමට තමා රිංගුවේ. කොහොම හරි කාලා එලියට එනකොට මූණටම මුණ ගැහුනෙ නැතෑ රනිල් මහත්තයා. ගොඩක් අයට මේක වි‍ශේෂ සිද්දියක් නම් නෙමෙයි. ඒත් කණියා නම් පොඩ්ඩක් විතර ගැස්සිලා ගියා. එසේ මෙසේ මනුස්සයෙක් නෙමෙයිනේ.. එක්සත් ජාතික පක්ෂේ නායකතුමානේ...

මාත් ඉතිං හැබැහිං එච්චර ලඟට කවදාවත් මනුස්සයාව දැකලා තිබ්බෙ නැ. හැබැයි එහෙම හරි දැකගන්න ලැබුන එක ගැන සතුටු වෙනවා.

ඇත්තටම මේ ‍ව‍ගේ දේශපාලන නායකයෝ පාරට බහිනවා නම් සාමාන්‍ය මිනිස්සුන්ට එන කික් එක ගැන අමුතුවෙන් කියන්න ඕනා නැ. එවෙලෙ වෙලාව 4.30 ට ඇති. ඔක්කොම වගේ හිටියේ වැඩ ඇරිලා එන මිනිස්සු. ගොඩක් අයගේ මූණු වල මහන්සියක් දැක්කෙ නෑ. මම දැක්කෙ ලොකු පිබිදීමක්. ඇත්තටම නාය‍කයෝ මිට වඩා මිනිස්සු ගැන හොයන්න ඕනා. කොහොමින් කොහොමින් හරි කණියා ගෙදර එන කෝච්චියත් ආවා. කෝච්චියේ එන ගමන් කණියට මතක් උනේ එක දෙයයි.

ඇත්තටම මේ දේශපාලඥයෝ මෙතෙක් දුන්නු පොරොන්දු ඉටු කරා නම්...

Project Hovercraft | වායුපායානයක් හදමු - 3

2010-11-08T17:51:00.002+05:30

අද නම් පෝස්ට් එක අනිවාර්යයෙන් ඉවර කරන්න පොරොන්දු වෙලා තමයි පටන් ගන්නේ :)
මේපාර අපි පලවෙනි ටෙස්ටින් එක කලේ automobile ලැබ් එක ඇතුලෙමයි. මේ පාර ස්ටාට් කරපු වෙලාවේ අපි මෙච්චර දවසක් වැඩි අවධානයක් යොමු නොකල Skirt එකේ ගැටලුවක් තියෙන බව පෙනුනා. අපි දාපු skirt එක දිග වැඩියි, ඒ වගේම හුලං පිරුනම පිටට පනිනවා.

ඉතින් කට්ටිය තීරණය කලා තවත් පරීක්ෂණ වලට කලින් Skirt එකේ ගැටලුව විසඳන්න ඕනා කියලා. ඉතින් ආයෙත් නූල් ඉඳිකටු ගෙනත් skirt එක කොට කරලා තව ඇතුලට වෙන්න මැහුවා.

ඔන්න ඒ පාර එලියට අරන් දෙවනි ටෙස්ටින් එක කලා..

හැමදාම කොතනින් හරි කැඩෙනව වගේ මේ පාර කැඩුනේ Fan එක. Fan එකට තියෙන ප්‍රතිරෝධය වැඩිවීම තමයි මේකට හේතුව. Fan blade එක ඒ සොකට් එකට සම්බන්ධ වෙලා තිබ්බේ රබර් බුෂ් දෙකකට හිර කරලා. අන්න ඒවා තමයි ගැලවුනේ.

ඒ පාර අපි Fan එකට බාස් වැඩක් දාලා කොහොම හරි ඒක හදාගත්තා. හදලා ස්‍ටාට් කලා විතරයි ආයෙත් එතනින්ම කැඩුනා. අපි හරියට වෙල්ඩින් කරලා තිබ්බෙ නෑ. ‍ මේ තියෙන්නෙ කැඩුන එකේ පොටෝ එකක්..

මේකත් ආයෙ වෙල්ඩින් කරගෙන කරගෙන කැඩෙන්න බි‍‍ඳෙන්න තියෙන තැන් ටිකත් හරියට චෙක් කරගෙන ඔන්න දෙයියනේ කියලා එන්ජිම ස්‍ටාට් කලා.

Hovercraft එකේ balancing පොඩි අවුලක් නිසා පැත්තට යනවා. ගොඩක් දුරට skirt එකේ එක පැත්තක උසේ වෙනසක් නිසා වෙන්න පුලුවන්. කට්ටියට බලාගන්න පුලුවන් තුන්දෙනෙක් එකතු වෙලා උස්සපු hovercraft එක මම ඇඟිලි වලින් තල්ලු කරන හැටි. :D

අපේ Project එක යම් පමණකට සාර්ථකයි. ඒත් අපේ බලාපොරොත්තුව තිබ්බේ ‍එක පුද්ගලයෙක් වත් අරන් යන්න පුලුවන් මට්ටටමේ එකක්. ඒත් ඒ ඉලක්කයට ලඟා‍වෙන්න අපිට බැරි උනා. අපිට අඩුවෙන්ම තිබ්බ දේ තමයි කාලය.

හරි. දැන් ආයෙත් අපි මේකෙ පාවෙන්නෙ කොහොමද බලමු. Hovercraft එක යට තියෙන skirt එකේ එකතු වෙලා තියෙන වාතයේ පීඩනයෙන් තමයි පාවෙන්නේ. මේකෙ deck එකේ (තට්ටුවේ) වර්ගඵලය වැඩි වෙන්න වැඩි වෙන්න ලබා දෙන්න ඕන පීඩනය අඩු වෙනවා. ඇත්තටම අපි මේකට ගෙනාවේ මීට වඩා ‍ලොකු MDF board එකක්. ඒක පාවිච්චි කරා නම් මේ ගැටලුව එන්නෙ නෑ. මම ඉඩ දෙන්නෙ නෑ කියලා දන්න නිසා මම නැති වෙලාවක හිරෝෂ් බෝඩ් එක wood workshop එකට උස්සං ගිහින් කපලා තිබ්බා. නැත්තං දාන්න හිටියේ අඩි 6x4 බෝඩ් එකක්. අවසානයේ දැම්මේ අඩි 5x3 බෝඩ් එකක්. ඒ වගේම තමයි අපේ skirt එක ඇතුලට කරලා මහලා තිබ්බේ. ඒ‍කෙන් hovercraft එක බිම වදින වර්ගඵලය තවත් අඩු වෙනවා.

අපේ hovercraft එකට කිලෝ 50ක විතර අතිරේක බරක් ( එන්ජිමේ හා ඉතිරි කොට‍ස් වල බරට අමතරව) දරාගෙන පාවෙන්න හැකියාව තිබ්බත් ඒ බර තියෙද්දී එන ප්‍රතිරෝධය දරාගැනීමට හැකි තරම් ශක්තිමත් fan එකක් අපිට හොයාගන්න බැරි උනා. අපි මේකට පාවිච්චි කලේ AC මැෂින් එකක condenser එකක fan එකක්. ඒ නිසා තමයි එකපාරක් Fan එකේ රබර් බුෂ් ගැලවිලා ගියේ.

ඒ වගේම තමයි අපිට Hovercraft එක ඉදිරියට ගමන් කරවන්න යාන්ත්‍රණයක් යොදන්න බැරි උනා. තව දවස් 4ක් ලැබුනා නම් ඒකත් කරනවා.

මේ Project එකේදී අපිත් එක්ක හිටපු කට්ටිය අමතක කරන්න බෑනේ..

වමේ ඉදන් දකුණට කියනවා නම් නිකට අල්ලන් අනේ අපොයි කියන්න ඉන්නේ අපේ බාස්. වෙලාවකට ඇණයක් උනත් ප්‍රොජෙක්ට් එකට මාර විදිහට මහන්සි උනා. බාස් කියන නම වැටුන හැටි පලවෙනි පෝස්ට් එකේ තියේ :D.

ඊ‍ට පස්සෙ ඉන්නේ අපේ C4 දීගල. නම හැදුනේ වෙන මොකක් වත් නිසා නෙමෙයි, මෙයාගේ N73 එකේ පිටින් battery Pack එකක් තියෙනවා. හරියට C4 පුපුරණ ද්‍රව්‍ය වගේ. කොටි කේස් කාලෙ මිනිහව බස් එකක දැක්කා නම් බෝම්බ අරන් යනවා කියලා අල්ලන් යනවා :D

ඊලඟට ඉන්නේ චතුර. මෙයා ගැන විස්තර ලියන්න වෙනම පෝස්ට් එකක් දාන්න‍ වෙනවා :D

චතුරට එහායින් ඉන්නේ මොහොමඩ් නියාත්. වැඩ බෙදාගෙන කරන්න ඕන නම් අහන්න ඕනා නියාත් ගෙන් :D

ඊලඟටම ඉන්නේ ඉතිං මම තමා. :D මට එහායින් ඉන්නේ හිරෝෂ්. Project ‍එකේ අයිඩියා එක ආවේ හිරෝෂ්ගෙන් තමා. හැබැයි මේක හරි නොගියා නම් බෙල්ල ගහල යන්නෙත් මිනිහගෙම තමා.

ඊලඟට ඉන්නේ ජීවරාසා. මෙතන ඩිල්ෂාන් නෑ. එයාවත් මතක් කරන්න ඕනා.

පසුව ලියමි

අපේ Hovercraft එක පැත්තට යන්න ‍හේතුව පස්සෙ තමයි මට මීටර් උනේ. මේක පැහැදිලි කරන්න ලේසී helicopter එකක් උදාහරණයට ගත්තා නම්. අපි දන්නවා helicopter එකක main rotor එකට අමතරව tail එකේත් rotor එකක් තියේ.

දැං මේකෙ ලොකු තටුව දකුණට කැරකෙනකොට හෙලිකොප්ටරේ බඳ වමට කැ‍රකෙන්න බලනවා. ( හෙලිකොප්ටරේ ගුරුත්ව කේන්ද්‍රය වටේ) ඉතිං ඒක වලක්වන්න ඒකට ප්‍රතිවිරුද්ධ ව්‍යාවර්ත බලයක් දෙන්න තමයි tail rotor එකක් දාන්නේ. මේකම තමයි අපේ hovercraft එකට උනේ. fan එක කැරකෙන්නේ දක්ෂිණාවර්තව. ඉතිං hovercraft එක වම් පැත්තට කැරකෙන්න බලනවා. ඒ වගේම එන්ජිම කැරකෙන පැත්තට විරුද්ධ පැත්තටත් කැ‍රකෙන්න බලනවා.ඒකයි එක පැත්තකට පහත් වෙන්නේ. ගැටලුව තමයි ඒ දෙකම එකම පැත්තට සෙට් උන එක :D

Project Hovercraft | වායුපායානයක් හදමු - 2

2010-11-01T17:52:00.001+05:30

අපේ Hovercraft project එකට ගොඩාක් හොඳ ප්‍රතිචාර ලැබිලා තිබුනා. ඒ හැමෝටම ස්තුතියි. කලිං ලිපියේ hovercraft එක හදන විදිහ තිබ්බත් ගොඩක් අයට skirt එක ගැ‍න හරියට තේරිලා තිබ්බේ නෑ. ඒ නිසා ඒක ගැන මුලින්ම පැහැදිලි කරලා ඉන්නම්. මේක පැහැදිලි කරන්න මම hovercraft එකේ මොඩ්ල් එකක් කාඩ්බෝඩ් වලිං මේ දැං හැදුවා. මේ තියෙන්නේ hovercraft එකේ යට පැත්ත.

Skirt එක තමයි සුදු කඩදාසියෙන් හදලා තියෙන්නේ. සාමාන්‍ය ගෑනු ලමයි අඳින skirt වගේ නෙමෙයි. මේකෙ අග හරිය ඇතුලට වෙන්න මහන්න ඕනා. රෙද්දේ ශක්තියත් අවශ්‍ය වෙනවා. ඩිජිටල් ප්‍රින්ට් වලට ගන්න රෙදි තමයි අපි පාවිච්චි කලේ. පුංචි hovercraft එකක් නම් ඉටි කොලයක් උනත් ගැටලුවක් නෑ. දැං මේක අනික් පැත්ත හැරවුවාම skirt එක පොලවේ වදිනවා. hovercraft එකේ deck එකයි පොලවයි අතරේ air bag එකක් විදිහට මේක දැං වැඩ කරනවා.

අපේ Hovercraft එකේ skirt එක පේන්නෙ නෑ කියලා ගොඩක් අය පැමිණිලි කරලා තිබ්බා. මේ පොටෝ එකේ වටේට සුදු පාටින් පේන්නේ skirt එක. ඒක hovercraft එකට යට වෙලා තියෙන නිසයි පේන්නේ නැත්තේ.

මේ අපි ටෙස්ටින් වලට hovercraft එක ගෙනාපු වෙලාව. ඔන්න ඉතිං දෙවියන් බුදුන් සිහි කරලා එන්ජිම start කලා. එන්ජිම නම් start උනා. ඒත් ‍fan එක කැ‍රකෙනවත් එක්කම රබර් බටේ bevel unit එක ගාවින් slip වෙන්න ගත්තා. එතන shaft එක අර වැකුම් බ‍ටේ සිදුරට වඩා පොඩි එකක් තිබ්බේ. අපි කලේ යකඩ shaft එකේ tape එකක් ඔතලා වැකුම් බටේ හිර කරලා අර pipe clip දාපු එක. ඒත් ඒක හරි ගියේ නෑ. කැරකෙන්න ගත්තු ගමන් ටේප් එක උණු වෙලා ගියා. ඉතිං ඒපාර මේකට යකඩින් වෙනමම බුෂ් එකක් ලියෙව්වා.

ඔන්න දැං ඒකත් හරි. ආයෙත් ඔක්කොම සෙට් කරලා එන්ජිම start කලා. කවුරුවත් කිව්වට විශ්වාස නොකරන දෙයක් උනේ. අපි හීනෙකිං වත් නොහිතපු විදහට Hovercraft එක පා වෙන්න ගත්තා. ඉස්සරහා පැත්ත බර අඩු නිසා මුලින්ම උඩ ගියේ ඒ පැත්ත. ඒ එක්කම එන්ජිම පැත්තත් අඟල් 3ක් විතර උඩ ගියා. හැබැයි තත්පර 5ක් වත් මේ විදිහට තිබුනේ නෑ.

මම මුලින් කිව්වා මතක ඇති අපි එන්ජිමයි ‍fan එකේ bevel gear unit එකයි සම්බන්ධ කරන්න ගත්තේ බස් වලට එන වැකුම් බටයක්. කොච්චර හයියට මේක පෙනුනත් ඇතුලින් එන Pressure එකකට මිසක් Torque එකකට එහෙමත් නැත්තං ව්‍යාවර්ත බලයකට මේක ඔරොත්තු දෙන්නෙ නෑ. තත්පර 5ක් විතර ගියපු ගමන් එන්ජිම ගාවින් බටේ ඇඹරිලා කැඩිලා ගියා. Video එකක් නොගත්තු එක ගැන නම් අදටත් දුක් වෙනවා. මේ ති‍යෙන්නේ කැඩුනට පස්සෙ තිබ්බ විදිහ. මේක ඇවිල්ලා අර වැකුම් බටේ විසි උනාට පස්සෙ ඒක නිකං සෙට් කරලා එන්ජිම ස්ටාට් කරා. එවෙලෙ ගත්තු වීඩියෝ එකක පොටෝ එකක්. මෙතන අපි පස්සෙ දාපු යකඩ බුෂ් එකත් බලාගන්න පුලුවන්.

කොහොම හරි අපි තීරණය කලා වැකුම් බටේ අයින් කරලා දාන්න. ඇත්තටම ඒක එන්ජින් එකෙන් දෙන torque එක transmit කරන්න මදි. ඉතිං ඒ පාර අපි මෙතනව වෙනමම coupling එකක් දාන්න තීරණය කලා. එන්ජින් එකේ vibration ‍fan එක‍ට නොයන විදිහට coupling එකක් හදන්න අවශ්‍ය උනා. ඉතින් මම හිරෝෂ් එක්ක එක වර්ගයක coupling එකක් හදන අතරේ අපේ බාස් & C4 දීගල වෙනමම coupling එකක් හදන්න අත ගැහුවා.

කොහොම හරි අපි අපේ වැඩේ කලින් ඉවර කරපු නිසා අපේ coupling එක එන්ජිමට සෙට් කලා. මේ තියෙන්නේ ඒක.

මෙතනදි අපි යකඩ shaft දෙකකට රවුම් තහඩු දෙකක් වෙල්ඩින් කලා. ඒ අතරට සාමානය්‍ය ඝනකමක රබර් රවුමක් දාලා ඇණ 3කින් තහඩු දෙක සම්බන්ධ කලා. Power එකත් transmit වෙනවා. Vibration එකත් යම් තරමකින් උරාගන්නවා. එන්ජිම පැත්තේ shaft එක Key එකකින් සම්බන්ධ කලා. Bevel unit එක පැත්තෙන් ඇණයක් දාලා හොඳට හිර කලා. දැං coupling එක හරි. start කරන්න තමා තියෙන්නේ.

Start කරනවා කරනවා.. එක එක ලෙඩ. වෙන කොතනවත් නෙමේ Bevel gears වල. උඩ රූපෙ බැලුවොත් පේනවා ඇති. පුංචි bevel gear දෙකක් අපි පාවිච්චි කරලා තියෙන්නේ. පොඩ්ඩ ඇත්නම් slip වෙනවා. එන්ජිම start කරන්න තියෙන්නේ ඇදලා. ඉතිං ඇදපු ගමන් එකපාර එන්ජිම start වෙන්නෙ නෑ. Hovercraft එක පොඩ්ඩක් උඩ පනිනවා. සමහර වෙලාවට හිටිනවා. එතකොට fan එක?? ඒක කැ‍රකෙන ගමන් එකපාර නවතින්න බලනවා. මේ නිසා bevel slip වෙනවා. මාරම අමාරුවක අපි වැ‍‍ටුනේ.. මේ වීඩියෝ එක බැලුවා නම් මම කියපු ලෙඩේ තේරුම් ගන්න පුලුවන්.

කො‍හොම හරි කෑලි ටික හරියට අමුණලා ආයෙත් Start කලා. මේ වෙලාවේ අර වැකුම් බටේ දාපු මුල් වෙලාවේ තරම් වෙලාවක් අල්ලන් ඉන්න පුලුවන් උනා.

අපිට ‍තේරුනා අපි පාවිච්චි කරපු bevel gears මේ වැඩේට මදි කියලා. වහාම කට්ටිය තීරණය කලා Bevel gear unit එක නැවත ‍වාරයක් ඩිසයින් කරන්න. වැඩේ ලේසි නොවුනත් කලිං දෝෂ ආයෙ එන්නෙ නැති වෙන්න අලුත් bevel unit එකක් ඩිසයින් කලා. දැං මේවාට shafts ලේත් මැෂින් වලින් ලියවන්න ඕනා. Bearing වල‍ට ආයෙ කප් හදන්න ඕනා. කට්ටියම වැඩ බෙදාගෙන කරන්න ගත්තා. මේ අතරේ පංචිකාවත්තෙන් ටිකක් ලොකු bevel gears දෙකක් ගෙනාවා.

සතියක් ඇතුලත එහෙන් මෙහෙන් හම්බුන නිදහස් වෙලාවන් වල Bevel gear unit එක හදාගත්තා. අලුත් grar wheel shaft වලට තියලා ගෑස් එකෙන් වෙල්ඩින් කලා.

මේ අතරේ බාස් C4 එක්ක හදපු අනික් coupling එක දාන්න තීරණය කලා. පහලින් තියෙන්නේ අපි හදපු අලුත් bevel gear unit එක. Bevel gear වල වෙනස කො‍හොමද..

අපි දෙවනියට හදපු bevel unit එකේ shaft වල මිනුම් ගනිද්දී අපි අතින් වැරැද්දක් වෙලා තිබුනා. fan එකට එන shaft එකේ දිග මදිවෙලා. Fan එක දැන් බෝඩ් එකෙන් අඟල් දෙකක් විතර උඩින් තියෙන්නේ. මෙහෙම තියෙද්දී ‍fan එකෙන් එන හුලඟ skirt එක ඇතුල‍ට යන්නේ නෑ. අතර තියෙන ඉඩ නිසා පිටට යනවා. මේක නිසා board එකේ හදපු සිදු‍ර වටේට thin sheet වලින් ආවරණයක් හැදුවා.

මේකට එන්ජිමට සම්බන්ධ කරන්න අපි පාවිච්චි කලේ love jaw coupling එකක්. අපි හදපු එකේ photo එකක් නම් නෑ. ඒත් ඒක මෙන්න මේ වගේ.

මේකේ මැදට දාන්නේ vibration උරාගන්න පුලුවන් වර්ගයේ material එකක්. අපි නම් මුලින් පාවිචිචි කලේ සෙරප්පු කෑලි. ඒත් ඒක ප්‍රමාණවත් උනේ නෑ. එන්ජිම ස්ටාට් කරපු ගමන් ‍මැද්දට දාපු රබර් සෙරප්පු කෑලි කඩලා විසි වෙන්න ගත්තා.

මේ වෙලාවෙ නම් කට්ටියට එපා වෙලා තිබ්බේ. මේහෙම එන්ජිම ස්‍ටාට් කරන්න දඟලපු වෙලාවක මේ jaw දෙක තියෙන්න ඕන තැන් වලින් එලියට පැන්නා. ( alignment වෙනස් උනා) මේ නිසා අපිට වෙන්න තිබ්බ ලොකුම ප්‍රශ්නෙ ඇති උනා.වෙන මොකක්වත් නෙමෙයි. එන්ජිම පැත්තට එන bevel unit එකේ shaft එක ඇද උනා. මේකට බලපාපු ප්‍රධානම හේතුව තමයි අපි gear wheel, shaft වලට පෑස්සීම. පහසුව ගැන හිතලා කලාට Heat වීම නිසා shaft වල ශක්ති‍ය අඩු වෙනවා. දැං ඉතිං කිසි දෙයක් කරන්න බෑ shaft එකේ තියෙන ඇදේ කෙලින් නොකර.

මුලින්ම Hydraulic press එකකට දාලා කෙලින් කරන්න බැලුවා. Shaft එක mild steel නිසා press කරාම කෙලින් උනාට pressure එක අයින් කරාම ආයෙත් ඇද ගහනවා. අන්තිමට අපිට තේරුනා මේකට love jaw coupling එකත් හරි යන්නෑ කියලා. ඉතිං අන්තිම උත්සාහය විදිහට එන්ජිමයි gear unit එකයි සම්බන්ධ කරන්න Hooks joint එකක් එහෙමත් නැත්තං Universal joint එකක් (අර සමහරු කියන සර්ව ලෝක පූට්ටුව) දාන්න තීරණය කලා. අර love jaw coupling එ‍කේම jaws කපලා දාලා ඒක‍‍ට hooks joint එක සම්බන්ධ කරා.

මේ තියෙන්නේ අපේ hooks joint එක. හදන්න ඕනා උනේ වානේ ඇණ 4යි L හැඩයේ යකඩ කෑල්ලයි. :D

මේ අතරේ hooks joint එක ඇදීම වලක්වන්න එන්ජි‍මයි bevel unit එකයි දෙක එකට සම්බන්ධ කලා. hovercraft එකේ වටේට යකඩ frame එකක් තිබ්බත් එන්ජිම වැඩ කරනකොට board එක මැදෙදෙන් නැමෙන්න බලනවා. මේ අස්සේ අපි safety ගැන හිතලා දාපු දැල් කෑල්ල කොහෙද දන්නෙත් නෑ. ඒක හොයාගන්නත් ඕනා :D

මේ තියෙන්නේ සියලු වැඩකටයුතු අවසන් කරපු Hovercraft එක. පෝස්ට් එක ආයෙමත් දිග වැඩි උනා. ඒ නිසා ඊලඟ කොට‍සින් අවසන් වැඩ කටයුතු වගේම අපි අතින් උන වැරදි, මේක දියණු කරන හැටි වගේ දේවල් සාකච්චා කරන්නම්. වීඩියෝ ගොඩක් තියෙනවා. අනික් පෝස්ට් එකෙන් ඒවා බලාගන්න පුලුවන් :)

Project Hovercraft | වායුපායානයක් හදමු - 1

2010-10-20T08:31:00.001+05:30

කට්ටිය බලනවා ඇති මේ මොකක්ද කියලා. ගොඩක් කාලෙකට පස්සෙ වැදගත් දෙයක් ලියන්න හිතුවා. Hovercraft එහෙමත් නැත්තං වායුපායානය ගැන හැමෝම වගේ අහලා ඇති. ටිකක් අමුතු ජාතියේ වාහනයක්. මමත් වීඩියෝ, පොටෝ වල මිසක් හැබැහින් එකක් දැකලා නෑ. දන්න තරමින් ලංකාවෙ Hovercraft පදින්නේ නෑ. (ලයිසන් දෙන්නෙත් නෑනෙ :D )

අපේ 2nd year එකේ Project එකක් කරන්න ඕනා. Field එක mechanical නිසා ඒ සම්බන්ධ දෙයක් තමා හදන්න ඕනා. ඔන්න ඉතිං කට්ටිය group වලට වෙන් කරා. කට්ටිය එක එක ඒවා හදන්න යනවා. මීට කලින් අපි දන්න තරමින් කිසිම කෙනෙක් එකක් හදලා නොතිබුන නිසාත්, පොඩි ෆන් එකක් ගන්න තිබ්බ ආසාව නිසාත් Hovercraft project එකට අත ගැහුවා. අයිඩියා එක දුන්නේ අපේ කැන්ඩි ඩබල (හිරෝෂ් & C4 දීගල). ප්ලෑන් ගහනවා ගහනවා විතරයි, හදන්න උවමනාවක් නෑ කාගෙවත්. ඒ අස්සේ පුලුවං තරං internet එකෙත් හෙව්වා. පෙනුමින් ඒ තරම් අමාරු පෙනුමක් නොතිබුන නිසාත් ‍කට්ටියම ගේමට එන්ටර් උනා.

අපේ මුල්ම ගැටලුව උනේ hovercraft එ‍කේ සයිස් එක. කවුරු හරි නැගලා යන්න පුලුවන් සයිස් එකේ එකක් හදන්න තමයි හැමෝගෙම ආසාව තිබ්බේ. ඔන්න කට්ටියම Project proposal එකත් අරං අපේ workshop project භාරව ඉන්න සර් හම්බෙන්න ගියා. සර් නං කැමැත්තක් පෙන්නුවෙ නෑ මුලිං. Model එකක් හදමු කිව්වා. කට්ටියගෙම මූණු ඇඹුල් උනා එතකොට නම්. ඒත් ඉතිං මේ වගේ හදිසි ව්‍යවසන කළමණාකරණය කිරීමේ විශේෂ හැකියාවක් තියෙන අපේ බාස් කොහොම හරි වැඩේ හරි ගස්ස ගත්තා.

Project එක පටං ගත්තා වගේ නෙමේ. එකෙක් එකක් කියනකොට තව එකෙක් වෙන එකක් කියනවා. ගොඩක්ම වලි දාගත්තේ මමයි බාසුයි තමා. :D අනික් උං ඒවා බලලා ආතල් ගන්නවා. අවසානයේ අපේ Automobile සර් හම්බෙලා උපදෙස් ටිකක් ගත්තා. සර් ඉතිං සර්ගෙ කාලේ සර්ලා hovercraft හදලා ගත්තු ආතල් ගැන කතා ටිකක් කිව්ව පාර ආයෙත් අපේ කට්ටිය ගානට ‍ෆෝම් උනා.

ඔක්කොටම කලින් hovercraft එකක ක්‍රියාකාරිත්වය බලමු.

මේ ඉතිං තියෙන්නේ මගේ ග්‍රැපික් ඩිසයින් තමා. Hovercraft එකක තියෙන fan එක ක්‍රියාත්මක වෙලා පිටත ඇති වාතය එහි පහලට යොමු කරනවා. මේකෙ Skirt එක කියන්නේ hovercraft එකේ තට්ටුවට (deck) යටිං තියෙන රෙද්දක්. හරියට කිව්වොත් Skirt එකක් වගේම තමා. Fan එක වැඩ නොකරන වෙලාවට මේ skirt එක ඇකිලිලා තියෙන්නේ. නමුත් fan එකෙන් වාතය එන්න ගත්තම මේ skirt එක hovercraft එකේ බරත් උස්සං පිම්බෙනවා. Skirt එකේ ප්‍රමාණයත් එක්ක ඒක පිම්බිලා ඉවර උනාම ඒකට fan එකෙන් වැඩිපුර සපයන වාතය පිටවෙන්න ඕනා. වාතය පිටවෙන්න තියෙන එකම මාර්ගය හැදෙන්නේ Skirt එක පොලවට touch වෙන තැනින් ටිකක් ඉස්සුනොත් විතරයි. ඒ කි‍යන්නේ hovercraft එක දැං පොලවේ ගෑවෙන්නෙ නෑ, පොලවට වඩා පුංචි උසකින් පා වෙනවා. අපිට‍ සාමාන්‍යයෙන් පොලවේ තියෙන දෙයක් තල්ලු කරන්න අමාරු ඒ වස්තුව පොලවත් එක්ක තියෙන ඝර්ෂණය නිසා. ඒත් hovercraft එක දැං පාවෙන නිසා ඝර්ෂණය බිංදුවට ආසන්නයි. ඒ කියන්නේ පුංචි බලයක් දුන්නත් ගමන් කරන්න පුලුවන්.

සරළව කියනවා නම් Hovercraft එකක් පාවීමේ මුලධර්මය ඕක තමා. අපේ Hovercraft එකේ deck එකට අපි MDF බෝඩ් එකක් දාන්න තීරණය කලා. අපි මේක design කලේ කිලෝගෑම් 100ක් විතර බරක් (මගියාද සහිතව) ඔසවන්න. සවි ශක්තිය වැඩි වෙන්නත් එක්ක ‍බෝඩ් එක වටේට යකඩෙන් frame එකකුත් ගැහුවා.

ඊට පස්සෙ ආපු ලොකුම ගැටලුව තමා මැද්දට දාන Fan එක. අපිට option දෙකක් තිබ්බා.

Centrifugal Blower
Axial flow fan

Centrifugal blower එකේ තිබුන පොෂ් ලුක් එක නිසා කට්ටියම තීරණය කලා ඒකක් දාන්න.. :D

දැං ඉතිං හදපල්ලකෝ Centrifugal Blower එකක්. පෙනුමින් හදන්න ටිකක් අමාරු නිසාත් ලොකු rpm එකකින් කැරකෙන නිසා safety ගැන හිතන්න ඕනා නිසාත් අපි තීරනය කලා එකක් සල්ලි දීලා ගන්න. කට්ටියම දවසක් විතර නැහිලා blower එක අවශ්‍යතාවය අනුව design කරලා හදන තැනකට දුන්නා. දවස් කීපයකින් ගනන් හිලවු දන්වා එවන්න ඒ ආයතනය පොරොන්දු උනා. මෙන්න දවස් දෙකකින් විතර call එකක් එනවා. ගාන 20000ක්ලු :D. කට්ටියගෙම හුලං පූෂ් ගාලා බැස්සා. ඒපාර‍ ප්‍රොජෙක්‍ට් එක යෝජනා කරපු එවුන්ට බනිනවා ඇරෙන්න කරන්න දෙයක් තිබ්බෙ නෑ :D

දැං project එක අත අරින්න බෑ. සති 3ක් විතර ගිහිනුත් ඉවරයි. වෙන එකකට යන්න කාලෙකුත් නෑ. අන්තිමට ආයෙමත් automobile සර් හම්බුනා. ගිහින් centrifugal blower දාන්න යන කතාව කිව්වා. ඒත් සර් ඒකට කැමති උනේ නෑ. වඩාත් සුදුසු Axial flow fan එකක්ලු. අපේ උන්ට සුවර් නෑ. කිලෝ 100ක් නිකං fan ඒකකින් එන හුලඟකින් උස්සන්න පුලුවන් වෙයිද....??

කොහොම හරි AC & Refrigeration section එකෙං ප්ලාස්ටික් fan blade එකක් ණයට ඉල්ලා ගත්තා.
පහලින් තියෙන්නේ Hovercraft එකේ deck එකයි අර fan blade එකයි.

මේ අතරේ වායුපායානයට බලය සැපයීමේ ගැටලුව ගැන සාකච්ඡා වෙමින් පැවතුනේ. ඒකටත් option දෙකක් තිබ්බා. එකක් තමා මෝටරයක් පාවිච්චි කරන එක. අනික තමා එන්ජිමක් දාන එක. නමුත් අන්තිමට හැමෝම තීරණය කලා එන්ජිමක් දාන්න. Hovercraft එක හදන්නේ එක තැන තියං ඉන්න නෙමෙයිනේ.. පොඩ්ඩක් එලිය‍ට දාලා වැඩ පෙන්නන්නත් එපැයි :D.

එන්ජිමක් දානවා කිව්වා විතරයි ඉතිං අපේ බාස් සල්ලි කාරයා නිසා ලොස් නැතුව 10000ක්ම වියදම් කරලා චයිනීස් බයික් එන්ජිමක් ගත්තා. මගේ ගාවත් පරන water pump එකක් තිබ්බා, ඒත් ඒක ටිකක් බර නිසා අනික් එන්ජිමට මොනවා හරි උනොත් backup එකක් හැටියට තියාගත්තා.

ඊලඟට ගැටලුව උනේ ‍fan එකේ Axis එක එන්ජිමේ Axis එකෙන් අංශක 90ක් හැරිලා තිබ්බ එක. එන්ජිම 4stroke නිසා හරවන්නත් බෑ. ඉතිං මේකට bevel gears දාන්න ‍තීරණය කලා.

Gear wheel අපි හදන්න ගියත් machine shop එකේ bevel gears කපන්න බෑ. ඉතිං දැං මොනවා කරන්නද. බාස් & C4 දීගල පංචිකාවත්ත පැත්තේ යවලා bevel gears ගෙන්න ගත්තා. දවස් දෙකක් විතර මේ යුනිට් එක හැදුවා. (project එකට කාලය ලැබුනේ සතියට එක දවසයි). පහලින් තියෙන්නේ අපි හදපු bevel gears දාපු unit එක. අත නම් හි‍රෝෂ් ගේ. :D

මේ තියෙන්නෙ අපේ බාස්ගෙ එන්ජිම. මේක උස්සං ආවට පස්සෙ තමා අපිට තේරුනේ එන්ජිම mount කරන එක මාරම ගේමක් කියලා. ඒ අතරේ මම මගේ එන්ජිම ගෙනත් ඒකෙ වතුර පොම්‍ප කොටස ගැලෙව්වා. වතුර පොම්ප කරන කෑල්ල ගලවලා බලනකො‍ට ම‍ගේ එන්ජිම බාස්ගෙ එකට වඩා බර අ‍ඩුයි. :D

අන්තිමට hovercraft එකට මගේ එන්ජිම සෙට් කරන්න තීරනය කලා. අවුරුද්දකින් විතර පාවිච්චි කරලා තිබ්බෙ නැති නිසා එන්ජිම සම්පූර්ණයෙන් ගලවලා හොද service එකක් දුන්නා. ඒ ටිකේ බෝඩිමම ලාම්පුතෙල් ගඳයි.. :D

මේ අතරේ අපේ fan එක deck එකට සෙට් කරන්න වෙනමම රැක් එකක් හැදුවා. ‍අපේ වෙලාවට කලින් Fan blade එක ගත්තු තැනින් ඊට වඩා හයිය වැඩි ඇලුමිනියම් fan blade එකක් ගන්න පුලුවන් උනා. පහලින් තියෙන්නේ අපි ‍fan එක hovercraft එකේ deck එකට සම්බන්ධ කරපු විදිහ.

ෆෑන් එක කරකවන්නේ අපේ බාස්. ( බාස් කිව්වට මෙයාගෙ ඇත්ත නම B.A.S මෙන්ඩිස් , අපි ලේසියට කියන්නේ බාස් කියලා :D ) ඊ‍‍ට එහොයින් ඉන්නේ අපේ අයිස් පප්පා ඩිල්ෂාන් :D. මම ඉතිං MDF board එක හයියද කියලා බලන ගමන්. :D

Fan එක අතින් කරකවලා පොඩි test run එකක් දැම්මා. Alignment අවුලක් නෑ. මේ අතරේ skirt එකට (ඒ කිව්වේ hovercraft එකේ යටින් එන වායු ධාරා නිවැරදිව රඳවාගෙන එය පාවීමට උදව් කරන රෙද්ද) පරන digital print කිපයක් ගෙනත් තිබ්බෙ. ඔය අස්සේ මරණ දැන්වීමකුත් තිබ්බා. :D Fan එක ආයෙත් ගලවලා MDF බෝඩ් එක අනිත්පැත්තට පෙරලුවා. Skirt එක කෑලි කපලා වටේටම ටින්‍ටස් ඇන වලින් හයි කරා. ඒක නම් එච්චර අමාරු උනේ නෑ, ඒත් skirt එකක හැඩය එන්න මහන එකට නම් ටිකක් වෙලා ගියා. කොහොම හරි ඒකත් ගොඩ දාගත්තා.

ඔන්න ඒකත් හරි. දැං තියෙන්නේ Engine එක mount කරන එක. ‍Fan එකට බලය සපයන shaft එක යම් උසකින් තිබ්බ නිසා අපිට එන්ජිම උස්සන්න උනා. ඒකට වෙනම රැක් එකක් හැදුවා. එන්ජිම ස්ටාට් කරාට පස්සෙ එන දෙදරීම් අඩු කරන්න රබර් mount පාවිච්චි කරන්න කට්ටියම තීරණය කලා. නමුත් ඒ ක්‍රමයෙන් සම්පූර්ණයෙන් vibrations නැති කරන්න පුලුවන් උනේ නැ.

මේ අතරේ එන්ජිම හා fan එකට බලය සපයන shaft එක සම්බන්ධ කරන්නේ කොහොමද කියන ගැටලුව පැන නැගිලා තිබ්බේ. vibration නිසා කෙලින්ම solid shaft එකක් දාන්නත් බැ. වෙන ආකාරයක coupling එකක් හදන්න වෙලාවකුත් නෑ. ඉතිං කොහොම හරි අවසානයේ එක්කෙනෙක් අයිඩියා එකක් ගෙනාවා. ඒ තමයි රබර් බටයකින් සම්බන්ධ කිරීම. මේකට අපි ගත්තේ බස් වලට එන වැකුම් බටයක්. දෙපැත්තට Pipe clip දාලා තවත් ‍හොඳට හිර කලා. වැඩි ආරක්සාවට පුංචි දැල් කෑල්ලක් දැම්මා. කොහොම හරි මේක දැකපු අපේ project භාර රණසිරි සර්ට නම් මාර සතුටුයි. "ආ ළමයි Safety ගැනත් හිතලා තියෙන්නේ" කියලා කිව්වා වගේ මතකයි :D

ඔන්න දැං හදන වැඩ ඉවරයි.. දැං තියෙන්නේ ටෙස්ටින්.. ඇත්තටම Hovercraft එක පා උනාද??? ඊලඟ ලිපියෙන් ඒ ගැන බලමු :)

පරිගණක හාඩ්වෙයා පාඩම - 12

2010-10-09T11:14:00.001+05:30

ටික කාලෙකට පස්සෙ නැවතත් හාඩ්වෙයා පාඩම් මාලාව ඔබ වෙතට ගෙන එන්නයි මගේ සූදානම. පහුගිය පාඩම් වලින් අපි පරිගණකයේ Casing එක වගේම Power supply unit එක ගැනත් කතා කරා. අද මම සාකච්ඡා කරන්න බලාපොරොත්තු වෙන්නේ පරිගණකයක තියෙන වැදගත්ම කො‍ටසක් වන ක්ෂූද්‍ර සැකසුම් ඒකකය නැත්නම් Microprocessor එක ගැනයි. මේ ගැන කතා කරද්දී Microprocesssor නිපදවන ප්‍රධානම තරඟකරුවන් දෙදෙනා ගැන සඳහන් නොකර බෑ. ඒ තමයි Intel සහ AMD කියන සමාගම් දෙක.

ඉස්සර ඉඳන්ම සාමාන්‍යයෙන් අපි පරිගණකයක් හඳුන්වා දෙන්නේ එහි මයික්‍රොප්‍රොසෙසරයේ නමින්. (CPU නමින් හඳුන්වන්නේත් මෙයමයි). ඒ තරමට එය පරිගණකයේ ශක්‍යතාවයට බලපෑම් කරා. සාමාන්‍යයෙන් පරිගණකයක් මිලදී ගැනීමේදී පවා අපි වැඩිම අවධානයක් යොමු කරන්නේ CPU එක වෙත.

අපි මුලින්ම CPU එකක සැකසුම ගැන බලමු. මගේ පරිගණක හාඩ්වෙයා පාඩම් අංක 2 බැලුවා නම් සම්පූර්ණ පරිගණකයක මූලික සැකැස්ම රූපයකින් පෙන්වා තියෙනවා.

මෙහි මූලික අංග පිලිබඳ ඔබට පරිගණක හාඩ්වෙයා පාඩම - 2 න් විස්තරාත්මකව දැනගත හැකියි.
මුලින්ම පුද්ගලික පරිගණකයක CPU එකක් ලෙස විශාල වශයෙන් භාවිතා උනේ intel 8080 කියන microprocessor එක. මෙය 8086, 80186, 80286 හා 80386 ලෙස විකාශනය උනා. මෙම පැරණි cpu නම් දැනට භාවිතයේ නෑ. 486 මාදිලියේ පරිගණක සුළු වශයෙන් තියෙනවා. 80486 cpu එකට පස්සේ inel සමාගම ඔවුන්ගේ ඊලඟ microprocessor එක Pentium නමින් නම් කරා. එහි දෙවන පරම්පරාව උනේ Pentium II. (ඒ නිසා මුල් එක නිකන්ම Pentium I උනා) මේ අතරේ AMD, Cyrix වැනි ආයතන වලිනුත් CPU නිපදවීම සිදුකරනු ලැබුනා.

Pentium III, Pentium IV වැනි CPU නම් අපි අතර ප්‍රචලිතයි. මේ අතර Intel සමාගම මගින් Celeron නමින් CPU කාණ්ඩයක් එලිදක්වනු ලැබුනා. මේවා සාපේක්ෂව අනික්වාට වඩා මිල අඩු උනත් එහි ඇති Cache memory එක සාපේක්ෂව කුඩා වීම නිසා සමස්ත කාර්යක්ෂමතාව අඩු උනා.

දැනට වෙලඳපොලේ DualCore, Core2Duo, Core2Quad, Core2 Extreme වැනි CPU මෙන්ම Corei3, Corei5, Corei7 කාණ්ඩ වල CPU ද දැකගත හැකියි. සාමාන්‍යයෙන් අපි මේ දිනවල පරිගණකයක් එකලස් කරනවා නම් ඉහත දක්වන ලද ඒවා තමයි බොහෝවිට පාවිච්චි වෙන්නේ (මීට අමතරව AMD processor ද භාවිතා කරන්න පුලුවන්). සේවාදායක පරිගණක නැත්නම් Servers සඳහා වෙනමම CPU කාණ්ඩ නිකුත් කර තිබෙනවා. Intel Xeon ඒ සඳහා උදාහරණයක්.

CPU එක Motherboard එක‍ට සවි වන ආකාරය අනුවත් වර්ග කරනවා

PGA - Pin grid array (මෙහිදී CPU ඒකේ තමයි contact pins තියෙන්නේ. Mother board එකේ ඇති සිදුරු සහිත socket එකකට CPU එක සවි වෙනවා)‍
LGA - Land grid array (මෙහිදී Pin මවු පුවරුවේ සවි කෙරුනු අතර ඒවා සඳහා CPU එකේ contact point layer එකක් සකස් කෙරුනා.

මීට අමතරව මවු පුවරුවේ ඇති slot එකකට සවි කලහැකි ආකාරයේ CPU කාණ්ඩයක් Pentium ii හා iii හි තිබුනා. නමුත් ඒ වර්ග‍ය දිගටම නිශ්පාදනය උනේ නෑ.

ඇත්තටම මම‍ මේ කො‍ටසින් උත්සාහ කලේ CPU එක ගැන සරළ අදහසක් ඔබ වෙත ලබා දෙන්න. මම සඳහන් නොකල කරුණු විශාල ප්‍රමාණයක් තිබෙනවා. CPU එකක් මිලදී ගැනීමේදී සැලකිලිමත් විය යුතු කරුණු ගැන ඊලඟ පාඩමෙන් කතා කරමු.

HSDPA මොඩම් එක රත් වෙනවාද?

2010-10-01T08:25:00.003+05:30

HSDPA මොඩම් පාවිච්චි කරන හැමෝටම තියෙන ගැටලුවක් තමයි සිග්නල් හරියට නැති අවස්ථා වලදී මොඩම් එක ඕනාවට වඩා රත් වීම (මේකට ප්‍රධානම හේතුව මොඩම් එකෙන් අධික බලයක් යොදවා දත්ත සම්ප්‍රේශණය කිරීම). සිග්නල් හරියට තිබුනත් මොඩම් එක යම්තාක් දුරට රත් වීම වලක්වන්න බෑ. සාමාන්‍යයෙන් ඉලෙක්ට්‍රොනික උපාංග වලින් නිකුත් වන උෂ්ණත්වය නිවැරදිව බැහැර උනේ නැත්තනම් එහි ආයුකාලයට ‍එය ඍජුවම බලපානවා.

මේකට විසඳුමක් තමයි Heat sink එකක් නැත්නම් තාප අවශෝෂකයක් භාවිතා කිරීම. අපි‍ට heat sink වර්ග දෙකක් පාවිච්චි කරන්න පුලුවන්.

Passive heat sink
Active heat sink

Passive heat sink එකක තියෙන්නේ තාප සන්නායක ලෝහයකින් හදපු බාහිර වාතය හා ගැටෙන වර්ගඵලය උපරිමවූ කොටසක්. මේකෙදි ස්වභාවිකව තාපය උරාගෙන සිසිල් වීම සිදු වෙනවා. නමුත් Active heat sink එකකදී එයට බාහිරින් යොදන ලද බලයකින් සිසිල් කිරීමක් සිදු වෙනවා. මේකට යොදාගන්නේ cooling fan එකක්.

දැං අපි අපේ මාතෘකාව‍ට බහිමු. මම මොඩම් එකේ රත්වීම පාලනය කරන්න පාවිච්චි කරේ පරිගණක මවු පුවරුවක chipset එකක passive heat sink එකක්. ඒකෙ තියෙන Push pins වලට මොඩම් එක යටින් සවි වෙන්න වෙනමම ප්ලාස්ටික් කෑල්ලක් කපලා සූදානම් කරගත්තා. ඒ වගේම අපිට HSDPA මොඩම් එකකුත් අවශ්‍ය වෙනවා. :D

අවශ්‍ය නම් හොඳ තාප සන්නායකතාවයක් ලබාගන්න Heat sink compound පාවිච්චි කරන්න පුලුවන්. ඒත් මම මේක නිතරම ගලවන්න සවි කරන්න හිතන් ඉන්න නිසා ඒවා නොයොදන්න තීරණය කලා. ප්ලාස්ටික් පතුර ටිකක් හයිය එකක් නම් heat sink එක හොඳට modem එකට සම්බන්ධ වෙයි.

මේ තියෙන්නේ heat sink එක සහිත modem එක.

මම මේ ලිපිය ලියන අවස්ථාවේ heat sink එකට අත තියලා බැලුවා. සතුටු වෙන්න පුලුවන් මට්ටමේ තාපය උරාගැනීමක් සිදුවෙලා තියෙනවා. Fan එකක් යොදන්න පුලුවන් නම් සිසිල් කිරීම වඩාත් කාර්යක්ෂමව සිදුකරගන්න පුලුවන්. අත්හදා බලන්න. Modem එකට කිසිදු හානියක් වෙන්නෑ කියලා 100% ක් සහතික වෙනවා.

පරිගණක හාඩ්වෙයා පාඩම - 11

2010-09-05T08:18:00.002+05:30

Power Supply Testing

පරිගණකයක ක්‍රියාකාරිත්වයට Power supply unit එක කොතරම් වැදගත්ද යන්න ඔබට පැහැදිලි ඇති. බොහෝමයක් ඉලෙක්ට්‍රොනික උපකරණ වගේම power supply එකකද දෝශ ඇති විය හැකියි. මේ වගේ අවස්ථාවක අපිට අපේ Power supply unit එක පරීක්ෂා කල හැකියි.

1. මල්ටිමීටරයක් භාවිතයෙන් පරීක්ෂා කිරීම

සාමාන්‍යයෙන් අපි මෙහිදී සිදු කරන්නේ Power supply එක අව‍ශ්‍ය වෝල්ටීයතාවයන් නිවැරදිව සපයනවාද යන්න පරීක්ෂා කර බැලීමයි. මුලින්ම Power supply එක On කරගත යුතු වෙනවා. AT මාදිලියේ එකක් නම් විදුලි බලය සපයා ස්විචය ක්‍රියාත්මක කිරීමෙන්ද ATX මාදිලියේ නම් විදුලි බලය සපයා pin-16 Ground pin එකක් සමග short කිරීමෙන්ද (කොල වයරය කලු වයරයක් හා සම්බන්ධ කිරීමෙන්) ක්‍රියාත්මක කල හැකියි. ඉන්පසු පෙර පාඩම් වලදී අපි ඉගෙනගත්
වොල්ටීයතා වගු ඇසුරෙන් අපට Power supply එක නිවැරදි වෝල්ටීයතාවන් ලබා දෙනවාද යන්න පරීක්ෂා කරන්න පුලුවන්.

2. Power supply tester එකක් භාවිතා කිරීම

Power supply එකක් පරීක්ෂා කිරීමේ පහසු ක්‍රමයක් තමයි Power supply tester එකක් භාවිතා කිරීම. මේ මගින් එකවර Power supply එකෙහි සියලු වෝල්ටීයතාවන් නිවැරදිව ලැබේදැයි පරීක්ෂා කල හැකියි. සාමාන්‍ය භාවිතයේ පවතින power supply tester වර්ග දෙකක් තිබෙනවා. මෙයින් එකක් LED bulb භාවිතයෙන් නිවැරදි වෝල්ටීයතාවන් ලැබේදැයි පෙන්නවනවා. අනෙක Display එකක් මගින් වෝල්ටීයතාවන් පෙන්නුම් කරනවා. මේ වර්ග දෙකෙන් මම නම් නිර්දේශ කරන්නේ Display සහිත Power supply tester එක. මොකද මේ මගින් අපි‍ට Voltage tolerances (Power supply එක මගින් දෙන වෝල්ටීයතාවන් වෙනස් වන ප්‍රතිශතය) පරීක්ෂා කරන්න පුලුවන්. LED මගින් ප්‍රතිළුල පෙන්වන Power supply tester එක පෙර සැකසූ දත්ත වලට අනුවයි ඒ ඒ වෝල්ටීයතාවන් නිර්ණය කරන්නේ. උදා හරණයක් ගත්තොත් +12V සඳහා +11 සිට‍ +13 දක්වා පරාසයක් ලබා දී තිබෙන්න පුලුවන්. නමුත් අනෙක් වර්ගයේ වෝල්ටීයතාව පෙන්වන නිසා අපිට power supply එකේ සඳහන් කරලා තියෙන tolerance එක සමග සසඳා අගයන් වල නිවැරදි බව තහවුරු කරගත හැකියි.

images from http://www.coolmaxusa.com

මෙහි ක්‍රියාකාරිත්වය එතරම් සංකීර්ණ නෑ. මුලින් 24pin connector එක සවිකර tester එක On කලයුතුයි. සමහර Tester බලසැපයුම් වයරය සම්බන්ධ කල සැනින් ක්‍රියාත්මක වෙනවා. ඉන්පසු එකින්එක අනෙක් බල සැපයුම් වයර සම්බන්ධ කර වෝල්‍ටීයතාවන් කියවාගත යුතුයි. මෙයට එකවර සවි කල යුත්තේ ප්‍රධාන බල සැපයුම් වයරයත් තවත් එක් අතිරේක බල සැපයුම් වයරයකුත් පමණයි. ‍වෝල්ටීයතාවයන්ට අමතරව මෙමගින් Power Good signal එකත් පරීක්ෂා කල හැකියි. මෙය PG ලෙස දැක්වෙනවා.

පහතින් දැක්වෙන්නේ LED indicator ඇති power supply tester එකක්.

මේවා ගැන වැඩිදුර විස්තර මේ වෙබ් අඩවියෙන් බලාගන්න පුලුවන්. www.coolmaxusa.com
Power supply ගැන කියලා දුන්නා ඇති කියලා හිතෙනවා.. ගැටලු තියේ නං අහන්න පුලුවං. ප්‍රමාණවත් තරම් ගැටලු එකතු උනොත් ලිපියකින් උත්තර දෙන්න බලාපොරොත්තු වෙනවා.
තවත් Computer hardware පාඩමකින් ඉදිරීයේ හමුවෙමු :)

අයියේ මේකෙ බ්ලූටූත් වැඩ නෑ..

2010-08-31T11:03:00.000+05:30

අයියා : කෝ නංගි ඔයාගේ phone එක පොඩ්ඩක් දෙන්න.
නංගි   : ආ.. ඒ මොකටද?
අයියා : ටෝච් එකක් නැ හලෝ.. දෙනවකො ඕක...
නංගි : ආ මේං..
(අයියා වැඩේ කරං phone එක ගෙනත් දෙයි)
නංගී : අයියේ මේකෙ බ්ලූ ටුත් වැඩ නෑනෙ..
අයියා : මොකද නැත්තෙ.. වැඩ කරානෙ.. මම බලලනෙ අරං දුන්නෙ.. ආ මේ තියෙන්නේ
නංගි   : ඉතිං යවන්න බෑනෙ..
අයියා : දැං යවන්න ඕන phone එකේ බ්ලූටූත් ඔන් කරාද???
නංගි   : ආ එහෙම කරන්නත් ඕනාද?
අයියා : නෑ ඕනා නෑ.. දෙනවා මෙන්න මෙහෙට පෝං එක :D
නංගී   : ඉතිං කොහොමද හරි phone එක හොයා ගන්නේ..??
අයියා : අයියෝ හැම පෝන් එකකටම නමක් දාලා තියෙන්නේ.. ඒකෙන් හොයා ගන්නේ..
නංගී : හරි ඉතිං ඔයාගෙ එකට මේ පොටෝ එක එවලා පෙන්නන්නකෝ..
(පොටෝ එක එවා පෙන්වයි...)
නංගි : ෂා නියමයිනේ.. මෙහෙම ඕනා එකක් යවන්න පුලුවංද?
අයියා : පුලුවං පුලුවං.. සිංදු පොටෝ ඕනා එකක්..

( ඒ අතර අයියා කාමරයට යයි.. නංගී මෙ‍සේ කියනු ඇසෙයි..)

කීයක් කැපුනද දන්නෑ...

නම් ගම් මනඃකල්පිතයි :D

Spam Filter For Blogger | බ්ලොගර් සඳහා ස්පෑම් ෆිල්ටර

2010-08-28T08:43:00.001+05:30

මේ දවස් වල ස්පෑම් කමෙන්ට්, අනවශ්‍ය කමෙන්ට් ඕනා තරම්.. Blogger පා‍විච්චි කරන අයට ඔන්න සුබ ආරන්චියක් තියේ.. Blogger විසින් අලුත් comment system එකක් හඳුන්වා දී තියෙනවා.

Blogger Dashboard එකට ගියාම අපේ බ්ලොග් එක යටතේ අලුත් ලිංක් එකක් දකින්න පුලුවන් Comments කියලා.

Comments වලට ගියාම මෙන්න මෙහෙම පිටුවක් එන්නේ..

කරන්න තියෙන දේ බොහොම සරළයි. අනවශ්‍ය කමෙන්ට් Tick කරලා Spam කියන එක click කරන්න. එතකොට‍ ඒ comment spam කියන තැනට යනවා. එකම පුද්ගලයා කරදරයක් වගේ comment කරනවා නම් එයාව කිහිප වරක් spam කරාම පස්සෙ ස්වයංක්‍රීයවම spam වෙනවා..

මේ වගේම තමයි Link තියෙන සමහර comment Spam කියලා හිතලා Spam ගොඩට වැටෙන්න පුලුවන්. ඒ වගේ වෙලාවට ඒ comment තෝරලා Not Spam කියන එක ක්ලික් කරන්න ඕනා. එතකොට‍ ඒවා සාමාන්‍ය කමෙන්ට් අතරට යනවා.

මේ පහසුකම තවමත් සංවර්ධනය වෙමින් පවතින්නේ.. අපිට Spam Comment තෝරලා මේකට feedback එකක් දෙන්න පුලුවන්. එහෙනම් ඉතිං ප‍ටන්ගමු නේද කරදරකාරයෝ ටික Spam කරන්න??

Time travel to DOS games [Part 2] | ඩොස් ගේම් වෙත කාලතරණය [2වන කොටස]

2010-08-26T17:10:00.003+05:30

Time travel to DOS games [part 1] | ඩොස් ගේම් වෙත කාලතරණය [1වන කො‍ටස] පලමු කොටස කියවපු නැති අය මෙතනින් ගිහින් මුලින් ඒක කියවලා බලන්න. :)

හිතුවට ව‍ඩා කට්ටියක් මාත් එක්ක අතිතෙට ගියපු නිසා මහන්සි නොබලා පෝස්ට් එකේ දෙවනි කො‍ටසක් ලියන්න වහාම තීරණය කරා ඔන්න. නොලියා හිටපු ගේම් ගැන ලියන්න බල කිරීම ගැන කුෂාන් අයියාට ස්තුති කරන්න ඕනා..

මගේ 486 එක තිබ්බ කාලේ දිවුලපිටියට මහපොලක් ආවා. ආයෙ වෙන වැඩක් නෑනෙ. පවුල් පිටිං මහපොල බලන්න ගියා. ඒ කාලෙ CD එහෙම මැජික් වගේ තමා. මෙන්න බොලේ මහපොලේ තියේ සීඩී කඩයක්. බලලා බලලා අන්තිමට Sega Games CD එකක් ගත්තා. (CD එක තාමත් ලඟ තියේ, මම ගත්තු පලවෙනි CD එකද කොහෙද :D ) රුපියල් 150ක්ද කොහෙද CD එක. සන්ත‍කේටම තිබ්බෙත් එච්චරයි.. සල්ලි වගේද CD එක. :D කොහොම හරි ඕකත් අරං ගෙදර ආවා. CD එක දාලා බැලුවා පිස්සු හැදෙන DOS ගේම් කලෙක්ෂන් එකක් තිබ්බේ. සමහර ඒවා වැඩ. සමහර ඒවාට Memory මදිලු. (486 එකේ RAM එක 16mb) ඒ ටිකේ මම පිස්සුවෙන් වගේ ගහපු ගේම් ටිකක් ගැන තමා දැං කියන්න යන්නේ..

එකක් තමා Aladdin. නම වගේම තමා. ඇලඩින් ඉන්නවා, කුමාරිව ද කොහෙද බේරගන්න තිබ්බා. 2d ගේම් එකක් උනාට graphics නම පිස්සු වගේ. මාර ලස්සනට ඇනිමේට් කරලා තිබ්බා.

Aladdin නම් මුලින් ලේසි උනත් අග හරියට යනකොට ටිකක් විතර ගහන්න අමාරුයි. අද තමයි මම Aladdin ගේම් එකේ Sounds, Music ඇහුවේ. 486 එකේ තිබ්‍බ sound card එක මේකට සපෝට් කරලා නැද්ද කොහෙද.

ඇලඩින් ගහන අස්සේ මට Floppy disk වල දාගෙන ආපු ගේම් මතක් වෙනවා. මම ආසම කරපු ගේම් එකක් තමයි Galacta.

මම දන්න තරමින් මම ඉවර කරපු එකම dos ගේම් එක තමා Home alone 2. ඒකත් මාස ගානක් ගහලා.
මට මුලින්ම ගහපු ගේම් එක තමයි Pack man. හැබැයි මට මතක විදිහට ඒක windows version එකක්. Packman වගේම එකක් තමයි CD Man 2, ඒ දවස් වල මේක මමයි මල්ලියි 2 player දාලා ගහන්නේ. මේ ගේම් එකට නම් මම තාමත් ආසයි. මාර ලස්සන Levels ‍ටිකක් තියෙන්නේ.

මේ Snap ඔක්කොම Realtime ගන්න ඒවා. Dosbox එකෙන්. :D

තව මම මාර ආසාවෙන් ගහපු ගේම් එකක් තමයි CHAOS. මේක නං සිරා Strategy ගේම් එකක්. Dos වල මේ වගේ Strategy ගේම් මම ගොඩක් අඩුවෙන් දැකපු දෙයක්. මේක නං ආයෙ සිරා.. කියලා වැඩක් නෑ.. ගේම් එක දැක්කම මැරෙන්න හිතෙනවා. :D

Screenshots ගන්න ගිහින් පැය බාගයක් විතර ගේම් එකත් ගැහුවා ඕං :D. ‍මේ ගේම් ඔක්කොම එලටම සෙට් උනේ මගේ 486 එකේ හාඩ් එක පිච්චුනා‍‍ට පස්සෙ. ඒ දවස් වල මගේ පිහිටට තිබ්බේ win 98 startup disk එකයි මගේ Sega ගේම් cd එකයි තමා.

මේ ගේම් ගහන අස්සේ තියෙන පරන ‍‍ගේම් ඔක්කොම මතක් වෙනවා.. කට්ටිය Lion king කාටුන් එක බලලා ඇතිනේ.. මේ තියෙන්නෙ ඒකෙ dos ගේම් එක. ඇරපු අතක් නෑ. ‍කාටුන් එකම තමා. මේකෙ විශේෂත්වය තමා ‍level එකෙන් level එකට සිංහ පැ‍‍ටියා ලොකු වෙනවා. තව විශේෂ හැකියාවනුත් ලැබෙනවා..

ඒවා එහෙම වෙනකොට කුෂාන් අයියා කියපු Stunts ගේම් එක මතක් වෙනවා. මම ඒ දවස් වල ඕකට කිව්වේ 4D sports කියලා. මේකෙ අපිට ඕන විදිහට පාරවල් හදාගෙන රේස් පදින්න පුලුවන්. ඒ දවස් වල නං තිබ්බ සිරා ගේමක් තමා.

තව කියනවා නං ගේම් ඕනා තරම්. සමහර ගේම් වල නම් අමතක උනත් ගේම් එක කවදාවත් මතකයෙන් ඈත් වෙන්නෙ නම් නෑ, මට මගඇරුන හොඳ ඩොස් ගේම් තව ඇති. එහෙම ඒවා තියේ නම් දන්න අය මතක් කරන්නකෝ.

Time travel to DOS games | ඩොස් ගේම් වෙත කාලතරණය

2010-08-25T11:28:00.002+05:30

DOS ගේම්,මේවා ඇත්ත‍ටම අපි අතරින් සෙමෙන් ඈත්වුනු සුන්දර දෙයක් කිව්වොත් මම නිවැරදියි කියලා හිතනවා. Ms DOS, පුද්ගලික පරිගණක සඳහා හදුන්වාදීමත් සමග අප අතර ජනප්‍රිය උන මේවා windows 95, 98 කාලය දක්වාම අප අතර පැවතුනා. තාක්ෂණයේ දියුණුවත් එක්ක අලුත් පරිගණක ක්‍රීඩා මගින් මේවා ප්‍රතිස්ථාපනය උනත් තවමත් ඒවායේ අගය නම් අඩු වෙලා නෑ. ඉතිං මම තීරණය කලා මේ ගැන මගේ අත්දැකීම් ඔයාලා එක්ක බෙදා හදා ගන්න.

කොම්පියුටරේ ගන්න කලින් TV game පාවිච්චි කරලා තිබුන නිසා ගේම් එකක් ගහන්නේ මෙහෙමයි කියන අයිඩියා එක තිබුනා. ඒ දවස් වල TV game එකෙත් මගේ ආසම ගේම් එක තමයි Super Mario. මගේ මුල්ම කොම්පියුටරය ගැන මගේ කොම්පියුට‍ර් ඉතිහාසය ලිපියෙන් බලාගන්න පුලුවන්. ඉතිං ඕක ගෙනාපු දවසෙ පිස්සු වගේ තමා. මුලින්ම කලේ අල්මාරියෙ දාලා තිබ්බ Floppy disk ටික ගන්න එක. ඒ කාලේ ම‍ගේ පුරුද්දක් තිබ්බා සල්ලි තියෙන වෙලාවට floppy disk අරන් එහෙන් මෙහෙන් ඒවාට games කොපි කරලා තියාගන්න එක. කොහොම හරි Mario ගේම් එක දාලා පටන් ගත්තා. ආයෙ මොනවද ඉතිං, TV ‍ගේම් කැලේ. අනික dos වල පාවිච්චි උනේ 8bit colors. ඉතිං හොඳ වර්ණ සංකලනයක් එක්ක ලස්සන ගේම් හදලා තිබ්බා.‍

මේ කාලේ 3D ගේම් එච්චර ප්‍රසිද්ධ වෙලා තිබ්බෙ නෑ. තිබ්බත් Graphics අන්තිමයි. 2D ගේම් තමා මේ කාලෙ නැගලා ගියේ. දැං තියෙන ගේම් එක්ක බලනකො‍‍ට මේවා මොනවද කියලා සමහර කෙනෙක්ට හිතෙන්න පුලුවන්. ඒත් මේ DOS ගේම් වල එක විශේෂත්වයක් මම දකිනවා. අපි දැන් ගහන ගේම් එකක් සාමාන්‍යයෙන් කොහොම හරි ඉවර කරන්න පුලුවන්. ඒත් මම තාමත් මේ එක dos ගේම් එකක් වත් අවුරුදු ගානක් ගහලත් ඉවර කරලා නෑ. ඒ වගේම මේවයි තියෙන අනික් විශේෂත්වය තමයි ආරම්භය ඉතා සර‍ළව පටන් අරන් අවසානය අති දුෂ්කර විදිහට නිම කරන්න සකස් කර තිබිම.

මේ වගේම මම තවත් ආස කරපු පුංචි ‍ගේම් එකක් තමයි Dangerous Dave. Dave 1 කියලා තමයි අපි නම් කිව්වේ..

මේකෙත් level 10ක් තියේ. 9ට යනකන් ගැහුවා. ඒත් ඉවර කරන්න බැරි උනා. ඉවර කරපු කෙනෙක් ඉන්නවා නම් කියන්න :D Dave 2 , dave 3 කියලා ගේම් දෙකකුත් ආවා. ඒ දෙකත් කියලා වැඩක් නෑ.

මේ දවස් වෙනකොට‍ 3D ‍ගේම් එහෙමත් ජනප්‍රිය වෙන්න පටන් අරන් තිබ්බේ. පුද්ගලික පරිගණකයකට සකස් කරපු පලමු 3d ගේම් එක හැටියට හැදින්වෙන්නේ 3D Monster maze කියන ‍ගේම් එක. මේක සාමාන්‍ය පරිගණකයක නම් ක්‍රියා කරවන්න හැකියාවක් තිබ්බෙ නෑ. Sinclair ZX81 කියන පරිගණකයට තමයි මේක විශේෂයෙන් සකස් කරලා තිබුනේ. අපි දැනට පා‍විච්චි කරන සාමාන්‍ය පරිගණකයක ක්‍රියා කරන 3D ගේම් එකක් විදිහට ආවෙ wolfenstein 3D කියන ගේම් එක.

මම කලින් කිව්වා මතකනේ floppy disk වලට ගේම් එකතු කරන පුරුද්දක් තිබ්බා කියලා. කොහොම හරි දවසක් මේ ගේම් එක ගන්න ගිහින් ලොකු අමාරුවක වැටුනා.ගේම් එක 1.44mb වලට වඩා වැඩියි. ඒ පාර floppy disk දෙකකට කොපි කරන්න බැලුවා. ඒත් බෑ. එක file එකක සයිස් එක 1.5mb විතර. ඉතිං දැං මොනවා කරන්නද. ගේම් එකත් ඕනා, floppy disk එකේ ඉඩත් නෑ. අන්තිමට මට උදව්වට ආවෙ windows 95 වල ආපු Disk compression tool එක. ඒකෙන් floppy disk එක compress කරලා කොහොම හරි කොපි කරගත්තා.

මම ආස කරපු තව ගේම් එකක් තමයි Prince of Persia. ආ කට්‍ටිය බලනවා ඇති Prince of persia වල dos ගේම් එකකතුත් තිබ්බද කියලා. එකක් නෙමෙයි දෙකක්ම තිබිලා තියෙනවා. ‍මේක මුලින්ම හදලා තියෙන්නේ Apple II කියන පරිගණකයට 1989දී. අවුරුද්දකට විතර පස්සේ Atari හා DOS වගේ platform වලටත් නිකුත් කරලා තියෙනවා. Prince of persia 2 කියලා මේකෙ දෙවනි කොටසත් 1993 දී නිකුත් උනා.

Dos ගේම් ගැන කියනවා නම් ඉතිං ලිපි ලියන්න පුලුවන් ඕනා තරම්. ගොඩක් අය මේ ගේම් දැකලා වත් නැතුව ඇති. ඒත් මම නම් තාමත් මේවාට ආසයි. DOS box දාගෙන තාමත් මේවා සෙල්ලම් කරනවා. මේ වගේම මම ආස කරපු තව ගේම් තමයි Commander Keen, Jazz jack rabbbit, Budo(shadow night), Bomber man (මේක නං සිරා) Lion king, Jungle book, Galacta.. ඇයි තව Prehistorik 2 :D මේකෙ නම් screenshot එකක් දානවාමයි. මේකෙ ඉතිං පොල්ලෙං ගමක‍ට නෙලන්න තමයි තියෙන්නෙ :D

ආස කෙනෙක් ඉන්නවා නම් DOS box දාලා මේවා play කරලා බලන්න පුලුවන්. මේවා තාමත් අන්තර්ජාලයේ තියෙනවා. මට මගඇරුන ‍හොඳ ගේම් තියේ නම් අපේ කට්ටය මතක් කරන්නකෝ. Game හොයාගන්නම බැරි නම් comment එකකින් කියන්න. මගේ ගාවත් හොඳ dos ගේම් collection එකක් තියේ.

[Update]

කට්ටිය ගේම් හොයන නිසා මේ ගේම් ඩවුන්ලෝඩ් කරන්න පුලුවන් සයිට් කීපයක් දෙන්න හිතුවා. මේ සයිට් වල සර්ච් කරලා බැලුවොත් ඕන ගේම් එකක් හොයාගන්න පුලුවන්.

(Google කරලා බලන්න. හොයන්න බැරි දෙයක් නෑ :D )

Atari |‍ පරිගණක ක්‍රීඩා‍වේ අතීතයට යමු

2010-08-24T08:30:00.011+05:30

මේ ටිකේ නිවාඩු නිසාත්.. කරන්න වැඩක් ඇත්තෙම නැති නිසාත් මම තිරණය කලා බ්ලොග් එක පැත්තෙ පොඩ්ඩක් කැරකෙන්න. නැත්තං මේ යන විදිහට ගියොත් මාවත් සිංහල බ්ලොග් අවකාසයේ අවලංගු කාසියක් වෙන්න බැරි නෑ

කලිං පෝස්ට් එකේ දාපු Commodore PET එක කට්ටියට අල්ලා ගියපු නිසාත්, අපේ Confiuzd ප්‍රෝග්‍රැමර් ගේ ඉල්ලීම පිට‍ත් අද මම Atari ගැන ලියන්න තීරණය කරා. සරළව හඳුන්වනවා නම් Atari කියන්නෙ පරිගණකයකටත් වඩා game console එකක්. නමුත් මේක තමයි මයික්‍රොප්‍රොසෙසරයක් සහිත පලවෙනි පරිගණක ක්‍රීඩා පද්ධතිය.

Atari VCS කියලා මුලින්ම වෙලඳපොලට නිකුත් උන (පස්සේ Atari 2600 කියලා නම වෙනස් උනා) මේ game console එක මුලින් නම් ඒතරම් ජනප්‍රිය නොවුනත් අවුරුදු කීපයකට පස්සේ මිලියන 8කට වඩා විකිනිලා තියෙනවා. ඔය මැද්දෙං ඔබලා වගේ තියෙන්නේ ඒ ඒ game එකට අදාල cartridge එක. සමහර විට ඔයාලා‍ට මතක ඇති මීට අවුරුදු 10කට විතර කලිං අපි අතරෙත් TV game system තිබ්බා. ඒවයිත් තිබ්බේ මෙන්න මේ වගේ cartridge.

මේකෙ Keyboard input එකක් වෙනුවට තිබ්බේ Joystick දෙකක්. (2ක් තිබ්බේ දෙන්නෙක්ට තමා) මොනිටර් පා‍විච්චියක් තිබ්බෙම නෑ. කෙලින්ම TV එකට ගහලා වැඩ පටන් ගන්න තිබ්බේ. හැබැයි ඒ දවස් වල ඔය මෙගා ටෙලි නාට්‍ය තිබ්බෙ නැති නිසා හොඳට හිටියා.

කොහොම හරි Atari 2600 එකේ සාර්ථකත්වය නිසාම Atari හදපු සමාගම මේක වැඩි දියුණු කරන්න යොමු උනා. ඒ උත්සාහයේ ප්‍රතිඵලයක් විදිහට තමයි Atari 400 කියන PC එක නිශ්පාදනය කෙරුනේ.

Atari 400 පරිගණකය On කරාම අපිට දකින්න ලැබෙන්නේ සාමාන්‍ය text editor එකක් විතරයි. අනිකුත් මෘදුකාංග ක්‍රියාත්මක කරවීමට අවශ්‍ය නම් ඒකට අදාල cartridge එක පාවිච්චි කරන්න සිදුඋනා. පරිගණක ක්‍රීඩාත් මේවාට‍ ඇතුලත්. Atari 400 හි ඇති ප්‍රධානම වෙනස වෙන්නේ එහි තියෙන keyboard එක. නමුත් මේකෙත් joystick පාවිච්චි කරන්න ඉඩපහසුකම් සලසා දී තිබෙනවා. (මට නම් keyboard එක දැක්කාම ගේම් එපා උනා). කොහොමත් game ගහන්න පුලුවන් joystick වලින් විතරයි.

Atari 400 පරිගණකයේ තාක්ෂණික තොරතු‍රු මෙන්න මෙහෙමයි.

CPU:

MOS 6502,1.8MHz

RAM:

8K base, 48K max

Display:

24 X 40 text

320 x 192 monochrome

160 x 96 with 128 colors

Expansion:

2 internal expansion slots

1 cartridge slot under front cover

Ports:

4 controller ports

TV video output

Storage:

external floppy drive

cassette recorder

OS:

Atari OS

කොච්චර උනත් මෙයාලත් කැසට් එක නං අමතක කරලා නෑ.Commodore වගේම තමා. මේකට පොඩි Printer එකක් එහෙමත් සම්බන්ධ කරන්න පුලුවන් වෙලා තිබිලා තියෙනවා.

Atari 400 ගේ ලොකු අක්කා Atari 800. හැබැයි අක්කා ආවේ නංගිට පස්සෙ

Atari 800 හි විශේෂත්වය තමයි ප්‍රධාන මයික්‍රොප්‍රොසෙසරයට අමතරව sound හා Video සඳහා අතිරේක ආධාරක processor සම්බන්ධ කර තිබීම. මේකෙන් ප්‍රධාන ප්‍රොසෙසරයේ Load එක අඩු කරන්න හැකියාව ලැබුනා. ඒ වගේම මේ පරිගණක වල cartridge වල තියෙන්නෙ ROM නිසා කෙලින්ම සම්බන්ධ කරපු ගමන් වැඩ කරන්න පුලුවන්. ඒ වගේම මේකට Modem එකක්, numeric pad එකක් එහෙමත් සම්බන්ධ කරන්න පුලුවන් වෙලා තියෙනවා.

Atari 800 අක්කාම පොඩ්ඩක් මොඩිෆයි කරලා Atari 800XL කියලා පරිගණකයක් නිකුත් උනා. ලොකු වෙනසක් නොවුනත් පෙනුම ටිකක් වෙනස් කරලා RAM එක 64k දක්වා වැඩි කරලා තියෙනවා. ඊට අමතරව parallel I/O port (PBI) හා general purpose I/O port එකක් ඇතුලත් කරලා තියෙනවා.

කොච්චර කතා කරත් Atari එකක් වැඩ නොකර ඒ අත්දැකීම ගන්න බෑනෙ. ඒක නිසා Atari එකටත් Emulator එකක් දෙන්න තීරණය කලා. මේක install කරාට පස්සෙ ඒ ඒ cartridge වලට අදාල files open කරන්න පුලුවන්.

Download Stella (Emulator)

මේක Commodore emulator එක තරම් ගතියක් නැති උනත් Atari ගැන අදහසක් ගන්න පුලුයවන්.

අවශ්‍ය ROM files මේ වෙබ් පිටුවෙන් Download කරන්න.

Downlaod Apps

reference : www.oldcomputers.net

Commodore PET | කොමඩෝර් පෙට්

2010-08-23T08:30:00.001+05:30

හැමදාම හාඩ්වෙයා ගැන ලියනකොටත් කට්ටියට එපා වෙනවා. මටත් දැං ලියන්න අනං මනං හිතට එන්නෙම නෑ. බ්ලොග් එකට ගියොත් මතක් වෙන්නෙම හාඩ්වෙයා පාඩමක්. මෙහෙම ගියොත් කණියාගේ සටහන, කණියාගේ හාඩ්වෙයා සටහන කරන්න වෙයිද දන්නෑ. කොහොම හරි මේකත් හාඩ්වෙයා වල ගෑවීගෙන යන එකක් තමා.

මොකක්ද මේ Commodore PET කියන්නෙ?? පරිගණකයේ ඉතිහාසය දන්න කෙනෙක්ට නම් මේ නම අලුත් දෙයක් නෙමෙයි. සරළව කියනවා නම් 70 දශකයේ අග භාගයේ තිබුන පට්ට කොම්පියුටරයක් කියලා කියන්න පුලුවං. ඇත්තටම මම මේ පරිගණක වලට ආස කරන‍නේ ඒවායේ තියෙන සරළ බව නිසාමයි. අද කාලෙ වගේ සංකීර්ණ නෑ. පල්ලෙහායිං තියෙන්නෙ Commodore PET එකක් තමා. (PET කියන්නේ Personal Electronic Transactor )

දැං අපි මේකෙ තාක්ෂණික තොරතුරු ටිකක් හොයලා බලමු.

CPU         : 1 MHz
RAM        : 4kb, later 8kb
Display    : 40 * 25 text (9" display)
Ports    : IEEE-488, Cassette parallel, system bus
Storage    : Built in cassette
OS       : BASIC in ROM

Commodore PET පරිගණකයේ මෙහෙයුම් පද්ධතිය BASIC (Beginner's All-purpose Symbolic Instruction Code). වින්ඩෝස්, ලිනක්ස් ගැන නම් අහලා තියේ ඒත් මේ බේසික් කියන්නෙ මොකක්ද? ඒ කාලයේ ඕනෑම පරිගණකයක් පාවිච්චි කරපු කෙනෙකු‍ට තිබුනු අවශ්‍යතාවයක් තමයි තමන්ට අවශ්‍ය කාර්යය සිදු කරගැනීමට custom software සකස් කිරීම. මේකට ප්‍රධානම හේතුව ඒ කාලයේ දැං වගේ එක එක මෘදුකාංග නොතිබීම. ඉතිං BASIC වල වැඩ කරන්නෙ කොහොමද. DOS වල වැඩ කරපු කෙනෙක්ට නම් පෙනුමින් BASIC වල ලොකු වෙනසක් දැනෙන එකක් නෑ. නමුත් අභ්‍යන්ත‍රයේ නම් ලොකු වෙනසක් තියේ.

BASIC ගැන කියලා දෙන්න ගියොත් වෙනම ලිපියක් ලියන්න වෙනවා.

මේකෙ Storage එක ගැන කතාකරන්නම ඕනා. සාමාන්‍යයෙන් පරිගණකයක තියෙන්නේ Hard disk එකක් (පරණ ඒවයි Floppy disk පාවිච්චි උනා). නමුත් මෙහි මුලින් පාවිච්චි උනේ Cassette එකක්. (සිංදු අහන්න වෙන්ඩැති ‍නේද? :D ) හැබැයි පහු කාලෙක 5.25" floppy disk භාවිතා කරලා තියේ.

මේ තියෙන්නෙ PET එකේ ඇතුල

මම හිතනවා කට්ටියට අඩුම තරමේ මේක කියෙව්වා‍ට පස්සෙ Commodore PET එකක වැඩ කරලා බලන්න ආස හිතෙනවා ඇති කියලා. ඒත් ඉතිං අපිට කොයිංද නේද PET. දුක් වෙන්න දෙයක් නෑ Commodore PET simulator එකක් තියේ. බාගෙන අත්දැකීම විඳගන්න පුලුවන්.

Download VICE simulator

මේකෙ අතුරු මුහුනත් කිපයක් තියේ.. අත්හදාබැලීම් කරන්න. ටික වෙලාවකට අතීතයට ගියා වගේ දැනේවි. BASIC ගැනත් පොඩ්ඩක් ඉගෙනගෙනම වැඩේට බැස්සා නම් හරි.

Reference : http://oldcomputers.net/pet2001.html

පරිගණක හාඩ්වෙයා පාඩම - 10

2010-08-15T15:17:00.001+05:30

අපි පසුගිය පාඩම් වලින් AT හා ATX බල සැපයුම් පද්ධති ගැන ඉගෙන ගත්තා. අද අපි සාකච්ඡා කරන්න බලාපොරොත්තු වෙන්නේ පරිගණකයකට නිවැරදි Power supply unit එකක් තෝරාගන්නේ කොහොමද යන්නයි. සාමාන්‍යයෙන් කේසින් එකක් මිලදී ගන්නා විට අපට ඒ සමගම Power supply unit එකක්ද ලැබෙනවා. නමුත් ගුණාත්මක තත්වයේ බල සැපයුමක් බලාපොරොත්තු වෙනවා නම් වෙනමම Power supply unit එකක් මිලදී ගැනීම වඩාත් සුදුසුයි. අපි මුලින් ඉගෙන ගත් පරිදි සාමාන්‍යයෙන් අලුත් පරිගණකයකට අවශ්‍ය වන්නේ 24pin මාදිලියේ ATX power supply එකක්. Power Supply unit එකක් මිලදී ගැනීමේදී පහත කරුණු වෙත අපේ අවධානය යොමු කරන්න අවශ්‍යයි.

1. Power supply එකේ ක්ෂමතාව (Watt අගය).
2. Power supply එක ක්‍රියාකරන වෝල්ටීයතාවය.
3. Form factor එක.
4. Power outlet ප්‍රමාණය

1. Power supply එකේ ක්ෂමතාව (Watt අගය)

Power supply unit එකක් මිලදී ගැනීමේදී සැලකිය යුතු ප්‍රධානම කරුණක් තමයි එහි ක්ෂමතාවය. බොහෝ දෙනෙකු දරන මිත්‍යා මතයක් තමයි නිතරම වැඩි watt අගයකින් යුතු power supply එකක් භාවිතා කල යුතුබව. අඩු load එකක් යටතේ බොහෝවිට power supply එකක් එහි උපරිම කාර්යක්ෂමතාවයෙන් ක්‍රියාත්මක වෙන්නෙ නෑ. මේ නිසා අපි හැමවිටම තෝරාගත යුත්තේ අපේ අවශ්‍යතාවයට ගැලපෙන power supply unit එකක්. සාමාන්‍යයෙන් අපි භාවිතාකරන desktop පරිගණකයකට අවශ්‍ය ක්ෂමතාවය වො‍ට් 350කට වඩා වැඩි වෙන්නේ නෑ. නමුත් දැනට මිලදී ගැනීමට ඇති බොහෝ කේසින් සමග එන power supply 400W, 450W වැනි අගයන්ගෙන් යුක්ත වෙනවා. මේවා උසස්ම තත්වයේ power supply නොවුනත් 80%ක වත් කාර්යක්ෂමතාවයක් බලාපොරොත්තු විය හැකි නිසා සාමාන්‍ය පරිගණකයකට භාවිතා කිරීමේ ගැටලුවක් නෑ.

2. Power supply එක ක්‍රියාකරන වෝල්ටීයතාවය

සාමාන්‍යයෙන් ලංකාවේ ගෘහස්විදුලිබල පද්ධතියේ වොල්ටියතාව 230V අගයෙන් යුක්ත වෙනවා. නමුත් ඇමරිකාව වැනි රටවල් වල ගෘහස්ථ විදුලි පද්ධතියේ භාවිතා වෙන්නෙ 115V වැනි අගයක්. මේ වොල්ටීයතාවයට ගැලපෙන ආකාරයට නිශ්පාදනය කල Power supply unit එකක් සාමාන්‍ය 230V යටතේ භාවිතා කරන්න බෑ. ඒ නිසා Power supply එකක් මිලදී ගැනීමේදී (බොහෝ වි‍ට මෙය සිදු වන්නේ පිට රටකින් පරිගණකයක් ගෙන්වීමේදී) එහි Operating Voltage එක ගැන සැලකිලිමත් විය යුතු ‍වෙනවා. සමහර Power supply වල මේ Voltage එක තෝරන්න වෙනමම ස්විච් එකක් තියෙනවා.

නමුත් වෙලඳපොලේ ඇති බොහෝමයක් මිල අඩු Power supply unit වල මෙම ස්විචයේ ක්‍රියාත්මක වන්නේ 230V කොටස විතරයි. 115V තේරීම සිදුකල විට Power supply එකේ ප්‍රධාන විදුලි සැපයුම විසන්ධි වෙනවා. කෙසේ වෙතත් පරිගණකයක් එකලස් කිරීමේදී මෙම ස්විචය ගැන සැලකිලිමත් විම වඩාත් සුදුසුයි.

3. Form Factor

Form Factor යන්නෙහි සරළ අදහස වන්නේ එම Power supply එකේ ප්‍රමාණයයි. ATX power supply එකක් සම්මත ප්‍රමාණයකින් නිශ්පාදනය වුවත් සමහර විශේෂ අවස්ථා වලදී Power supply එකේ ප්‍රමාණය අප මිලදී ගන්නා කේසිනයට නොගැලපෙන්න පුලුවන්. මෙය‍ බොහෝවිට සිදු වන්නේ භාවිතා කල පරිගණක අමතර කොටස් මිලදී ගෙන එකලස් කිරීමෙදීයි. ප්‍රසිද්ධ වෙලඳ නාම යටතේ එන පරිගණක වලත් බොහෝවිට මේ Power supply එක කුඩාවට නිශ්පාදනය කෙරෙන අවස්ථා තිබෙනවා. එවිට එය අලුතින් දැමීමේදී ඒ ප්‍රමාණයේ power supply එකක් සොයාගැනීමට සිදු වනවා.

4. Power outlet ප්‍රමාණය

සාමාන්‍යයෙන් power supply එකක් තෝරා ගැනීමේදී එහි ඇති Power outlet ප්‍රමාණය ගැන අපි සැලකිලිමත් විය යුතු වෙනවා. සාමාන්‍යයෙන් Hard disk එකක්, CD හෝ DVD drive එකක් සමග පරිගණකයක් එකලස් කරනවා නම් සාමාන්‍ය power supply එකක් ප්‍රමාණවත්. නමුත් Hard disk කීපයක්, Optical Drive කීපයක්, High end Graphic card, අතිරේක සිසිලන පද්ධති වැනි දෑ සම්බන්ධ කරන්න බලාපො‍රොත්තු වෙනවා නම් වැඩි ‍වො‍‍ට් අගයකින් යුතු වැඩි power outlet ප්‍රමාණයක් ඇති බල සැපයුම් ඒකකයක් මිලදී ගත යුතුයි. මෙහිදී 12V සැපයුම සඳහා දැරිය හැකි උපරිම ධාරාවක්ද ඇති බැවින් ඒ පිලිබඳවද සැලකිලිමත් විය යුතු වෙනවා.

Power supply පිලිබඳ අවසන් පා‍ඩමත් සමග ඊලඟ ලිපියෙන් හමු වෙමු..

පරිගණක හාඩ්වෙයා පාඩම - 9

2010-07-31T11:28:00.000+05:30

ගොඩ දවසකින් පෝස්ට් එකක් ලියන්නේ.. කට්ටියට අමතක වෙලාද දන්නෙත් නෑ.. එහෙනම් අපි අපේ හාඩ්වෙයා පාඩමට යමු..

SATA Power connector

SATA - Serial ATA කියන තාක්ෂණයෙන් බල ගැන්වුනු උපාංග සඳහා බලය සැපයීමට භාවිතා වන මෙම cable නව බලසැපයුම් වල සුලබව දකින්න පුලුවන්. මෙහි ප්‍රධානම වෙනස තමයි Molex කනෙක්ටරයේ නොමැති 3.3V වෝල්ටීයතාවයක් ලබා දීමයි. නමුත් දැන් අපට ගැටලුවක් එනවා එතකොට Molex to SATA power converter වල මේ 3.3v සැපයුම නැතුව වැඩ කරන්නේ කොහොමද කියලා. අවශ්‍ය අවස්ථාවකදී භාවිතා කරන්න ඉඩ සලසා ඇති මෙම 3.3V බල සැපයුම බොහෝ නිශ්පාදකයන් මේ සැපයුම භාවිතා නොවන විදිහටයි තමන්ගේ උපකරණ නිශ්පාදනය කරන්නේ. අනික් කාරණය තමයි දැනට තියෙන බොහෝ Hard disk, CD/DVD drive වගේ ඒවා අවශ්‍ය වෝල්ටීයතාවයන් තම පරිපථ තුලින් 12V හෝ 5V බාවිතා කර නිපදවා ගන්නවා. නමුත් මෙම 3.3V භාවිතා වන උපකරණත් නැත්තේම නොවේ.

මෙම කනෙක්ටරයේ pin 15ක් දකින්නට ලැබෙනවා. එහි සැකැස්ම පහත දැකගන්න පුලුවන්.

මෙහි Staggered spinup/ Activity යන්න ඒ සදහා අනුකූලතාවය දක්වන ධාවක සමග ක්‍රියා කරනවා. සාමාන්‍යයෙන් පරිගණකය හා සම්බන්ධිත Hard disk එකක් ක්‍රියා කිරීමට පටන් ගැනීමේදී අධික ධාරාවක් ලබාගන්නවා. මෙම ක්‍රියාත්මක වීම හඳුන්වන්නේ Spin Up නමින්. SATA power භාවිතයේදී සියලු ධාවක එකවර spinup වීම වලකිනවා. ඒ වගේම තමයි මේ මගින් Disk Drive එකක ක්‍රියාකාරි තත්වය පිලිබඳ දත්ත සපයනවා. උදා: ධාවකය කාර්ය බහුල අවස්ථා වලදී.

P4 Power

Pentium 4 මාදිලියේ මවු පුවරු සඳහා අවශ්‍යතාවයක් වන මේ බල සැපයුම් වයරය අතිරේක 12V බල සැපයුම් දෙකක් ලබා දෙනවා. දැනටමත් ඔබට බලසැපයුම් වයර වල වර්ණ හුරුපුරුදු නිසා කහ පැහැති වයර 12 V සදහාත් කලු වයර Ground සඳහාත් වෙන් කර ඇති බව දන්නවා ඇති. සාමාන්‍යයෙන් මෙම බල සැපයුම අවශ්‍ය මවු පුවරු, මෙය නොමැතිව ක්‍රියා කරන්නේ නෑ. මෙම වයරය 24pin ප්‍රධාන සැපයුම් වයරයේ පින් 20 හා සම්බන්ධව එන පින් හතර හා පටලවා නොගත යුතුයි. මෙම කේබල් එක නොමැති ATX power supply වල Molex දෙකක් මගින් අවශ්‍ය බල සැපයුම ලබාගන්න පුලුවන්.

අපි ඊලඟ පාඩමෙන් Power supply unit පිලිබඳව වැඩිදු‍ර ඉගෙන ගනිමු.

පරිගණක හාඩ්වෙයා පාඩම - 8

2010-06-23T07:36:00.003+05:30

ATX බල සැපයුමක මවු පුවරුවට බලය සපයන කොටස පිලිබඳ අපි පසුගිය ලිපියේ සාකච්ඡා කලා ඔබට මතක ඇති. මීට අමතරව Power supply unit එකක තවත් ප්‍රතිදාන කීපයක් තිබෙනවා‍‍. ඒවා පහත දැක්වෙන අයුරින් වර්ගීකරණය කරන්න පුලුවන්.

Standerd Molex connector
Floppy disk drive connector
SATA Power connector
P4 power

Molex connector (male)

සාමාන්‍යයෙන් පරිගණකයක වැඩියෙන්ම දැකගත හැකි Power cable වර්ගය මෙය යැයි කියන්න පුලුවන්. Molex කේබල් එක භාවිතා වන්නේ Hard Disk, CD/DVD Drives, Fans, නවීන VGA card ( මේ සඳහා ‍Molex connector එක වෙනත් connector එකක් බවට පරිවර්තනය කෙරෙනවා.), කුඩා පරිමාණයේ liquid cooling system වැනි උපාංග සඳහායි. SATA power connectors නැති අවස්ථා වලදී molex connector එක SATA power connector එකක් ලෙස convert කරගන්නා අවස්ථාද තියෙනවා. පහත රූපයේ දැක්වෙන්නේ molex to SATA converter cable එකක්. මෙහි තිබෙන molex connetor එක female connector එකක්.

මෙහි ඇති වයර 4න් කහ පැහැති වයරය +12V ද , රතු පැහැති වයරය +5V ද , කලු පැහැති වයර දෙක Ground ද වෙනවා. පහතින් දැක්වෙන්නේ VGA card සඳහා Molex connector වලින් බලය ලබා ගන්නා කේබල් එකක්. මෙහි ඔබට දකින්න පුලුවන් අවශ්‍ය ධාරාව ලබා ගැනීම සඳහා Molex connector දෙකකින් බලය ලබාගෙන ඇති ආකාරය.

Floppy disk drive connector

Floppy Disk drive එක කියන්නේ දැනට අප අතරින් ඈත්වී යන උපාංගයක්. මීට වසර 7,8 කට පෙර නම් මේවා බො‍හෝසෙයින් ජනප්‍රිය වී තිබූ බව සැවොම දන්නා කරුණක්. Floppy Disk drive පිලිබඳ අපි ඉදිරියේ සාකච්ඡා කරනවා. ගොඩක් වෙලාවට මේ අකාරයේ බලසැපයුම් වයර එකයි Power supply එකක දකින්න පුලුවන්. සාමාන්‍යයෙන් මේ cable එක සවි කල විට ලොක් වෙනවා. නැවත ගැලවීමේදී තරමක් දු‍රට පරිස්සම් විය යුතු අතර සොකට් එක ලඟින් ඉහලට ඔසවා ඇදීමෙන් පහසුවෙන් ගලවන්න පුලුවන්.

ඉති‍රි කොටස ඊලඟ පාඩමෙන්... :)

පෝටබල් ස්පීකර් | Portable Speakers

2010-06-09T08:30:00.001+05:30

Portable Speakers කිව්වාම ඉතින් විවිධාකාර ඒවා තියෙනවා. MP3 player, ජංගම දුරකතන වගේම ලැප්ටොප් සඳහාද මේ වගේ portable speakers බාවිතා වෙනවා. ඇයි මේ Portable speaker වල අවශ්‍යතාවයක් ආවේ. අපි දන්නවා ඉස්ස‍ර නම් පොකට් රේඩියෝ අහන්නේ එක්කෝ හෙඩ් ෆෝන් එකකින්, නැත්තං අර කන ඇතුලට රිංගවන Ear-bud වලින්.

‍Head Phone නම් ඉතිං solo ගේම් තමා. Ear-bud නම් ‍හෙන ගේමක් දීලා දෙන්නෙක්ට පාවිච්චි කරන්න පුලුවං. ඒත් ඉතිං ස්ටීරියෝ කාගෙන් හරි ඉල්ල ගන්න වෙනවා මේකට විසඳුමක් විදිහට තමයි Portable speakers පාවිච්චියට ආවෙ.

Portable speakers සාමාන්‍ය Speaker වලින් වෙනස් වන ගුණාංග කීපයක්ම තිබෙනවා. අපි දන්නවා සාමාන්‍ය ස්පීකර් කට්ටලයකට පිටින් විදුලි බලය ලබා දෙන්න ඕනා. ගොඩක් වෙලාවට ගෘහස්ථ විදුලිය බාවිතයෙන් තමා මේවා බලය සපයා ගන්නේ. නමුත් portable speakers මීට වඩා වෙනස් වෙනවා. ඒවා සම්බන්ධ වන උපකරණයෙන් හෝ Speaker ඇතුලත සවි කල හැකි බැටරි මාර්ගයෙන් එහි Amp එකට බලය ලබාගන්නවා. සාමාන්‍යයෙන් පරිගණකයට සම්බන්ධ වන Portable speaker බලය ලබාගන්නේ USB කනෙක්ටර් එක හරහායි.

ඒ වගේම ස්පීකර වල ප්‍රමාණය සලකද්දි සාපේක්ෂව කුඩායි. Portable කියලා තඩි බෆල් ජෝඩුවක් කරේ තියං යන්න බෑනෙ . ඒ වගේම තමයි Portable speakers ගොඩක් වෙලාවට එන්නේ Stereo speakers විදිහට. portable 2.1 සබ් වූෆර් නම් දැකලා නෑ. (තියෙන්න බැරි කමකුත් නෑ )

ඉහත දැක්වෙන්නේ පරිගණකයකට හෝ ලැප්ටොප් එකකට සවි කල හැකි Portable speaker දෙකක්. මෙහි බලය USB port මගින් ලබාගන්නා අතර 3.5mm Audio jack එකක් මගින් Audio signal ලබාගන්නවා.

පහත දැක්වෙන්නේ ජංගම දුරකතන හා mp3 player සඳහා Portable speakers බාවිතා වන ආකාරයයි. මේ‍කෙ phone එකට සෙට් කරලා තියෙන පොඩ් පෙට්ටියේ තමයි Audio Amplifire එක තියෙන්නේ.

Portable speakers වල තියෙන වැදගත්ම ප්‍රයෝජනය තමයි ජංගම දුරකතන හා mp3 player හා බාවිතා කිරී‍මේ හැකියාවයි. නමුත් ජංගම දුරකතන සඳහා ඇති Speaker බලය ලබා ගැනීමට ජංගම දුරකතනයේ බැටරිය භාවිතා කරනවා. mp3 player වලදී නම් බොහෝ විට පාවිච්චි වන්නේ අතිරේක AAA වගේ බැටරි තමයි.

මෙව්වා තමා ඉතිං Portable Speakers ගැන කියන්න තියෙන්නේ. සාමාන්‍ය පරිගණකයකට ගැලපෙන Speaker දෙකක් රුපියල් 400 ඉඳන් ඉහල මිල ගනන් වලට ගන්න පුලුවන්. මේවායේ Sound quality එක පරීක්ෂා කරලා ගන්න පුලුවන්. ඒ වගේම Speaker වල බර වැඩි නම් සාමාන්‍යයෙන් කොලිටි එකත් වැඩියි..

පරිගණක හාඩ්වෙයා පාඩම - 7

2010-06-06T10:55:00.001+05:30

ATX Power Supply

දැනට ඇති එකලස් කරන ලද පරිගණක වල බොහෝසෙයින් පාවිච්චි වෙන්නේ මෙම ATX මාදිලියේ බල සැපයුම් ඒකකයි. ඉහත රූපයේ එම බල සැපයුම් එකකයේ output වයර දැකගන්න පුලුවන්. ඒවා වමේ සිට පිලිවෙලින් ATX motherboard connector, Pentium 4 connector, Fan power connector,SATA power, Standerd Molex connector, Floppy drive power connector වේ. මෙහි පැරණි මාදිලියේ මවු පුවරුවට සවි වන සොකට් එක පින් 20ක්ද දැනට නව මාදිලියේ පින් 24ක් ද දැකගත හැකියි. ඉහත ඇත්තේ පැරණි මාදිලියේ පින් 20 සොකට් එකක්. මවු පුවරුවට බලය සපයන සම්බන්ධක වයර වල රූප සටහනක් පහත දැක්වේ.

මෙහි 24 pin connector එකට එන අතිරේක සම්බන්ධක පින් හතර අංක 11,12,23,24 න් දැක්වේ. ATX බල සැපයුම් ඒකකයක ඇති ප්‍රධානම වෙනස්කම් වන්නේ +3.3V අතිරේක වෝල්ටීයතාවක් ලබා දීමත් Power On signal එකක් මගින් ක්‍රියාත්මක කරවීමට හැකි වීමත්ය. පැරණි AT මාදිලියේදීද මවු පුවරු වලටත් මේ +3.3v වෝල්ටීයතාව අවශ්‍ය උනත් එය මවු පුවරුවේ ඇති Regulator එකක් මගින් නිපදවා ගනු ලැබුනා. මෙහි Power On signal එක high (1) නම් බල සැපයුම් ඒකකය Off තත්වයේ පවතින අතර එය low (0) නම් එය On වේ. මෙම තත්වය ඇති කිරිමට කොල පැහැති power on වයරය Ground කල යුතුය. මෙය මවු පුවරුව මගින් සිදු වන අතර අවශ්‍ය නම් එය කොල වයරය, කලු වයරයක් හා short කිරීමෙන්ද සිදු කල හැකිය. පරිගණකයන් නොමැතිව මේ ආකාරයට ATX power supply එකක් ක්‍රියාකරනවාදැයි පරීක්ෂා කලහැකිය.

අපි තවදුරටත් ATX power supply පිලිබඳව ඊලඟ පාඩ‍මෙන් ඉගෙන ගනිමු

ලොක්කන්ගේ දන්සැල්..

2010-05-28T15:44:00.000+05:30

මම මේ වෙසක් දවස වෙනකන් දැනන් හිටියේ නෑ දන්සැල් කියන ඒවා ‍ලොකු මිනිස්සුන්ටයි පොඩි මිනිස්සුන්‍ටයි වෙන වෙනම තියෙනවා කියලා. ඇත්තටම මේ සටහන දාන්න හිතුනේ අපේ පැත්තේ දන්සැලක් කරන විදිහ දැකලා.

මේක‍ ගොඩක් ඉස්සර ඉඳන් තියෙන දන්සැලක්.. ඉස්සර හැමපාරම දුන්නේ පාන්, සීනි සම්බෝල එක්ක. කොහොම හරි පාන් ගණන් ගියාට පස්සේ අරවා මේවා දෙන්න ගත්තා. ඒත් ගැටලුවක් උනේ නෑ. ගමේ හැමෝම එකතු වෙලයි දන්සැල කරේ. සල්ලි කාරයාගේ ඉඳන් දුප්පත්ම මනුස්සයත් දන්සැලට ආධාර කලා..

ඒත් මේ පාර කට්ටිය බත් දන්සැලක් දෙන්න තීරණය කලා. ගැටලුවකට තිබ්බේ මේ පාර දන්සැලට ආධාර එකතු කරලා තිබ්බේ තෝරාගත් (ලොකුයි කියන) ගෙවල් වලින් විතරයි. අපිව තෝරාගෙන තිබිලා නෑ.. තව අහල පහල ගෙවල් කීපයක්ම තිබ්බා ‍තෝරා‍‍නොගත්‍.. මේකට මූලිකත්වය අරන් තියෙන්නේ සන්ධාන පාර්ශවයේ ප්‍රාදේශීය සභා මන්ත්‍රී වරයෙක් කියලයි ආරන්චිය. වැඩේ කියන්නේ ආධාර එකතු නොකල පවුල් ගොඩක් විරුද්ධ පාක්ෂිකයෝලු.. මම දන්න තරමින් ගෙවල් තෝරලා ආධාර එකතු කරපු එකම දන්සැල වෙන්න ඕනා මේක..

දන්සැලේ සද්දෙත් ඇහෙනවා.. ඒත් යන්න හිතෙන්නෙ නෑ.. ඔන්න ඔහොමයි ඉස්සරහට එන දන්සැල් වල තත්වෙ.. හොද හොඳ සෙල්ලම් එලිවෙන ජාමෙට කිව්වලු :D

පරිගණක හාඩ්වෙයා පාඩම - 6

2010-05-20T08:15:00.001+05:30

අද අපි සාකච්ඡා කරන්නේ පරිගණක කේසින් එකේ ඇති වැදගත්ම කොටසක් ගැනයි. බල සැපයුම් ඒකකය ( Power supply unit ) නමින් හැඳින්වෙන මෙම කොටසින් පරිගණකයේ ඇති සියළුම පාහේ උපාංග වලට බලය ලබා දීම සිදු කෙරෙනවා. ගෘහස්ථ විදුලිය, පරිගණකයට අවශ්‍ය DC current එකක් බවට පරිවර්ථනය කර දීම මෙහි කාර්යය වෙනවා.

දැනට භාවිතයේ Power supply Unit වර්ග දෙකක් දකින්න පුලුවන්.

1. AT Power supply

යාන්ත්‍රික ස්විචයක් භාවිතයෙන් ON / OFF කල හැකි Power supply මෙම වර්ගයට අයත් වේ. මේවා දැනට භාවිතයෙන් ඉවත්වී ඇති අතර නවීන මවු පුවරු වලට මේවා නොගැලපේ.

2. ATX Power Supply

මවු පුවරුවෙන් ලැබෙන සංඥාවකින් ON / OFF කල හැකි Power supply මෙම වර්ගයට අයත් වේ. දැනට භාවිතයේ පවතින අතර වර්ග කීපයකින් යුක්තවේ.

මුලින්ම අපි AT Power supply ගැන සොයා බලමු.
AT Power Supply

image from www.atxpowersupplies.com

AT (Advanced Technology) වර්ගයේ බල සැපයුම් නිර්මාණය උනේ IBM අනුරූප මාදිලියේ පරිගණක සඳහායි. මෙමගින් වයර 6ක් ඇති වයර කට්ටල 2ක් භාවිතයෙන් +5 V dc, -5V dc, +12V dc, -12V dc යන වෝල්ටීයතාවයන් මවු පුවරුව වෙත ලබා දෙනවා. මෙහිදී විවිධ වෝල්ටීයතාවයන් සඳහා වයර කීපයක් භාවිතා වන බව ඔබට දැකගන්න පුලුවන්. මෙයට හේතුව අවශ්‍ය ධාරාව ලබා දිමට තනි වයරයක් ප්‍රමානවත් නොවීමයි. ඹබට මෙහිදී හමු වන මවු පුවරුවට සවි වන වයර දෙක නම් කෙරෙන්නේ P8 හා P9 ලෙසින්. මේවා මතක තබාගත නොහැකි නම් කල හැකි සරළම‍ දේ වෙන්නේ කලු පැහැති වයර එක ලඟින් සිටින සේ සවි කිරීමයි.

මෙම මවු පුවරු බල සැපයුම් වයර වල වෝල්ටීයතාවයන් පහත රූප සටහනේ දැකගන්න පුලුවන්.

ඉහත රූපයේ GND නමින් හැදින්වෙන්නේ Ground නැතහොත් අපි සාමාන්‍යයෙන් භාවිතා කරනා අර්ත් (Earth) වයරයන් බව සලකන්න. මේවායේ වෝල්ටීයතාව 0 වේ. මීට අමතරව මෙහි PwrGood නමින් වයරයක් (1) ඔබට දැකගන්න පුලුවන්. AT Power supply එකකින් පරිගණකය වෙත යන එකම සංඥාව මෙම PwrGood (Power Good) සංඥාවයි. Power good සංඥාවක අවශ්‍යතාවය අපි මුලින්ම සොයා බලමු. සාමාන්‍යයෙන් Power supply එකක් ක්‍රියාත්මක කල පමණින් එය නිවැරදි වෝල්ටීයතාවන් ලබා දෙන්නේ නෑ.මේ සඳහා ඉතා සුළු කාලයක් ගත වෙනවා. ඉතින් නිවැරදි වෝල්ටීයතාව ලැබෙන්න කලින් පරිගණකය ක්‍රියාත්මක උනොත් සමහරවිට පරිගණකයට හානි වෙන්න පුලුවන්. එමනිදා PwrGood signal එක ලැබෙන්නේ power supply එක නිවැරදිව ක්‍රියාත්මක වීමට පටන් ගත් පසුයි. මෙය සම්බන්ධ වෙලා තියෙන්නෙ සාමාන්‍යයෙන් පරිගණකයේ CPU (මධ්‍යම සැකසුම් ඒකකය) හි Reset pin එකටයි. power supply එක නිවැරදිව ක්‍රියාත්මක වන තෙක් PwrGood signal එක 0 නිසා CPU එක Reset තත්වයේ දිගටම පවතිනවා. නමුත් PwrGood signal එක ලැබුනු විගස CPU එක ක්‍රියාත්මක වී පරිගණකය Boot වීම ආරම්භ වෙනවා.

මෙහි ඇති අනෙක් බල සැපයුම් වයර, නව ATX මාදිලියේද දැක ගන්න පුලුවන්. ඒ නිසා ඒවා පිලිබඳ ATX Power supply මාතෘකාව යටතේ සාකච්ඡා කරන්න බලාපොරොත්තු වෙනවා.

Lanka1's Blog | Islam Srilanka ඉල්ලන් කෑම

2010-05-16T11:54:00.002+05:30

පුංචි සටහනක් දාන්න හිතුනා මට උනු සිද්දියක් ගැන. සාමාන්‍යයෙන් මම ඉඩ තියෙන හැම වෙලාවකම බ්ලොග් කියවනවා. තෝරා බේරා බැලීමක් නෑ.. ඒ අතරෙදි තමයි මේ ඉස්ලාම් ආගම පිලිබඳ තියෙන බ්ලොග් එක දකින්න ලැබුනේ. මෙහි විශේෂ ලිපියක් මගේ ඇස ගැටුනා. ලිපිය "බහුදේව වාදය ඉස්ලාම් ප්‍රතික්ෂේප කරන්නේ ඇයි" ටික දුරක් කියවන් යනකොට කිසිම පදනමක් නැති ලිපියක් බව තේරුනත් (පුද්ගලික අදහසකි) මම පුංචි ප්‍රශ්නයක් අහලා කමෙන්ට් කරා.

"අල්ලාහ් දෙවියන් ඉන්නේ කොහෙද???"

මට පිලිතුර විදිහට මෙන්න මේ වෙබ් අඩවියේ ලින්ක් එකකුත් එහි කොටසකුත් ලැබුනා.

Where Is God?

Some other religions teach "God is everywhere." This is actually called "pantheism" and it is the opposite of our belief system in Islam. Allah tells us clearly there is nothing, anywhere in the universe like Him similar to his likeness, nor is He ever in His creation.

He tells us in the Quran He created the universe in six "yawm" (periods of time) and then He "astawah 'ala al Arsh" (rose up, above His Throne). He is there (above His Throne) and will remain there until the End Times.

Read more..

දෙවනි ඡේදය කියවන් යනකොට මට නැවත ගැටලුවක් ආවා.. "He tells us in the Quran He created the universe in six "yawm" " මේකෙ විදිහට අල්ලාහ් විශ්වය යම් කාලයක් තුල නිර්මාණය කරලා තියෙනවා. ඉතින් මම මෙන්න මේ වගේ දෙයක් නැවතත් ඔහුගෙන් ඇහුවා.

If allah Created universe, where did he stay before creating it? Is it another Universe or A universe that Allah's father made? Bla Bla Bla.. කමෙන්ට් එක ඔය වගේ එකක්...

ගැටලුව තමයි අද බලනකොට කමෙන්ට් එකක් වත් නෑ.. :D කාට මේවා කියන්නද

සංවාදයට විවෘත්තයි..

රට දියුනු කිරීමේ ලාංකීය සිතුවිලි මෙහෙයුමට බාදා..

2010-05-16T06:32:00.001+05:30

කට්ටියම බලනවා ඇති මේ මොකද කියලා.. ලාංකීය සිතුවිලි කවි මඩුව ගැන හැමෝම දන්නවනේ.. කාර්යබහුලත්වය නිසා මට සහභාගි වෙන්න ලැබුනෙ 3 වෙනි දවසෙදි. මාතෘකාව "ලාංකාව දියුණු කල හැකිද? නොහැකිද?" මම කල්පනා කලා මේ ගැන කතාවක් කියන්න.. කවි මඩුවෙත් තියේ. ඒත් මෙතන කතාව පිලිවෙලට බලන්න පුලුවන්..

අලුත් කවියකිනි මම ඇරඹුම ගත්තේ..
ලාංකීය සිතුවිලි කවි මඩු පැත්තේ..
විස්ම කර්ම මග එන බව දැන ගත්තේ..
නොදනිමි කිමද ඇයි අද මේ අරුමැක්කේ..

අප ර‍ට දියුනු කරනා මේ නිවුස් එක
දිවිය ලෝකෙටත් ගිහිල්ලා ඒ ටිකට..
ශක්‍රයාට නැගලා ලුය නහුතයට..
මිනිස්ට්‍රියේ වැඩ වෙන උන් කරනවට.

කවුදෑ යකෝ ලංකාවට අත ගැහුවේ..
මට අහු උනොත් ක්‍රෂ් කරමිය උගේ මොලේ..
සක්‍රයා කියයි උඩ නැගගෙන තම අසුනේ..
දෙව්ලොව කලබලය බලනට මාද ගියේ..

සිරිලක දියුනුවට ගියහොත් අද හෙටම.
මා පත් කල රජා හ‍ට කෙල විය හැකිය..
විස්ම කර්ම මේ දිනවල බොරු බිසිය..
සක්‍රයා සිතයි කෙලවන්නට අපෙ ගේම..

සක්කරයා ලගත් ඇත කලු ලැයිස්තුවක්
කෙලවා දැමිය යුතු රටවල් එහි ඇතුලත්
පුටුව යටින් ගොස් බැලුවෙමි ඒක මාත්
හපෝයි උඩම තිබුනේ අපෙ අමුතු ඇටෙත්..

වන්නට ‍දෙන්න බැරියෝ මේ විනාසය
සක්‍රයා එන්නෙ අප සිරි ලක වනසන්න..
කෙලවා දමන අදිටනකින් ඒ ප්ලෑන..
ඉරා දමා තැබුවෙමි සක්‍රයා හට හූව..

කොචෝක් හිනාවකි දැම්මේ සක්කරයා..
මගෙන් ඇසුවේය උබෙ රට කිමද කියා..
පපුව කෙලින් කොට පෙරටම පැන්න මෙමා..
කිව්වෙමි මමත් අප රට ලං කාව කියා..

තොපලා ගොන් හැත්ත මම එය දන්නේය..
සක්කරයා කියයි මාහට අවලාද..
පොටෝ කොපි නැද්ද තොපෙ රට තුල තාම..
රීකන්ඩිසන් මැසිමක් ඇත අරන් පල..

මාහට නොතේරේ මූ පවසන හරුප..
ලැයිස්තුව නැතිය එය මට අස්වැසුම..
හ‍පොයි දැනුයි තේරෙන්නේ මෙමා හට
සක්‍රයා ගාව කොපි ඇත තව දුසිමකට..

ඉවසා සිටිනු බෑ අද මට මේ චාටර්.
සක්‍රයා ඉදිරීයේ මම වී ඇත පීටර්..
කෙලින් පෙරට ගොස් සක්‍රයා හට මිස්ටර්..
කියා මමත් උනෙමිය ගේමට එන්ටර්..

මතු සම්බන්ධයි.......

My favourite mobile applications (java)

2010-04-30T19:22:00.003+05:30

Mobile phones are very common these days. Most of them have java support. (Most of Chinese brands still doesn't have the java support) Today I'm going to discuss about my favourite mobile applications. Usually I prefer Sony Ericsson mobile phones. Aren't they cute? But still you can use these apps with nokia, anyway most of the apps are great for SE. So.. what are we waiting for? Let's find out

1. Mig33 v 4.2

This is the greatest IM client that i have ever found. Very easy to use, And of course you dont have to use the joystick Insted of using the joystick you can use the keys 2,4,6,8 and 5. Using this application, you can connect to MSN, Yahoo, Facebook and Gtalk. And also the biggest mobile community, mig33. There you can find millions of users and a lot of chat rooms. you can also use this application to send SMS and to make calls for law rates. But it will cost you. Also you can play games and earn mig33 credits and if you want more, there are mig33 merchants and you can use your own credit card for recharging.

2. Opera Mini

Opera mini is a web browser which allows you to have the same experience in web brousing as you are using a computer. Most of the browsers in mobile phones are very slow, hard to use and they have very little options for the user. Opera mini gives you the actual web page with a preview. you can zoom it out and read anything you want. Also it has advance text support which lets sinhala unicode visible.

3. Xcalc

This is another brilliant java application that i have used to keep in my pocket . It is a nice scientific calculator and its really useful when you dont have your ordinary calculator in your hand. It can plot graphs but getting exact points isn't a good idea in a small display. But it's still really helpful to me to have an idea about the graph of a formula very easily. And also there are too many things that you can find out when you are using it .

ඩීවීඩී රිප් කරමු | DVD Ripping

2010-04-19T09:01:00.008+05:30

අපි සැවොම දන්නා පරිදි අද බොහෝ දෙනෙක් ටොරන්‍ට් මගින් ෆිල්ම් ඩවුන්ලෝඩ් කරනවා. බොහෝ වි‍ට මේවා එන්නෙ මෙගාබයිට් 700 පමණ ප්‍රමා‍ණයක ෆයිල් එකක් විදහට. ඒත් ඒවායේ ගුණාත්මක භාවය නම් DVD එකකට ආසන්න තත්වයකින් අපට ලබාගන්න පුලුවන්. ඉතින් ගිගාබයිට් 4.7ක DVD එකක් වෙනුවට මෙගාබයිට් 700ක file එකකින් ඒ දේ කරගන්න පුලුවන් නම් ඒක කොච්චර පහසුවක්ද. මෙතනදි අපේ පිහිටට එන්නෙ DVD Ripping කියන තාක්ෂණය. විකිපීඩියා ශබ්දකෝෂයේ අර්ථ දැක්වීමට අනුව DVD ripper යනු DVD එකක ඇති දත්ත හාඩ් ඩිස්කයට පිටපත් කිරීමේ පහසුකම ලබා දෙන මෘදුකාංගයක්. මේවා ප්‍රධාන වශයෙන් භාවිතා වෙන්නෙ DVD එකක තියෙන වීඩියෝ එක වෙනත් ආකාර වලට පරිවර්තනය කිරීමටයි.

අපි දැන් බලමු අපේම DVD එකක් ඉඩ ප්‍රමාණය අඩු වෙන විදිහට Rip කරගන්නෙ කොහොමද කියලා. මුලින්ම වීඩියෝ කොලිටි එක වැඩි හොඳ DVD එකක් හොයාගන්න වෙනවා. මේ සඳහා ෆිල්ම් 7ක් 8ක් ඇති DVD පාවිච්චි කරන්න එපා. හොඳම ප්‍රතිඵල ලැබෙන්නෙ තනි ෆිල්ම් එකක් හෝ දෙකක් විතර තියෙන, බැලුවම කොලිටි වැඩියි කියන්න පුලුවන් DVD එකකින්. මුලින්ම මේ සඳහා අපි පාවිච්චි කරන ‍Software එක ගැන සඳහනක් කරන්නම්. මේ සඳහා මම පාව්ච්චි කරන්නෙ AutoGK කියන මෘදුකාංගය. මෙහි තියෙන වාසිය තමයි පහසුවෙන් වඩාත් ගුණාත්මක නිමවුමක් ලබා ගැනීමට හැකි වීම. මෙම මෘදුකාංගය Install කිරීමේදී ඊට‍ සම්බන්ධ මෘදුකාංග කීපයක්ම ඒ සමග install වෙනවා. ඒ නිසා පලමු setup එක අවසන් වූ පමණින් එය Run කරන්න යන්න එපා. එයට අවශ්‍ය Codec වැනි අමතර ‍දෑ ස්ථාපනය වන තුරු මදක් ඉවසා සිටින්න. මෘදුකාංගය install කිරීම අපහසු නෑ, එහි එන සැකසුම් ඒ ආකාරයෙන්ම තැබිය හැකියි.

Download AutoGK 2.55

~~Link 1~~
~~Link 2~~

Official Web Page

අපි දැන් DVD ripping වෙත යොමු වෙමු. පහතින් දැක්වෙන්නේ AutoGK ප්‍රධාන මුහුණතයි.

Step 1

මුලින්ම Rip කරන්න අවශ්‍ය DVD එක මෙම මෘදුකාංයට එකතු කරන්න අවශයයි. ‍මේ සඳහා මෙහි Step 1 යටතේ ඇති Input File යන කොටස භාවිතා වෙනවා.
මෙහි අවශ්‍ය file එක විමසා (Browse කර) පෙන්විය යුතුයි. අවශ්‍ය DVD එකේ VIDEO_TS folder එක විවෘත්ත කරගන්න. මෙහි ගොනු පෙන්වන ආකාරය Details ක්‍රමයට සකස් කරගන්න. එවිට අපිට ඒ ඒ ගොනුවේ දිගුව (file extention) බලාගන්න පුලුවන්. AutoGK සඳහා ඇතුලත් කල යුත්තේ .IFO කියන Extention එක ඇති File වර්ගයි. පහත රූපය බලන්න.

මෙහි ඔබට IFO වර්ගයේ ගොනු දෙකක් දකින්න පුලුවන්. මෙම DVD එක එක් චිත්‍රපටයක් ඇති DVD එකක්. මෙහිදී අපි තේරිය යුත්තේ VTS_01_0.IFO නමින් හැඳින්වෙන File එකයි. චිත්‍රපට කීපයක් ඇත්නම් ඒ ඒ චිත්‍රප‍ටය ඇති පිලිවෙලින් VTS_01_0.IFO , VTS_02_0.IFO නමින් ‍file තිබෙනවා. එවි‍ට ඒ අවශ්‍ය ගොනුව තෝරා Open කල යුතුයි. ඉන්පසු Output File එක තේරිය යුතුයි. ‍මේ සඳහා ඔබට කැමති ස්ථානයක් දෙන්න පුලුවන්. නමුත් මෙහිදී අදාල Drive එකේ ගිගාබයිට් 5ක වත් හිස් ඉඩක් තිබිය යුතුයි.

Step 2

මෙහිදී අප Rip කරන චිත්‍රපටයට අයත් විය යුතු Audio Track එක හා Subtitle Track තේරීම සිදු කරනවා. එය තමන්ට කැමති ආකාරයකින් සිදු කරන්න පුලුවන්. Audio track තේරීමේදී තමන්ට අවශ්‍ය එක තෝරාගත යුතු වෙනවා. Audio Track විවිධ භාෂා වලින්ද තිබිය හැකියි. ඒ වගේම මෙහිදී තමන්‍ට අවශ්‍ය භාෂාවකින් Subtitles තෝරාගන්න පුලුවන්. සමහරවිට ඔබ තෝරාගත් DVD එකේ සමහරවිට Subtitle Track නොතිබෙන්න පුලුවන්. නමුත් එහි ගැටලුවක් නෑ. පහත රූපය බලන්න

Step 3
මෙහිදී අපි අපේ Output file එකේ ප්‍රමාණය තීරණය කරනවා. මෙහි තෝරාගැනීම් 3ක් දකින්න පුලුවන්.

PreDefined Size - මෙහිදී AutoGK මෘදුකාංගය මගින් අපිට විවිධ සම්මත ප්‍රමාණ කීපයක් දෙනවා. අවශ්‍ය නම් අපට ඒවා භාවිතා කරන්න පුලුවන්.
Custom Size - මෙහිදී අපගේ උවමනාව පරිදි කැමති File size එකක් ලබා දෙන්න පුලුවන්. අවශ්‍ය File size එක මෙගා බයිට් (MB) වලින් ලබා දිය යුතුයි.
Target Quality (in percentage) - මෙහිදී Output file එකේ ප්‍රමානය නිවැරදිව දැනගත නොහැකියි. නමුත් මේ අගය 67හෝ ඊට වඩා යෙදීමෙන් උසස් ප්‍රතිඵල ගන්න පුලුවන්.

අපි මෙහිදී DVD එකක් 700MB ගොනුවක් බවට පරිවර්තනය කරන නිසා කැමති නම් PreDefined Size වල ඇති 1 CD (700MB) විකල්පය හෝ Custom Size හි 700 ලෙස අගය ලබා දෙන්න පුලුවන්.

Step 4

මෙම පියවරේදී තවත් අතිරේක සැකසුම් කීපයක් කල හැකියි. අපි මෙහි Advanced Settings වෙත යොමු වෙමු.

මෙහි Output resolution settings යනු අපගේ අවසාන ප්‍රතිඵලය වන වීඩි‍යෝ එකේ උස හා පලලයි. මෙය Auto යන විකල්පයෙහි තැබීම සුදුසුයි. Output Audio Type එක 700MB file සඳහා VBR MP3 යන විකල්පය යටතේ 128 kbps යන අ‍ගයෙහි තැබීම සුදුසුයි. Video Codec එක Xvid ලෙසත් අවශ්‍ය නම් Use External Subtitles යන තේරීමත් සිදු කරන්න.

Advanced Settings වලට අමතරව මෙහි Preview යනුවෙන් ඇත්තේ අපට අවශ්‍ය නම් අපේ Video එකේ පෙර දර්ශනයක් ලබා ගැනීමටයි. Video එක තේරීමේදී වැරැද්දක් සිදුවුනේ නම් එමගින් එය සැක හැර දැනගතහැකියි.

අවශ්‍ය සැකසුම් වලින් පසු අප කල යුත්තේ Add job යන්න click කිරීමයි. මෙහිදී ඔබගේ Rip විය යුතු video එක‍ පෙල ගස්වා තැබීමයි. මෙය වැදගත් වන්නේ චිත්‍රපට කීපයක් Rip කිරීමේදීය.
සියල්ල අවසන් වූ පසු Start click කරන්න. සාමාන්‍යයෙන් මේ සඳහා පැය 2 සිට 4 දක්වා පමණ කාලයක් ගත‍ වෙන්න පුලුවන්. මෙහි සිදුවන සියලු දෑ පිලිබඳ මෙහි Log Window එකෙන් දළ අදහසක් ගත හැකියි.
මෙහිදී පලමු වරට Rip කිරීමේදී Encording මෘදුකාංගයේ License Agreement එකට එකඟ වෙන්න වෙනවා. නැත්නම් එතනින් එහාට DVD එක Rip වෙන්නෙ නෑ. ඉන්පසු මේ පිලිබඳ පොඩි හැදින්වීමක් කරනවා. එමගින් Rip කිරීම ආරම්භ කරන්න පුලුවන් (Start VirtualDubMod) . මෙය සිදු කල යුත්තේ පලමු වරට විතරයි.

දැන් සියලු මූලික වැඩ කටයුතු අවසන්. DVD එක Rip වීම අවසන් වූ පසු ඔබටත් ඔබේම 700MB වීඩියෝ එකක රස විඳින්න පුලුවන් :)

පරිගණක හාඩ්වෙයා පාඩම - 5

2010-04-15T11:22:00.003+05:30

Cooling System (සිසිලන පද්ධතිය)

සාමාන්‍යයෙන් පරිගණක භාවිතා කිරීමේදී අප මුහුණපාන ගැටළුවක් තමයි භාවිතයේදී පරිගණකයේ කොටස් රත් වීම. කේසිනයකින් ආවරණය වී තිබීම නිසා හැම වෙලාවකම වගේ ‍කේසිනය තුල පවතින්නේ වැඩි උෂ්ණත්වයක්. මේ ගැටළුවෙන් මිදීම සඳහා පරිගණක කේසිනයක සිසලන පද්ධතියක් ඇතුලත් වෙනවා. මෙම සිසිලන පද්ධති පහල ආකාරයට වර්ගීකරණය කරන්න පුලුවන්.

Air Cooling (වාතය මගින් සිසිල් කිරීම)
Liquid cooling (ද්‍රවයක් මගින් සිසිලි කිරීම)

Air Cooling
බොහොමයක් පරිගණක වල තියෙන්නේ මේ Air cooling SYSTEM එකක්. මෙහිදී භාවිතා වෙන්නෙ Heat Sink සහ Fans යන උපාංග දෙක. සිසිලන කාර්යක්ෂමතාව Liquid coolig වලට වඩා අඩු උනත් සාමාන්‍ය පරිගණකයක් සඳහා Air cooling system එකක් සෑහෙනවා. මෙහිදී විශාල වශයෙන් රත් වන උපාංග වල තාපය උරා ගැනීමට Heat sink භාවිතා වන අතර එම heat sink සිසිල් කිරීම සඳහා Fans පාවිච්චි කරනවා. මී‍‍ට අමතරව කේසිනයේ ඇති රත්වූ වාතය ඉවත් කිරීමටද Fans කීපයක් භාවිතා කෙරෙනවා.

12V Fan එකක්

Heatsink එකකට සවි වූ Fan එකක්

ඉහතින් දැක්වෙන්නේ සාමාන්‍ය පරිගණක කේසිනයක වායු ධාරා ගමන් කරන ආකාරයයි. මේ සඳහා Fan සහ කේසින වල සිදුරු උපයෝගී වෙනවා. පරිගණකය එකලස් කිරීමේදීද මෙම කරුණු පිලිබඳ අප සැලකිලිමත් විය යුතුයි. එසේ නොවුනොත් පරිගණකයේ උපාංග ඕනෑවට වඩා රත්වීම නිසා ඒවා‍යේ ආයු කාලයන් අඩු වෙන්න පුලුවන්. ඒ වගේම රත් වීම නිසා එම උපාංග වල කාර්යක්ෂමතාවයත් අඩු වෙනවා.

Liquid Cooling

අප‍ට තවමත් නුහුරු තාක්ෂණයක් වන Liquid Cooling තාක්ෂණය Air Cooling තාක්ෂණයට වඩා කාර්යක්ෂමතාවයෙයන් වැඩි එකක්. මෙහිදී සිදු වෙන්නෙ වාතය වෙනුවට ද්‍රවයක් භාවිතාවෙන් සිසිලනය කිරීමයි. නමුත් එම ද්‍රවය සිසිල් කිරීමට රේඩියේටරයක් භාවිතා කෙරෙන අතර මෙහි Fan එකක් අඩංගු වෙනවා. මෙහි කාර්යක්ෂමතාවය වැඩියි වගේම මිලත් තරමත් වැඩියි. නමුත් මෙහි වාසි කීපයක්ම තිබෙනවා. ප්‍රධානම වාසිය තමයි අනවශ්‍ය ශබ්ධ වලින් තොර වීම. මීට අමතරව සිසිල් වීම කාර්යක්ෂම නිසා උපාංග වල කාර්යක්ෂමතාවයක් වැඩි වෙනවා. ඒ වගේම මෙමගින් පරිගණකයට ආකර්ෂණීය භාවයකුත් ලැබෙන බව පහත රූප වලින් ඔබට දැකගන්න හැකි වේවි. නමුත් මෙහි ඈති එකම අවාසිය තමයි සිසිල් කිරීමට ගන්නා ද්‍රවය කාන්දු උනොත් පරිගණකයට එයින් විශාල හානියක් වෙන්න පුලුවන්.

Liquid Cooling System එකක අඩංගු වන කොටස්

මෙහි Reservoir යනු සිසිල් කිරීමට අවශ්‍ය ද්‍රවය රඳවාගෙන ඈති ස්ථානයයි. Coolant එක පොම්ප කිරීම Pump එක මගින් සිදු වෙනවා. Radiator එක මගින් රත්වූ ද්‍රවය නැවතත් සිසිල් කරනු ලබනවා. Thermal Lock එක මගින් තමයි රත්වෙන මුහුණ‍තෙහි තාපය පිට‍තට හුවමාරු කරගන්නෙ. මෙම ද්‍රව සිසිලන පද්ධතියෙන් සිසිල් වෙන්නේ ප්‍රධාන ප්‍රොසෙසරය පමණයි. නමුත් මීට වඩා සම්පත් වැඩි ද්‍රව සිසිලන පද්ධති දැකගන්න පුළුවන්.

අපී ඊලඟ පා‍ඩමෙන් කේසීනයේ ඇති වැදගත්ම කොටස වන බල සැපයුම් ඒකකය ( Power supply unit ) ගැන ඉගෙන ගනිමු.

හත්වලාමේ.. අවුරුද්දත් ඇවිත්..

2010-04-13T21:22:00.003+05:30

අවුරුද්ද කියද්දි මට නම් මතක් වෙන්නෙ මගෙ පුංචි කාලෙ.. ඉස්සර අපි අවුරුදු එනකන් ඇඟිලි ගනන් කර කර බලන් හි‍ටියෙ.. ඉස්කෝල නිවාඩු හම්බෙනවා.. ඉතිං ඩෙස් බංකු ගොඩ ගහලා.. කට්ටිය නටලා , දඟලලා.. ‍කොච්චර සංතෝසෙකින්ද ගෙදර එන්නෙ.. ඉතිං ඊ‍ට පස්සෙ..ගෙවල් වල ආච්චිලා.. අම්මලා.. එකතු වෙලා තර‍ඟෙට කැවුම් කොකිස් අරවා මේවා හදනවා.. මතක් වෙනකොටත් ආසයි.. ඒ අස්සෙ රතිඥ්ඥා, අහස් කූරු, නිලා කූරු, බඹර චක්‍ර, චීන පටස් අරවා මේවා.. හැමදේම තාත්තා ගෙනත් දෙනවා. ඇයි අප්පේ ඇඳුම්.. කොයි තරම් සන්තෝසෙකින්ද පුංචි කාලෙ අම්මල තාත්තල එක්ක ඇඳුම් ගන්න ගියේ..

ඔය අස්සෙ අවුරුද්දට මම කරන එක්ස්පෙරිමන්ට් එකක් තියේ.. ඒ තමා රතිඥ්ඥා පරීක්ෂණය.. කට්‍ටිය බලනව ඇති මේ මොකක්ද කියලා. හැමෝම ඉතිං කරන්නෙ පත්තු කරලා වීසි කරන එකනෙ. ඒ දවස් වල මට බැරිත් ඕකමයි.. ඉතිං මම කරේ එක එක විදිහට රතිඥ්ඥා කරල පුපුරවල බලපු එක. පොලවෙ වල දාල පත්තු කරා. ගල් ගොඩවල් අස්සෙ ගහලා පත්තු කරලා බැලුවා. තව ටිං බෙලෙක්ක වල , බිත්ති වල තියෙන සිදුරු වල එහෙමත් ගහලා බැලුවා. වැරදිලාවත් ලිපට නම් දැම්මෙ නෑ ඕං :D

අවුරුදු උත්සව ගැනත් කතා නොකර බෑනෙ. අවුරුදු උත්සව නැති අවුරුද්දක කිසි ගතියක් නෑ කියලයි මට නම් හිතෙන්නෙ.. ඒත් දැන් අවුරුදු උත්සව වලින් අපේ පැරණි තරඟ ගොඩක් අයින් වේගෙන යන්නෙ. ඒ වගේම තමයි අපේ කැවිලි. ගොඩක් ඒවා දැන් හැදෙන්නෙ නෑ.. මේවාට ඉක්මන් පිලියම් යොදන්න වෙයි.. නැත්තම් අනාගතේ මේවා නැත්තටම නැති වෙයි ඕං.

හික්.. මේක අවුරුද්දට කලිං දාන්නත් එපැයි.. :D හැමෝටම සුබ අලුත් අවුරුද්දක් 14 වෙනිදාට වේවා කියලා ප්‍රාර්ථනා කරනවා :)

පරිගණක හාඩ්වෙයා පාඩම - 4

2010-04-06T07:50:00.000+05:30

මීට කලින් ලිපියේදී අපි ඉගෙන ගත්ත පරිගණක කේසින පිලිබඳව. මම පරිගණක කේසීන වර්ගීකරණය කරා ඔබට මතක ඇති. දැන් අපි ඒ විවිධ ‍කේසින පිලිබඳ සොයා බලමු.
මම මුලින්ම Tower casing වෙතත යොමු වෙනවා. මෙහිදී ඔබට මතක ඇති ඒවා කොටස් කරනු ලැබූ වර්ග තුන. මේවා එම කේසින වල ඇති 5.25" bay ප්‍රමාණය අනුවයි බෙදෙන්නෙ. නමුත් මෙහිදී කෙනෙකුට හරියටම ප්‍රමාණ පිලිබඳ සඳහන් කරන්න අමාරුයි. එකිනෙකාගේ උවමනාව අනුවත් මේවා වෙනස් වෙනවා.

Mini Tower (Bay 1 සිට 2 දක්වා)
Medium Tower (Bay 3 සිට 4 දක්වා)
Full Tower (Bay 4ට වැඩි)

ඇතමුන් 5.35" Bay 4ක් ඇති කේසින Full tower ලෙස හඳුන්වනවා. අපි මෙම කේසින වල රූප සටහන් වෙත යොමු වෙමු. පහතින් දක්වා ඇත්තේ පැරණි මාදිලියේ හා දැනට භාවිතා වන Mini Tower Casing දෙකක්.

Mini Tower Casing

ඔයාලට මෙම පැරණි මාදිලියේ ‍කේසීනයේ විශේෂ වෙනසක් දකින්න පුලුවන්. මෙහි සාමාන්‍ය කේසිනයක වගේ මවු පුරවරුවේ Port සඳහා Back panel එකක් නෑ. නමුත් අලුත් Mini tower ATX casing වල එය දක්නට ලැබෙනවා. මෙයට හේතුව වෙන්නෙ පැරණි මවු පුවරු (Mother board) වලට බොහෝ දේ පිටතින් සවි කරන්නට සිදු වීමත් නව මවු පුවරු බොහෝ වෙලාවට සියලුම දේ ඒතුලම අන්තර්ගත කර නිශ්පාදනය කිරීමත්ය. ඔබට කලින් පා‍ඩමේ සඳහන් කලා මතක ඇති Power Supply unit වර්ග 2ක් පිළිබඳව. මෙම පැරණි මාදිලියේ කේසිනය සමග ඇත්තේ AT වර්ගයේ Power supply unit එකක්. power supply unit හඳුනා ගැනීම ඉදිරියේදී අපි සාකච්ඡා කරමු.

Medium Tower Casing

පහතින් දක්වා ඇත්තේ MediumTower casing එකක රූප සටහනක්.‍ මෙහිත් පැරණී AT මාදිලියේ කේසින් තිබුනත් මම ඒ පිළිබඳව සාකච්ඡා කරන්නෙ නෑ. දැනට බහුලවම භාවිතා වන වර්ගයක් වන්නේ මේ Medium tower casing.

මේ වර්ගය කාලයේ අවශ්‍යතාවයට නිවැරදිව ගැලපීම නිසා ‍බොහෝ සෙයින් ප්‍රචලිත වි තිබෙන අතර, සාමාන්‍ය පරිගණක භාවිතා කරන්නෙක්ට අවශ්‍ය සියළුම දේ මෙම කේසිනයේ තිබීම මීට හේතු වෙනවා. කලින් පාඩමේදී මෙහි කො‍‍ටස් පිලිබඳ අපි සාකච්ඡා කලා ඔබට මතක ඇති.

Full Tower Casing

පහතින් දක්වා ඇත්තේ Full Tower Casing කිහිපයක රූප සටහන්. මේවා යම් තරමින් විරල උනත් මේවායේ වැදගත් වාසි කීපයක්ම ඇත. ඒවායිනුත් වැදගත්ම වන්නේ කේසිනයේ ඇති ඉඩකඩයි. මෙම කේසින බොහෝ විට කු‍ඩා සේවාදායක පරිගණක (Server Computers) සඳහා භාවිතා වන අතර පුද්ගලික පරිගණක සඳහාද භාවිතා කිරිමේ කිසිඳු ගැටලුවක් නෑ.

මීලඟ ‍කොටසින් අපි පරිගණක කේසින් වල ඇති cooling system ගැන ‍සොයා බලමු.

පරිගණක හාඩ්වෙයා පාඩම - 3

2010-04-05T14:35:00.001+05:30

මූලික කරුණු රැගත් පාඩම් දෙකකට පසුව අපි අද සිට ප්‍රායෝගිකව පරිගණකයක් එකලස් කිරීම ආරම්භ කරමු. අද අපි අපගේ අවධානය යොමු කරන්නේ පුද්ගලික පරිගණකයේ පද්ධති ඒකක ආවරණය (System unit casing) එහෙමත් නැත්නම් සාමාන්‍ය ව්‍යවහාරයේ පරිදි කේසින් එක ගැනයි. මුල් පාඩමේ අප ඉගෙන ගත් පරිදි පරිගණකයේ බොහෝ කොටස් අසුරා ඇත්තේ මෙම කේසීනය තුල කියල අපි දැන් දන්නවා. අපි පරිගණකයක් එකලස් කිරීම සඳහා කේසින් එකක් මිලදී ගැනීමේදී සාමාන්‍යයෙන් පහත දෑ අපට ලැබිය යුතුයි.

බල සැපයුම් එකකයක් සහිත පද්ධති ඒකක ආවරණයක්. (Casing with a Power supply unit)
විදුලි බලය ලබා දෙන වයරයක්. (Power cord)
අවශ්‍ය වර්ග වල ඇණ සහ මුරිච්චි ඇතුලත් බහාලුමක්. (A packet of Nuts & bolts)

මීට අමතරව කේසිනයේ වවිධ දෑ ඇතුලත් වෙන්න පුලුවන්. පුද්ගලික පරිගණක පද්ධති ආවරණය වර්ග දෙකකින් දක්වන්න පුලුවන්. එනම් Tower Casing හා Desktop Casing ලෙස.
Tower Casing වර්ග 3කට බෙදන්න පුලුවන්. මෙය Form Factor නමින් හදුන්වනවා.

Full Tower
Mid Tower
Mini Tower

දැනට අපි එකලස් කරන පරිගණක වලින් 99%කම භාවිතා වෙන්නෙ මම ඉහත සඳහන් කරපු Tower Casing.‍ මේකට හේතු කීපයක් තියෙනව. ප්‍රධානම හේතුව තමයි කේසිනය තුල සවිවන යම් යම් උපාංග ඊට අනුකූලව නිෂ්පාදනය කිරීම. උදාහරනයක් ලෙස පරිගණකයේ සියළුම කොටස් සවි වන මවු පුවරුව (Mother Board) හඳුන්වන්න පුලුවන්. අනික් කාරණය තමයි යාවත්කාලීන (Upgrade) කිරීමේ පහසුව.

මුලින්ම අපි සාමාන්‍යයෙන් භාවිතා වන කේසිනයක කොටස් හඳුනා ගනිමු..

බල සැපයුම් ඒකකය (Power Supply Unit)

මේවායේ ප්‍රධාන වශයෙන් කොටස් දෙකක් හඳුන්වන්න පුලුවන්,

මෙයින් AT කියන මාදිලිය දැනට භාවිතයෙන් ඉවත් වෙලා තියෙන්නෙ. දැනට භාවිතා වෙන්නෙ ATX කියන මාදිලිය. Power Supply යටතේ අපි මේ පිළිබඳ වැඩිදුර කතා කරමු.

ද්වාර (Bay)

‍මේවා භාවිතා වෙන්නෙ පරිගණකයේ විවිධ Drives (CD/DVD/Blue Ray/Floppy), Memory card කියවනයන් හා තවත් බොහෝ උපකරණ සවි කිරීමටයි. භාවිතා කරන්නාගේ පහසුව සඳහා මෙම bays ඉදිරිපසින් තියනවා. සම්මත bays ප්‍රමාණ දෙකක් දැනට භාවිතා වෙනවා.

5.25"
3.5"

පරිගණක කේසීනයේ CD/DVD වැනි ධාවක සවි කිරීම සඳහා 5.25" ප්‍රමාණයේ bay ද Floppy ධාවක සඳහා 3.5" ප්‍රමාණයේ bay ද භාවිතා කරනවා.

සිසිලන පංකා (Cooling Fans)

ඕනෑම විදුලියෙන් ක්‍රියා කරන උපකරණයක් භාවිතයේදී රත් වන බව අපි සැම දන්නා කරුණක්. පරිගණක කේසිනය තුල නිපදවෙන තාපය එයින් ඉවත් කිරීමටයි මේ සිසිලන පංකා තියෙන්නෙ. ඉහතින් තිබෙන රූපයේ එවන් සිසිලන පංකාවක් සවි කෙරෙන තැනක් දක්වා තියෙනවා.

Back panel

මවු පුවරුවේ සියලු බාහිරින් සම්බන්ධ කල හැකි ද්වාර (ports) සවි වන්නේ මෙම කොටසටය. මෙය ඇත්තටම මවු පුවරුව (mother baord) සදහා ආවරණයක් ලෙස ක්‍රියා කරනව. ද්වාර සියල්ල එක මත එක ඇසිරිය නොහැකි නිසා ඒවා අතට ඇති හිඩැස් වැසීමටයි මෙම කොටස භාවිතා කරන්නේ. කේසීනය සමග එකක් ලැබුනත් බොහෝ විට ඒක මවු පුවරුවට නොගැලපෙන්න පුලුවන්. මෙහිදී අපි සවි කරන්නේ මවු පුවරුව සමග ලැබෙන back panel එකයි.

Expansion Card Slots

ඇත්තටම මෙම කොටස මවු පුවරුවේ ඇති Expansion slots ලෙස වරදවා හඳුනා නොගත යුතුයි. මවු පුවරුවට සවි වන අතිරේක කාඩ්පත් (Sound/Vga/Modem..) නොසෙල්වෙන පරිදි ඇණ මගින් සවි වන්නේ මෙම කොටසටයි. බාහිරට නිරා‍වරණය වන මෙම කාඩ් පත් වල ද්වාරද මෙම ස්ථානයේ පිටතින් දැක ගැනීමට පුලුවන්.

ස්විච් සහ දර්ශක (Switches & Indicarots)

පරිගණකය On කිරීම හා restart කිරීම සඳහා ස්විචයන්ද, පරිගණකයල බලය ලැබෙන බව හා දෘඩ තැ‍ටිය (hard disk) ක්‍රියාත්මක වන බව පෙන්වීමට අදාල LED බල්බ දෙකක්ද අද ඇති බොහෝ පරිගණක කේසීන වල දක්නට ලැබේ. මේවායේ සම්බන්ධක වයර් නිවැරදිව සවි කලේ නැත්නම් නිවැරදිව ක්‍රියා කරන්නෙ නෑ.

Front panel connectors

පරිගණකය භාවිතා කරන්නාගේ පහසුව තකා කේසිනයේ ඉදිරි පසින් Sound හා USB සම්බන්ධක දෙකක් පමණ මෙම කොටසේ දක්නට ලැබේ. මේවායේද සම්බන්ධක වයර මවු පුවරුවට සම්බන්ධ කල යුතුය.

විවිධ කේසින වර්ග පිළිබඳව අපි ඊලඟ පාඩමේදී සාකච්ඡා කරමු.

(වැරදීමකින් මේ ලිපිය මගේ අතින් මග හැරුනා. ඒක පෙන්නල දීපු හසිත ජයසූරිය මල්ලිට ස්තුතියි )

වසරක බ්ලොග් කෙරුවාව.. | 1st Anniversary

2010-03-15T07:02:00.001+05:30

ඕං ඉතිං කණියාගේ සටහනටත් අවුරුද්දක් පිරුනා.. මුලින්ම කියන්න ඕන ම‍ගේ බ්ලොග් එක කියවන ඔයාල නිසයි මෙච්චර දවසක් මමත් මේක ඇදන් ආවෙ.. ඇත්තම කියනව නම් මාව සිංහල බ්ලොග් කරණයට යොමු කරේ අපේ මල්ලි (KaniRockz ගේ සටහන). එයාගෙ සිංහල බ්ලොග් එක දැකල තමයි මාත් මේක පටන් ගත්තෙ. ඒ අතරෙ සිංහල බ්ලොග් කියවනයට සම්බන්ධ උනා. බ්ලොග් කරුවෙක් විදිහට මේ තත්වයට එන්න සිංහල බ්ලොග් කියවනයෙන් ලැබුනු උපකාරයටත් ස්තුතිවන්ත වෙන්න ඕන..

ඇත්තටම බ්ලොග් ලිවිල්ල නිසා ගොඩාක් යාලුවො හම්බුනා.. ඒවගේම සමහරුන්ට උදව් කරන්න ගිහින් ඇදගෙන නෑව මොනව උනත් මම මේක ලියන්නෙ නම් ගොඩක් සතුටින්.. කීප දෙනෙක් හරි මම ලියන දෙයින් ප්‍රයෝජනයක් ගන්නවනේ..

ඒ අතරෙ මම කුමන්ත්‍රණ කාරයෙක් වෙලාලු. එක්තරා ප්‍රසිද්ධ බ්ලොග් එකක ඩොමේන් එකක් 7000ක‍ට විකිනෙන්න ගිහින් මම ඒක නැවැත්තුව‍ලුනෙ. වැඩි විස්තර කියන්න ඕන නෑ.. හැමෝම සීන් එක දන්නවනේ....

කොහොමින් කොහොම හරි බ්ලොග් ලිවිල්ලෙන් ඕන උදව්වක් ඉල්ලන්න පුලුවන් හොඳ යාලුවො ටිකක් නම් හම්බුනා.. ඒ ගැන ගොඩක් සතුටුයි. කොයිතරම් වැඩ වැඩි උනත් දිගටම බ්ලොග් එක ලියන්න බලාපොරොත්තු වෙනවා.. අපි බලමුකෝ..

පරිගණක හාඩ්වෙයා පාඩම - 2

2010-03-03T07:33:00.004+05:30

පසුගිය කලාපයේ පරිගණකයක් යනු කුමක්ද යන්නත්, එහි භාවිත සහ පරිගණකයක දැනගත යුතු මූලික කොටස් පිලිබඳ අපි සාකච්ඡා කල බව ඔබට මතක ඇති. ඇත්ත වශයෙන්ම පරිගණක පිලිබඳ යම්තාක් දුරට දන්නා කෙනෙකුට නම් මෙම පාඩම් මාලා‍වේ යම් වෙනසක් පෙනෙනු ඇත. බොහෝ අවස්ථා වල මෙන් මා මෙහිදී න්‍යායාත්මක කරුණු මුලින් සාකච්ඡා නොකිරීම එයට හේතුවයි. නමුත් ඔබගේ මතු ප්‍රයෝජනය උදෙසා යම් කරුණු ප්‍රමාණයක් ඉදිරිපත් කෙරේ.

පහත රූප සටහන පිළිබඳ ඔබගේ අවධානය ‍මදකට යොමු කරන්න.

මෙහි දක්වා ඇත්තේ පරිගණකයක මූලික සැකැස්ම කීවොත් නිවැරදිය. පරිගණකය යනු දත්ත තොරතුරු බව‍ට සකසන උපකරණයක් බව අප මුල් පාඩමේ සඳහන් කලෙමු. පරිගණකයට දත්ත ලබා දෙන්නේ Input Devices මගිනි. මේවා ආදාන උපක්‍රම ලෙසින්ද හැදින්වේ. මූසිකය (mouse) , යතුරු පුවරුව, මයික්, වෙබ් කැමරා, පරිලෝකන යන්ත්‍ර (Scanner) වැනි දෑ මෙම input devices ගණයට වැටේ.

මෙම input devices මගින් ලබාගන්නා දත්ත මධ්‍යම සැකසුම් ඒකකයේදී (Central Processing Unit - CPU ) තොරතුරු බවට පත් කිරීමේ ක්‍රියාවලියට ලක්වේ. මධ්‍යම සැකසුම් ඒකකය කොටස් 3කින් සමන්විතය.

පාලන ඒකකය (Control unit) - පරිගණකයේ සියලුම දත්ත සැකසුම් කටයුතු හා උපාංග පාලනය වන්නේ මෙම කොටසෙනි.
රෙජිස්ටර (Registers) - මේවා ප්‍රධාන ප්‍රොසෙසරය තුල ඇති කුඩා මතක ගබඩාවන් වේ. දත්ත සැකසීමේ වේගය වැඩි කිරීම සඳහා සැකසෙමින් පවතින දත්ත මේවා තුල රඳවා ගනී.
ගණිත හා තාර්කික ඒකකය (Arithmetic & Logic unit) - මෙමගින් දත්ත සැකසීමේදී සිදුවිය යුතු ගණිතමය මෙන්ම තාර්කික කටයුතුද සිදු කෙරේ.

මෙහිදී CPU මගින් දත්ත සැකසෙන අතරතුරදී ඒවා පරිගණකයේ ඇති තාවකාලික හෝ ස්ථිර මතකයන් තුල තැන්පත් කෙරේ. ‍Ram (Random access memory- සසම්භාවී ප්‍රවේශ මතකය), දෘඩ තැටිය (Hard disk) හා වෙනත් මතක ගබඩා ක්‍රම මෙයට ඇතුලත් වේ.

අවසානයේ සැකසුනු තොරතුරු පරිශීලකයාට ලබා දෙන්නේ Output Devices මගිනි. මේවා ප්‍රතිදාන උපක්‍රම ලෙසින්ද හැඳින්වේ. මොනිටරය (monitor), මුද්‍රණ යන්ත්‍රය (Printer), ස්පීකර (Speakers), මල්ටිමීඩියා ප්‍රොජෙක්ටර් වැනිදෑ මෙවා‍ට අයත් වේ.

ඕනෑම පරිගණකයකට මෙම කරුණු අදාල වන අතර අපි තවදුරටත් පරිගණක දෘඩාංග වල විකාශනය සොයා බලමු. (කාලසීමාවන් ආසන්න වශයෙන් යොදා ඈත)

පලමු පරම්පරාව (1944-1959) - මෙහිදී පරිගණක සඳහා රික්ත නල (Vacuum Tube) තාක්ෂණය භාවිතා විය. ඒවා සඳහා විශාල කාමරයක තරමි ඉඩ වැය වූ අතර කාර්යක්ෂමතාව අතින් සාපේක්ෂව බොහෝ අඩුය.
දෙවන පරම්පරාව (1960-1964) - ට්‍රාන්සිස්ටර තාක්ෂණයේ පැමිණීමත් සමග පරිගණතයේ දෙවන පරපුර ආරම්භ විය. පරිගණකය ප්‍රමාණයෙන් කුඩාවූ අතර කාර්යක්ෂමතාවයද සාපේක්ෂව වැඩි විය.
තෙවන පරම්පරාව (1964-1975) - සංගෘහිත පරිපථ (Integrated Circuits) සොයාගැනීමත් සමග පරිගණකයේ තෙවන පරපුර බිහිවූ අතර පෙරටත් වඩා පරිගණකය ප්‍රමාණයෙන් කුඩා වීමටද කාර්යක්ෂමතාවය වැඩි වීමටද එය හේතු විය.
සිව්වන පරම්පරාව (1975- අද) - ක්ෂූද්‍ර සකසන ( Micro Processor) කරලියට පැමිනීමත් සමග පරිගණකයේ සිව්වන පරපුර ඈරඹුනු අතර එය පරිගණක ක්ෂේත්‍රයේ සැලකිය යුතු වෙනසක් කල බව කිව යුතුය. අද භාවිතාවන පුද්ගලික පරිගණකයක ක්ෂුද්‍ර සකසනය ප්‍රධාන කාර්යභාරයක් කරන බව අප සැවොම දන්නා කරුණකි.

මෙහිදී අප සාකච්ඡා කල න්‍යායාත්මක කරුණුත් සිතට ගෙන අපි ඊලඟ පාඩමේ සි‍ට ප්‍රායෝගිකව පරිගණකයක් එකලස් කරගන්නා හැටි ඉගෙන ගනිමු.

විද්‍යුත් චුම්බක ස්පන්ද | EMP

2010-03-01T07:32:00.002+05:30

කට්ටිය කොහොමද ඉතිං.. මේ ටිකේ මාර විදිහට අලුත් බ්ලොග් එකතු වෙලා.. අපිව කට්ටියට මතකද දන්නෙත් නෑ . හරි.. ඒව වැඩක් නෑ. අපි මාතෘකාවට බහිමු. මොකක්ද මේ විද්‍යුත් චුම්බක ස්පන්දයක් නැත්තම් EMP එකක් කියන්නෙ? The Matrix බලල තියෙන අයට නම් EMP කියන්නෙ ඒ තරම් අමුතු දෙයක් නෙමෙයි. Nebuchadnezzar යානයේ තිබුන EMP Geneator එක මතක ඇතිනේ..

කෙටි කාලයකදී විශාල වශයෙන් නිකුත් වෙන බලවත් විද්‍යුත් චුම්බක තරංගයකට EMP එකක් කියලා කියන්න පුලුවන්. මෙහිදී න්‍යෂ්ඨික පිපිරුම් මගින් ඇති කෙරෙන EMP පිලිබඳ නෙමෙයි සාකච්ඡා කරන්නේ. නමුත් ඒවාත් මෙයට ඇතුලත්.

Smallville හි EMP එකක් ඇතිවන දර්ශනයක්

ඉතින් මේ EMP එකකින් මොකද වෙන්නෙ..? කලින් සඳහන් කලා වගේ මෙමගින් එකවර ඉතා ප්‍රබල විද්‍යුත් චුම්බක තරංගයක් ඉතා කුඩා කෙටි කාලයක් සදහා නිකුත් කෙරෙනවා. මෙවැනි තරංගයකින් අපි භාවිතා කරන බොහෝමයක් ඉලෙක්ට්‍රොනික උපකරණ අඩපන කරන්න පුලුවන්. මෙහිදී එම උපකරණයේ බොහොවිට තිබෙන Microcontroller එක තමයි විනාශ වෙන්නෙ. ඒවගේම විද්‍යුත් චුම්බක ආකාරයෙන් දත්ත සටහන් කරල තියෙන මාධ්‍ය වලත් දත්ත විනාශ වෙන්න පුලුවන්. ඇත්තටම කුඩා පරිමාණයේ electromagnetic pulse gun , Programmable Chip වල තියෙන දත්ත මකන්න පාවිච්චි කරනව. හැබැයි මේව අර ෆිල්ම් වල වගේ නිල් පාටින් පේන්නෙ නම් නැති බවත් මතක තියා ගන්න.

සැහ්.. කියවන් යනකොට කට්ටියගෙ මූනට එන හිනාව.. දැන් හිතනව ඇති , ඉඳපංකෝ... දෙන්නං අරූගෙ කොම්පියුටරේට කියල

ඉතිං EMP ගැන කියව කියව ඉඳල වැ‍ඩක් නෑනෙ. ගේම දෙන්න නම් එකක් හදාගන්න වෙනව. මෙ‍හිදී පාවිච්චි වෙන්නෙ ධාරිත්‍රකයක ගබඩාඋන විද්‍යුත් ශක්තියෙන් විද්‍යුත් චුම්බක තරංගයක් නිපදවා ගැනීම. මේ චුම්බක ක්ෂේත්‍රය නිපදවන්න පාවිච්චි කරන්නෙ බොහෝ විට Single loop coil එකක් . නමුත් මේක අවශ්‍යතාවය අනුව වෙනස් වෙනවා.

මේ පිලිබඳ ඇමරිකා විශ්ව විද්‍යාලයක සිසුවෙක් කරපු project එකක් හම්බුනා. ඒ මගින් ප්‍රායෝගිකව EMP generator එකක් හදාගන්නෙ කොහොමද කියල දැනගන්න පුලුවන්.

~~Original Download link~~
New download link

EMP gun එකක්. මේවා microcontroller වල memory erase කිරීමට පාවිච්චි කරනවා.

කට්ටිය සමාවෙන්න ඕන. වැඩකටයුතු නිසා ලිංක් එක දාන්න ප්‍රමාද උනා..

Lets Repair Your old Mouse

2010-02-22T10:07:00.004+05:30

This is a Translation of my Post මීයන් සෑදීම..

Everybody knows the importance of the mouse when we are using the computer.. Imagine when you are working in your Pc at the night, the mouse suddenly stops working and you don't have an extra mouse.
It will be very difficult to you to face that situation, So.. what will you do next day??
As usual, go to the computer shop and you'll buy a new mouse spending about 500 rupees (5$). Isn't it? (OMG :O 500 rupees (5$)? i will never spend that much for a mouse )

But you still don't know that you can fix your mouse most of the time very easily..

First of all, you have to check weather the power is available for the mouse. It's really simple for an optical mouse. If the lights are on it is powered . If you are using a ball mouse, there's nothing to do.

So, lets begin our mission. First of all we have to give the mouse a little wakeup. Even the computer sometimes forgets the mouse. If it's a USB mouse, try plugging it to a different USB port. If it's a PS2 or a Serial mouse, Then you have to shut down your computer, unplug the mouse and plug it again. Then turn on your computer. If the cursor is moving and the buttons are functioning correctly, then the problem is solved and you can begin your work

If you are using a ball mouse, sometimes you may face this problem. The ball mouse has to rollers which rotate with the ball. Most of the time these rollers get covered with dust and begin to malfunction. But it will not cause complete inaction. But still you can check it out.

From here, i'm discussing about wire mouse. 99% of errors in mouse are due to their low quality wires.

Most of the time the wires in a mouse get broken where they face bending. Normally a mouse has four wires which carries power and data. All four wires are protected by a housing made of a rubber, plastic compound. The wires get broken in the housing, so we can't see what happened there.

The probability that the wires can get broken is little bit higher in the marked areas. Because those two points always gets bended. Okey.. Lets get in to work

Find a soldering iron, some solder, a disoldering pump and a multi meter. If its a ball mouse, first you have to get the ball out. If its an optical mouse, nothing to worry, Start dissembling
(By the way, keep your eye on the parts. They may fly away from your hand )

If it's an old mouse, you'll see the wires are plugged in to the circuit board as above picture. In a new mouse, the wires are normally soldered in to the board.

Before disoldering the wires, lets check weather the wires have loose connections or that they got short circuit. If there are, Lets begin our work.

Before we start, if it's a plug, you have to mark how it was plugged to the board. Normally it fits only one way. If the wires are soldered, then mark the colors and the places that they were soldered. Then take the wire out and cut it from a bending point.

Description

1 - mouse data
2 - Reserved
3 - Ground
4 - Mouse power (+5v)
5 - Mouse clock
6 - Reserved

Check the connectivity, if it works then solder the wires and assemble the mouse.
Sometimes the wire can break near the PS2 or USB port. Then you have to cut the plug and find a new Usb or PS2 connector.

And sometimes the mouse can be completely dead. Then you have to try giving it a new brain.

Here's a Skirt mouse. What do you think about that??
Galz take it easy

පරිගණක හාඩ්වෙයා පාඩම - 1

2010-02-14T07:17:00.003+05:30

පරිගණකය අද අප අතර වඩාත් ප්‍රචලිත උපකරණයක් වී ඇත. මෑත අතීතයේ සුඛෝපබෝගී භාණ්ඩ ගණය‍ට අයත් වූ පරිගණකය අද වන විට බොහෝ දෙනෙකුට අත්‍යවශ්‍ය දෙයක් වී ඇති බව අපි දන්න කරුණක්. මෙම පාඩම් මාලාවෙන් අප බලාපොරොත්තු වන්නේ පරිගණක හාඩ්වෙයා පිළිබඳ සරළ මට්ටමේ සිට යම්තාක් උසස් මට්ටමක් දක්වා දැනුමක් ඔබ වෙත ලබා දීම හා වෘත්තීය දෘඩාංග ශිල්පියෙකුගේ මට්ටම ඔබ වෙත ලඟා කර දීමයි.

මුලින්ම අපි පරිගණකයක් යනු කුමක්දැයි සොයා බලමු, දත්ත තොරතුරු බව‍ට සකසන උපකරණයක් පරිගණකයක් වනුවෙන් ස‌රළව හඳුන්වන්න පුලුවන්. අප අත ඇති කුඩා ගණක යන්ත්‍රය පවා පරිගණකයක් යන්න අද බොහෝ දෙනා නොදන්නා කාරණයක්. මෙම පාඩම් මාලාව පිළිබඳ ඔබගේ අවධානය යොමු කලොත් ඇත්ත වශයෙන්ම න්‍යායාත්මක කරුණු වලට වඩා ප්‍රායෝගික දැනුම පිලිබඳ විශේෂ අවධානයක් අප මෙහිදී යොමු කරල තිබෙන බව කිව යුතුයි.

මුලින්ම අප දැනට භාවිතයේ ඇති පරිගණක වර්ග පිලිබඳ සොයා බලමු,

1. පුද්ගලික පරිගණක (PC) එහෙමත් නැත්නම් Desktop Computer (ක්ෂුද්‍ර පරිගණක/micro computer යනුවෙන්ද මේවා හැදින්වේ).
2. Note Books, Laptops.
3. PDA (Personal Digital Assistant).
4. Super Computer.

Main Frame, Mini Computer වැනි දෑ දැනට භාවිතයේ නොමැති තරම්ය. මෙම පාඩම් මාලාවේදී අපගේ විශේෂ අවධානය පුද්ගලික පරිගණක වෙත යොමුවන අතර ලැප්ටොප් පිළිබඳවද යම්තාක් සාකච්ඡා වනු ඇත. ඉදිරි කොටස් වලදී පුද්ගලික පරිගණකය, පරිගණකය ලෙසින් කෙටියෙන් හඳුන්වන බව සලකන්න.

මුලින් අපි පරිගණකයේ බාහිරින් පෙනෙන කොටස් හඳුනා ගනිමු.

System Unit (පද්ධති ඒකකය)

අද බොහෝ දෙනෙකු System unit නමින් හැදින්වෙන කොටස CPU එක නමින් වරදවා හදුන්වන අතර මෙහිදී CPU යනු Central Processing Unit බව සැලකිය යුතුය. පරිගණකයේ බොහෝ වැදගත් උපාංග මෙය සමන්විත වන අතර ඒවා පිළිබඳව ඉදිරියේ සාකච්ඡා වනු ඇත. විශේෂ සැලැස්මකට නිර්මාණය වූ පරිගණකයක හැරුනුකොට සෑම විටම පුද්ගලික පරිගණකයක් system unit එකකකින් සමන්විතවේ.

Monitor (මොනිටරය)

රූපවාහිනී යන්ත්‍රයක පෙනුම ගන්නා මෙම උපකරණය පරිගණකයක ඇති තවත් එක් වැදගත් කොටසකි. සකස් කෙරෙන දත්ත දර්ශනය කරවීම මෙමගින් සිදු කෙරෙන කාර්යයයි. ප්‍රධාන වශයෙන් භාවිතා වන මොනිටර වර්ග දෙකකි. එනම් CRT (Cathode Ray Tube) සහ LCD (Liquid Cristal Display) ය. ඉහත රූප සටහනේ දක්වා ඇත්තේ LCD මාදිලියට අයත් මොනිටරයකි. අනෙක් වර්ගයද ඔබ දැක ඇති බව අපි උපකල්පනය කරමු. ඉදිරි‍ පාඩම් වලදී මේවා පිළිබඳ වි‍ශේෂයෙන් සාකච්ඡා වනු ඇත.

Key Board (යතුරු පුවරුව)

අතීතයේ සිටම පරිගණකයේ සියලු දත්ත ඇතුලත් කිරීම් හා විධානයන් ලබා දීම යතුරු පුවරුව මගින් ‍සිදු වී ඇත. අදටත් යතුරු පුවරුවකින් පමණක් අපහසුවෙන් වුවද පරිගණකයක් හැසිරවීම සිදු කළ හැක. දැනට ප්‍රධාන වශයෙන් භාවිතා වන යතුරු පුවරුව QWERTY නමින් හැදින්වේ.

Mouse (මූසිකය)

මැත කාලයේ පරිගණකයක ඇති අත්‍යවශ්‍යම උපකරණයක් බවට මූසිකය පත්වී ඇත. අද භාවිතා වන බොහෝමයක් මෘදුකාංග වල වධානයන් මෙය මගින් ලබා දීමට හැකි වීම මෙයට ප්‍රධානම හේතුවයි. ක්‍රියා කරන පරිගණකයක් ඉදි‍රියේ කිසිවෙක් හිද ගතහොත් 90% කගේම අත් මුලින් යන්නේ යතුරු පුවරුවට නොව මූසීකය වෙත බව ඔබ අප සැවොම දන්න කාරණයක්.

Speakers (ස්පීකර)

ස්පීකර අපට නුහුරු දෙයක් නොවන අතර මේවා නොදන්නා කෙනෙක් නොමැති තරම්ය. පරිගණකය මගින් නිපදවන විද්‍යුත් සංඥා ආකාරයෙන් ඇති ශබ්ද අපට ඇසෙන ආකරයට පරිවර්තනය කිරීම මෙමගින් සිදු කෙරෙන කාර්යයි.

මෙම කොටස් වලට අමතරව අප සාකච්ඡා කල යුතු තවත් විශාල උපාංග ප්‍රමාණයක් ඇත. නමුත් මූලික වශයෙන් පරිගණකයකට ඉහත දක්වා ඇති කොටස් වුවද ප්‍රමාණවත්. සමහරවිට මෙම කරුණු පරිගණක පිලිබඳ නොදන්නා කෙනෙකුට යම්තාක් අපහැදිලි විය හැක. මා මෙහිදී පරිගණකය පිලිබඳ මූලික හැදින්වීමක් සිදු කර ඇති අතර ඉදිරි පා‍ඩම් වලදී වඩාත් විස්තරාත්මක කරුණු බලාපොරොත්තු වන්න.

ඇත්තටම මට වඩා මේ ගැන දන්න අයත් මෙතන ගොඩක් ඇති.. ගැටළු තියේ නම් comment මගින් අහන්න.

අලුත් වැඩක්..

2010-02-03T07:58:00.006+05:30

කට්ටිය කොහොමද ඉතිං.. මේ ටිකේ ඉතිං මටත් ටිකක් free. ඒක නිසා ඉතිං අන්තර්ජාලෙ එහෙම ටිකක් වැඩිපුර සැරිසරනව.. ගොඩක් වෙලාවට මාව Gtalk එකේදි එහෙම අල්ල ගන්න පුලුවන්.. කැමති අය ඇඩ් කරන්නකෝ (kani97).

ඒ කතා ඇති දැන්. කට්ටියම දන්නවනෙ අපේ දසුන් අයියගෙ Cplus මැගසින් එක ගැන. මමත් ඉතින් ඒකට පුංචි ලිපි ටිකක් ලියනව පරිගණක හාඩ්වෙයා ගැන.. දන්න අයට නම් කිරි කජු වගේ ඇති.. අනික මුල් කොටස් වල ඒව නම් කියන්න ඕන දේවලුත් නෙමේ.. ඒත් ඉතිං නොදන්න අයත් ඉන්නවනේ.. ඉතින් මම බැලුව සියලු සත්වයාගේ හිත සුව පිණිස ඒ ලිපි මගේ බ්ලොග් එකේ පළ කරන්න, මැගසින් එකට අසාධාරණයක් නොවෙන විදිහට.. හැබැයි ඉතින් මාසෙකට එක ලිපියයි. ඒ උනාට කල් යනකොට ගොඩක් දේවල් ලියවෙයි.. පරිගණක හාඩ්වෙයා කියල වෙනමම ලේබල් එකක් යටතේ ලියන්නයි කල්පනාව..

ඉතිං හාඩ්වෙයා ගැන ලියනව කියල නිකන් යන්නත් බෑනෙ.. ඒක නිසා මම බැලුව පොඩි තෑග්ගක් දීල යන්න.. මේක ඇවිල්ල පරන Dos Software එකක්. පරිගණකයේ විවිධ කොටස් වල විස්තර තමයි තියෙන්නෙ.. ඇත්තමයි දැන‍ටත් මට නම් ආස හිතෙනව මේ වගේ ඒව දැක්කම. ඉස්සර සීමිත සම්පත් ප්‍රමාණයක් තිබ්බ පරිගණකයකින් අපි කොච්චර වැඩ ගත්තද.. ඒත් අද බලන්න.. අද අපි මොනවද කරන්නෙ කියල..

Computer Works

ගොඩක් දුරට මේක Vista , Windows 7 වගේ ඒවයි කෙලින්ම වැඩ කරන එකක් නෑ.. ඒක නිසා Run කරන්න Dos Box පාවිච්චි කරන්න.

මෙතනින් බාගන්න.

Computer Works - Download
DosBox - Download